مازلت

مازلت ابحث فى وجوه الناس عن بعض الرجال

عن عصبه يقفون فى الازمات كالشم الجبال
فاذا تكلمت الشفاه سمعت ميزان المقال

واذا تحركت الرجال رايت افعال الرجال
اما اذا سكتوا فانظار لها وقع النبال

يسعون جهدا للعلى بل دائما نحو الكمال

كل ما سمع الانشودة دى ويتطرق الى اذنى ذلك الشعر الرقيق اتذكر الصحابة ومن بعدهم المجاهدين ومن بعدهم الاخوان.

يمر بخاطرى شريط من صور للبنا ولسيد قطب وللهضيبى ولمصطفى مشهور ولكل الدعاة اللى كبرنا بنسمع عنهم وبنسمع على انهم كانوا من اشباة صحابة رسول الله

يالله

هانلاقى فين زيهم دلوقتى ؟؟

ماحدش يزعل مني لكن كل ما الزمن بيعدى كل ما الرجالة بتقل.

انا لا اتكلم عن الاخوان تحديدا ولكن اتكلم على كل ذكر من ولد ادم

الواحد دلوقتى بيشوف رجالة نص كم

بيشوف رجالة بسلسله زى البنات

بيشوف رجالة بقصة( بضم القاف وتسكين الصاد) زى البنات

بيشوف رجالة بترقص فى التليفزيون ولا اجدع راقصة فى شارع الهرم

فين الرجالة؟؟

فين رجالة زى احمد يس اللى افتكرتة بمناسبة ذكرى استشهادة

يابخته

اين اشباهك يا احمد يس؟؟

اين اشباه الرنتيسى ؟؟

ياترى هاييجى زيكوا ولا مابقاش فى رجالة

يا ترى واحد من الشباب المصرى سأل نفسة انا راجل ولا لأ؟؟

على فكرة الرجولة دى صفة للرجل وللمرأة

بمعنى اخر ان ممكن يكون فى مرأة بمائة ذكر زى ما بيقولوا

ياترى لسه فيكى يا مصر رجولة؟؟

انا كنت عايزة اتكلم عن احمد يس بس ماعرفش اية اللى خلانى اتطرق لموضوع الرجولة دة .

على العموم انا هاكتب بوست تانى عنه

نفسى اللى هى انا

نفسى بفتح النون وتسكين الفاء وكسر الياء طبعا مش زى نفسى بتاعه الاستاذ مجدى.

المهم ايه اللى عايزة اقوله عن نفسى ,حاجات كتير والله بس فى نفس الوقت مش عارفة اقول ايه؟؟

نفسى انا بحبك والله بحبك وانتى كمان بتحبينى ؟؟؟

انا عايزة اقولك انى نفسى (زى بتاعه الاستاذ مجدى) انى اصاحبك يا نفسى (بتاعتى)

اللى عايزة اقوله انى لسه معرفكيش قوى ,عايزة اقولك انى نفسى افهمك,بتعملى حاجات ساعات بحبها فيكى قوى واقول والله انت بت جدعة قوى

وساعات بتعملى حركات قرعه قوى قوى قوى مفيش بنت ملتزمة بتعملها

اية رايك نتصاحب ؟؟

ايه رايك نخرج مع بعض ؟؟

نتمشى على النيل ؟؟

احكيلك وتحكيلى ؟؟

معرفش الجديد هاييجى منين بس اهو تفتحيلى قلبك

ليه ساعات اما اقولك تعالى نعمل الحاجه الفلانيه ,دى فيها خير كتير ماترضيش ؟؟

وافضل اتخانق معاكى ونزعل من بعض

ليه كل طاعه بعملها بتكونى عملها غصب عنك مع انها الفلاح والخير

مش احنا اتفقنا اننا نبقى اصحاب وانا مرضاش ان صحبتى تخش النار او تعمل حاجه تأذيها

عارفة يا نفسى انا بحب فيكى ايه؟؟

انك انت

انك على طبيعتك مابتتكلفيش فى تعاملاتك ولا مع اصحابك ولا مع اى حد

عايزة تتعاملى مع حد بتحبيه بجد و لو مش عايزة مابتتعامليش معاه اصلا

عمرك ما بتتكلفى فى تعاملاتك ولا عمرك ضحكتى ضحكه مش من قلبك ولا عمرك قلتى كل حب لو واحدة مش حاسه بيها

واما بتكونى مضايقة من حد بتقوليله على طول

عارفة ايه كمان بحبه فيكى

انك بتحبى الحق قوى وبتحاول بقدر الامكان تنصرى المظلوم

وانك بتتخنقى من الظالم او حتى اللى معندهوش ذمه

وبحب جرئتك فى الحق وبحب اتقانك فى العمل الا المذاكرة انتى مخستعه فيها قوى

كفاية عليكى كده يمكن يقولوا علينا مغرورين

وبلاش بقى اقولك الحاجات اللى مش عجابانى فيكى علشان مفضحكيش

خليكى كده مستورة

وعملا بالحديث اللى بيقول قال رسول الله صلى الله عليه وسلم "كل امتى معافاة الاالمجاهرين"وبقيه الحديث

انا مش هاقول البلاوى اللى بتعمليها علشان ربنا يغفرلى ويغفرلك

بس هاقول على كام حاجه كدة مش مطمنانى

محسسانى انك بتتغيرى بس للاسف للاسوأ

اتعلمتى يا صديقتى استعمال الصابونة

لأ طبعا مش لغسل الوجه بل لزحلقه الناس اللى بيضايقوكى

انا مش عاجبنى كده ,اتعودت منك انك تسامحى وتغفر او حتى تواجهى مش تزحقلى وتنفضى

انت ممكن تعملى كده مع الناس اللى ماتعرفهمش او مايعرفوكيش بس ماتعودت منك كده مع حد كان ليه الفضل عليكى فى يوم من الاوقات

او حتى حد ربنا بيحبه

انا عارفة ان موضوع الصابونة دى اريحلك بس انت كده هاتخسرى الناس من حواليكى واحدة تلو الاخرى بسبب مواضيع احسبها تافهه

وماتستاهلش

حبيبتى انا عايزاكى ترجعى تانى تحبى الناس اللى اتديهم الصابونة علشان ربنا يحبك

هاقولك على حاجه اخيرة وفعلا انا صادقة فيها

انا كل مابعرفك اكتر بحبك اكتر

سلام بقى قبل ما نتخانق وساعتها هاديكى الصابونة.

الرسمة اللى فوق دى انا اللى رسماها وبحبها قوى

انا عارفة انها مش واضحه قوى

بس هى بتفكرنى بالجنة

إلى آبآئى الذين اشتاقُ لرؤياهم

إلى كل من دعى الى الله

الى كل من فعل الخيرات

الى كل من حوكم لقول الحق

الى من صودرت امواله ويعلم الله انها لم تأت الا بالعمل الصالح

الى كل باعد الظالمين بينه وبين من يحب

الى كل الذين حوكموا مؤخرا بتهمة غسيل الاموال وهم منها اجمعين براء

عفوا اختى اسماء قد اقتبست منك العنوان

ولكن لم اجد ما اصفهم به غير ذلك

فانا اشتاق لرؤيتهم واشتاق لمجالستهم وانهل من علمهم واستمتع بتجاربهم فى الحياة

لكم شعرت بالغيرة من ابناء الاخوان لما فازوا به من مجالسه آبائهم واصدقاء الاب

لكم حلمت انى ابنه احد منهم

لكنى اعتبر نفسى ابنتهم كلهم ولا اتردد فى تلقيب احدهم بعمو لما احس بصله القرب منهم

لكم حلمت فى لقاء عمو عصام العريان ليتحدث معى بقلبه الرقيق ولسانه اللبق وعقله الفذ

وسعدت جدا بلقاء عمو عبد المنعم ابو الفتوح و احسست بعطفه وحنانه

وكم وكم وكم

ادعو الله ان يفرج كرب كل آبآئى وكل من شهد يارب لك بالوحدانيه وجاهد فى سبيلك

اللهم فك اسرهم

اللهم ابدلهم خيرا فى اولادهم واموالهم

اللهم ثبتهم على ما اصابهم

انك نعم المولى ونعم النصير

وحسبنا الله ونعم الوكيل

زماااااااااااااااااااااان وان صغير

زمان وانا صغير
كنت بحلم ابقى كبييييير ابقى كبير
تعب القلب واتحير من الدنيا ومن المشاوير
الحلم كان برئ مفروش بالورود
والقلب كان جرئ مليان بالوعود
ولما كبرت قلت ياريت ماكنت حلمت ولا تمنين
قلت ياريتنى فضلت صغير زى زمان

ألاغنيه دى كنت بغنيها وانا صغيرة علشان كنت بحلم ساعتها انى اكبر ودلوقتى بغنيها علشان ارجع صغيرة تانى(سبحان الله)محدش عنده طريقه؟؟

وانا فى الثانويه العامه كنت بغنى الاغنيه دى من قهرتى لعلى انكمش وارجع صغيرة تانى,فقد كانت ايام امتحانات الثانويه العامه بقضيها مذاكرة الصبح وعياط بالليل , ولله وحده الفضل فى ادخالى مصح الامراض اقصد طب الاسنان (سبحانه قادر على فعل المعجزات) فلم اكن من ذاك النوع من البشر الذى ينكب على الكتاب او يصم صما(لازلت)

فمن صغرى كنت من العيال اللى بتفهم من اول مرة وتنسى من اول وهله والحمد لله.


وانا صغييرة (وما ادراك ما انا)حلمت تقريبا انى اشتغل كل الشغلانات اللى فى الدنيا,

حلمت مثلا انى صحفيه او مصورة (والله لغايه دلوقتى انا لسه بحلم) واقابل عليه القوم واتاثر بهم واثر فيهم بأسألتى العبقريه طبعا.
وحلمت انى رحت فلسطين وانى بصور كل المشاهد التى تدمى لها القلوب علشان افوق الناس واصحيهم على واقعنا المر.

وحلمت انى من المجاهدين فى الشيشان وفى فلسطين وانى افجر نفسى فى وسط اكبر عدد من الاعداء علشان اكون مثل الشهداء اطير بجناحين فى الجنه واسكن تحت عرش الرحمن ولا اتحاسب ولا حاجه.

وحلمت انى اكون كمسريه علشان احاول انظم الناس فى الاتوبيسات وحلمت انى اكون سمكريه ومكنيكيه .
وحلمت انى اكون سواقة عربيه لورى (علشان بحب السفر قوى)وافضل سايقه طول الليل وانام كام ساعة كده بالنهار.

وحلمت انى اكون بياعه فى سوبر ماركت او فى محل ملابس وكنت حتى بفكرازاى هاقنع الزبونه انها تشترى منى.

ودايما فى كل احلامى دى كنت بفكر فى لحظه قبض المرتب (محدش يفهمنى غلط بالعكس الفلوس دى بالنسبه ليا وسيله توصلنى لغرضى وعمرى مانظرتلها بانها شئ له اهميه علشان كده ايدايا سايبه قوى) المهم انى كنت بحس بمتعه ألاكل من فلوس حلال وأنى ممكن بمجهودى وبعرقى انى اكسب ,انا مش عارفه ليه اللحظه دى معلقه معايا؟؟

وطبعا لم تخلو احلامى هذة من انى اكون طبيبه بس عمرى ما تخيلت نفسى طبيبه اسنان ,.

وحلمت انى بطله من ابطال الاولومبيات او من ابطال التجديف (شوفته فى فيلم قبل كده( وانى حصلت على جوائز عالميه ترفع راس مصر

وحلمت انى ممثله ,بمثل ادوار هادفه ترتقى بمستوى الاعمال الدراميه والسينمائيه

وحلمت انى مخترعه كبيرة او مكتشفه سر عظيم من اسرار الكون علشان ابرهن على عظمه الخالق

وحلمت انى جاسوسه حاجه كده زى رافت الهجان وتخيلت قد ايه هو كان تعبان اما بيشتموا فى بلده وهو موافقهم وساكت مع انه من جواه كان هايفرقع وكان نفسه يفجر فيهم مولولتوف(من بتوعى)

متهيألى كفايه عليكوا كده مع انى لسه كتبتش كل احلامى ,ربنى ما يحرمنى منها

بس فاضل حلم واحد , والحلم ده انا مؤمنه بيه قوى ومشتاقه ليه قوى قوى قوى
ولو انا مقدرتش احققه اكيد هاييجى بعدى حد هايحلم بيه وهايؤمن بيه وهايقدر يحققه

وصفه ببساطه انى

بحلم لو عاد الاسلام

بحلم لو عاد الاسلام يحكم من تاني

ويخلي صحاري الاوطان خضرا واماني

بحلم لو نسمة ايمان هزت اركاني

يجي الفجر ويضوي الليل حسنه الرباني

بحلم ان العدل يسود عدل عمر وجنوده أسود

تحمي العدل وعنه تزود ما تخاف الجاني

حلمنا وإتجمعنا صفوف كفي في كفك نبقى ألوف

نموت جوانا الخوف ونعود من تاني

بحلم إن جيوشنا كتير وسيف الدين عاد للتحرير

والأقصى ينادي يا امير طهر أركاني

الحلم اللى القلب ناداه شعب بيهتف باسم الله

ويخلي إمامه وهداه نهج القرآن

بحلم لو عاد الاسلام يحكم من تاني

ويخلي صحاري الاوطان خضرا واماني

اين صديقى حسن؟؟؟

زار الرئيس المؤتمن

بعض ولايات الوطن

وحين زار حينا

قال لنا:

هاتوا شكاويكم بصدق فى العلن

ولا تخافوا احدا فقد مضى ذاك الزمن

فقال صاحبى حسن:

يا سيدى

اين الرغيف واللبن ؟؟

واين تأمين السكن؟؟

واين توفير المهن؟؟

واين من يوفر الدواء للفقير

دون ثمن؟؟

يا سيدى

لم نر من ذلك شيئا ابدا

قال الرئيس فى حزن:

احرق ربى جسدى

اكل هذا حصل فى بلدى؟؟!

شكرا على صدقك فى تنبيهنا يا ولدى

سوف ترى الخير غدا

وبعد عام زارنا

ومرة ثانيه قال لنا::

هاتوا شكاويكم بصدق فى العلن

ولا تخافوا احدا

فقد مضى ذاك الزمن

لم يشتك احدا

فقمت معلنا

اين الرغيف واللبن ؟؟

واين توفير السكن ؟؟

واين توفير المهن؟؟

واين من يوفر الدواء للفقير دونما ثمن؟؟

معذرة يا سيدى !! واين صديقى حسن؟؟؟

احمد مطر

بدايتى مع الاخوان

فى يوم من الايام اقترح عمو جارنا على بابا انه يودينا المسجد اللى بنت عمو بتحفظ فيه القران , علشان يسربنا من البيت علشان اختنا الكبيرة كانت فى اعداديه(شهادة يا ناس) وعندما ذهبا مع جارتنا للمسجد القريب منا كنا عايزين نحفظ مع نفس الشيخ بس للاسف (ولحسن حظنا)كان الشيخ مشغول فكلفوا معلمه اخرى انها تحفظنا قران(ليقضى الله امرا كان مفعولا)فى الاول كنا زعلانين بس اما قعدنا مع هذه المعلمه حبناها قوى وبقينا نقولها يا خالتو اما قالتلنا اعتبرونى زى والدتكو وقولولى يا خالتو.

بدأنا نلتزم انا واختى فى حضور الحلقات فى هذا المسجد وكنت ساعتها فى ابتدائى و اتربيت على حاجات كتير كنت ماتربيتش عليها فى بيتنا,اتربيت على الالتزام بالصلاة ,اتربيت على انى لازم ربنا يكون راضى عنى وانى معملش حاجه تغضب ربنا منى.

انتقل هذا الالتزام من المسجد للبيت وبدأ البيت فى اتباع ما جاء به محمد صلى الله عليه وسلم ,انا مش هاقول اننا كنا كفرة بس كنا غفلانين زى ما معظم الناس غفلانه دلوقتى ويعود الفضل بعد الله سبحانه وتعالى( الذى هدانا لهذا) الى خالتو .

كانت خالتو بالنسبه لى قدوتى وكانت على طول بتقولى انى بمثابه ابنتها.

ووتبدل الحال غير الحال وعرفت قيمه الاسلام فى حياتى وزى ما بيقول الشاعر فى انشودة الاسلام غيرنى كتير

الاسلام غيرنى كتير وله فضل على كبير

خلانى اشوف اشوف النور

حسسنى بطعم الخير

وكل ما ابعد عن خالتو وارجعلها تانى الاقيها بتحمل لى نفس شعور الحب والمودة

كنت دايما بحس (اما واحد بيبقى عشمان فيك ومصدقك قوى ومؤمن بجد بقدراتك)انا على طول كنت بحس ده منها

ومن خلالى اتعرفت على اختى الكبيرة وبقت تحضر معانا وكمان اتعرفت على امى و كنا دايما نجيب سيرتها ادام بابا

كانت دايما بتقولى لكل واحد فيكو (انا وبقيه البنات)مفتاح اعرف ادخله منه

كانت دايما تقولى انا عارفه مفتاحك ياشذى

كنت أول مرة احس ان فى حد فاهمنى ومقدرنى.

عارفين الدكتور ياسر نصر كان بيقول مرة فى برنامج بتاعه اما يكون الطفل شديد الزكاء وجواة طاقه مبتستغلش فى انشطه مفيدة بسبب ان الاهل مش واخدين بالهم من طاقه ونشاط الطفل الزائد,الطاقه دى بتتحول لغضب جوة الطفل وبيحس انه مهمل وانه مش عارف اللى بيحصله ده طبيعى ولا لأ؟؟؟

وبيحس انه نفسه يصرخ ويقول انه مليان طاقه ومش عارف يوديها فين؟؟

انا بقى كنت كده وانا صغيرة كان جوايا دايما غضب ومش عارفه ايه سببه ومش عارفه اودى الطاقه اللى فيا دى فين ؟؟

كنت بزعق وبصوت, لغايه اما خالتو ربيتنى

ربيتنى بجد خلتنى اتصالح مع نفسى ,خالتنى اعرف شذى كويس ,خالتنى اعرف انى عندى قدرات رهيبه وانى مستألش بنفسى ابدا

وعلشان مطولش عليكو كان كل ما يمر عليا الوقت كنت بتعلم حاجه جديدة عن نفسى اكتر واكتر وكان حبى لخالتو بيزيد يوم عن يوم ,وكنت بحضر معاها حلقه خاصه كل اسبوع بناخد فيها فقه وسيره وبقيه الفروع

لحد ما جيه يوم استشهاد الشيخ احمد يس رحت لخالتو بعد الكليه كنت عايزة افهم ليه ليه يعملوا فى راجل عاجز كده؟؟؟

ده مكانش فيه غير عقل؟؟؟

عقل عقل يواجه بصواريخ طائرات اف 16؟؟؟!!!!!

عقل وتفكير واحد عاجز امال عقل وتفكير رجل صحيح يساوى ايه؟؟؟؟

مايساويش طبعا لو كان عاجز

اكتشفت ان العجز الحقيقى هو عجز العقل والفكر مش عجز الأعضاء

اكتشفت ان الانسان اللى مايقدرش يقول كلمه حق فى وجه الظالم هو اللى عاجز

اكتشفت ان الانسان اللى مش قادر يفكر فى حاجه غير اكله وشربه وبس هو اللى عاجز

اكتشفت ان اللى ارضه بتغتصب قدامه واخته بينتهك عرضها امامه هو اللى عاجز

الصهاينه اكيد فكروا ان موت احمد يس ممكن يفوق ناس كتير وممكن يقوم المجتمع الدولى ضدهم بس هما حسبوا الحسبه صح

لانهم عارفين ان عقل احمد يس هو اخطر من عقل الف مسلم غيره

ويومها قالتلى خالتو ان حماس تبقى من الاخوان يعنى تابعه للاخوان المسلمين فى مصر وان خالتو كمان من الاخوان المسلمين

ساعتها قولتلها يا خالتو لو الاخوان المسلمين نقصوا واحد فى فلسطين يبقى انا هازودهم واحد فى مصر

بس يارب ابقى زى احمد يس علشان المعادله تبقى صح

وبعد كده تعرفت على اخوات الكليه تقريبا فى اواخر السنه الثانيه من الكليه وكنت دايما بغير من اللى سبقونى وكنت دايما بتمنى انى كنت اتعرفت عليهم من سنه اولى كليه

بس هى دى كل حكايتى مع الاخوان

مش هاقول انى بقيت واحدة منهم لانى لسه ادامى مشوار طويل لاستحق هذا الشرف

بس فعلا دعوة الاخوان هى اقرب دعوة الى قلبى وفكرهم هو الاقرب الى فكرى

كفايه عليا انى اما اصلح فى كليتى ببقى مطمنه ان فى زيي بيصلح فى كليه تانيه

كفايه عليا ان شعارهم واحد

كفايه عليا اخلاصهم فى دعوتهم

كفايا عليا انى ببقى مطمنه انى فى مصر بجاهد لاصلاح بلدى وفى غيرى فى سوريا والعراق وفلسطين

اعتذر عن اسلوبى الركيك فى الكتابه بس لانى كتبت البوست ده من قبل وكان اطول من كده بكتير بس حاولت انى اضع المضمون فى هذا البوست

ادعو الله ان يرزقنى وكل معتقل صاحب كل حق فى سجون الظالمين الاخلاص والصبر

وان يوفق كبار الاخوان فى كل قراراتهم ويريهم الحق واياى ويرزقهم اتباعه ويريهم الباطل ويرزقهم اجتنابه

جهل البنات بالمدونات

انا عايزة اقولكوا أنى كل اما أقابل واحدة من أصحابى واقول بحماس يخالطه انفعال أنى عملت مدونه (وتعلو على وجهى ابتسامه عريضه).
ألاقى البنت بتقولى ايه؟؟؟ يعنى ايه مدونه؟؟؟ وافضل اشرح واشرح واشرح ولا يخلو الموقف من اتهام تلك بالتخلف والاخرى بالجهل.وهكذا دواليك ,الموضوع ده تقريبا حدث مع ما يقرب 15 بنت مفيش واحدة حست بقيمه الانجاز, الا صديقتى العزيزة جوجو اللى لقيت وجهها تهلهل وعلاه ابتسامه أعرض من أبتسامتى (مش طب بق واسنان بقى يعنى لازم نهتم بالمنطقه دى وطبعا سعه الابتسامه لها معناها عندنا ) وساعتها اخدتها بالحضن وكنت هاسجد سجده شكر فى ساحه الكليه.
اما اسم مولوتوف فاخد تقريبا معايا نفس المجهود فى تعريف المدونه وطبعا اتهمت كل من جهل بهذا المصطلح المشهور بانه مش عايش فى الدنيا (نظام كتكوا القرف مليتوا البلد) مع انى سبحان الله لسه سمعاه فى النشيد اللى حطاه فى البروفايل بالصدفه من قريب مش من زمان بس تقولوا ايه بقى مولوتوف.
اما ابى وامى فكان لكل منهما رد فعل تعكس اهتمامات كل واحد منهما
امى كان كل ريبتها هى مدى الاختلاط وتقولى بصى بقى احنا نسأل شيخ على موضوع المدونه ده(انا مش عارفه الشيخ كان هياخد نفس المجهود اللى بذل مع صديقاتى ولا لأ؟؟)
اما ابى العزيز فكان لردة فعله أبعاد اخرى,قالى لا تعليق (دى كلمتى) !!!!!وانا فاهمه طبعا ليه مفيش تعليق .لأن ابى كان وجهه نظره ان انتى يا بنتى فاضللك 5 شهور على الدراسه استحمليهم بالطول اوبالعرض وفيما معناه كده ان بلاش تضيعى وقتك فى كلام فارغ واهتمى شويه بالمذاكرة.
وانا طبعا لا اسكت(مولوتوف بقى)قولتله يابابا يعنى لازم فى الخمس شهور اللى فاضلين اكون ميته فيهم مليش اهتمامات ولا يكون ليا حاجه اعملها فور فان.
والله انا عارفة انه عنده حق وأنه خايف عليا موت السنه دى ربنا يعديها على خير بس انا مبعرفش اذاكر غير فى اخر السنه اما يكون كل ورقى حواليا ومترستأ و يكون ورايا امتحان يلح على نفوخى علشان يشتغل ويذاكر والله بحاول بس كلام بابا بيحط المشكله دى عندى ان فوكس وعملالى ازمة (وطبعا ما اصعب المواقف اللى تعملى ازمه فى نافوخى)وطبعا قايمه نايمه بفكر فيها منغير ماباخد خطوة ايجابيه فيها .
بس انا بناشد كل الزوار الاعزاء ان اللى عنده المشكله اللى عنده دى وعرف يصلحها او عرف يعمل حاجه فى نفسه يقولى يمكن اتصلح على اخر حياتى العمرية قصدى الدراسيه (ربنا يستتتتتتتتر)

بداية اكتشافى

بدايتى كانت يوم اتنين ,مش فاكرة الساعة بالظبط ,بس فاكرة التاريخ كويس كان 12/8/1985

ياااااه اليوم ده لسه معلق معايا كان اول لقائى بابى وامى واختى الكبيرة

ياااااه انا فاكرة اول كلماتى كنت بسألهم انتو مين؟؟؟

بس انا فاكرة ان كلهم حطوا ايديهم على ودنهم ومن ساعتها عرفت ان لسانى لا يلقى كلاما ولكنه يلقى مولوتوفا....

اول معرفتى بكلمه مولوتوف كنت سمعتها فى انشوده حماسيه وقلت فى عقل بالى تلاقيها نوع من اسلحه حماس الفتاكه حاجه كده زى القسام 1 و2 او نوع رشاشات, لغايه مااشتريت سلسله نقديه ساخرة لرويات مصريه للجيب وتحمل هذا الاسم المفخخ وكان مشروح فيها يعنى ايه مولوتوف وقال ايه بيطمنوا القراء ان المولوتوف بتاعهم مابينفجرش,

بس انا بقى المولوتوف بتاعى بينفجر

وفى اى لحظه واحيانا يؤدى الى خسار

معنويه طبعا لانى انبذ العنف بشده

المهم اللى لسه مش عارف يعنى ايه مولوتوف يدخل هنا علشان ميقولش انى محظرتهوش

المهم برود ان فى يوم طأت فى عقلى فكرة التدوين والحت عليا بشده بشده بشده فوق ما تتخيل لدرجه انها طيرت النوم من عينى الساعه 2 صباحا واستمرت محاولاتى لطرد هذة الفكرة الشيطانيه ولكنها انتصرت فى النهايه وقمت جبت ورقه وقلم الساعه 4 صباحا (ربنا ما يوريك)وطبعا ما رحتش الكليه النهاردة لانى اساسا مانمتش

المهم بردو (انا كل حاجه عندى مهمه ) السؤال اللى سالته لنفسى وانتى عايزة تدونى ليه؟؟؟

الاجابه ببساطه عايزة اكتب عن نفسى عن احلامى عن طموحاتى عن اهلى عن جيرانى عايزة اكتب منغير مايكون عليا قيود من حد ومنغير ماحد يقولى اعملى او ماتعمليش

وده مش معناه ان اى حد يلاقى حاجه مش مناسبه انه ما ينبهنى ليها طبعا بس يخلى باله ان فى قنابل مولوتوف بتتحدف هنا كتير فى المدونه

على العموم انا حاطه طفايه منعا لنشوب اى حريق وان شاء الله خير!!!!

كفايه كده عليا دلوقتى و هاكمل بعدين علشان ابى قرب ييجى ولو لقانى كده هايدينى واحده فى دماغى