الجمعة، فبراير 16، 2007

بدايتى مع الاخوان



فى يوم من الايام اقترح عمو جارنا على بابا انه يودينا المسجد اللى بنت عمو بتحفظ فيه القران , علشان يسربنا من البيت علشان اختنا الكبيرة كانت فى اعداديه(شهادة يا ناس) وعندما ذهبا مع جارتنا للمسجد القريب منا كنا عايزين نحفظ مع نفس الشيخ بس للاسف (ولحسن حظنا)كان الشيخ مشغول فكلفوا معلمه اخرى انها تحفظنا قران(ليقضى الله امرا كان مفعولا)فى الاول كنا زعلانين بس اما قعدنا مع هذه المعلمه حبناها قوى وبقينا نقولها يا خالتو اما قالتلنا اعتبرونى زى والدتكو وقولولى يا خالتو.

بدأنا نلتزم انا واختى فى حضور الحلقات فى هذا المسجد وكنت ساعتها فى ابتدائى و اتربيت على حاجات كتير كنت ماتربيتش عليها فى بيتنا,اتربيت على الالتزام بالصلاة ,اتربيت على انى لازم ربنا يكون راضى عنى وانى معملش حاجه تغضب ربنا منى.

انتقل هذا الالتزام من المسجد للبيت وبدأ البيت فى اتباع ما جاء به محمد صلى الله عليه وسلم ,انا مش هاقول اننا كنا كفرة بس كنا غفلانين زى ما معظم الناس غفلانه دلوقتى ويعود الفضل بعد الله سبحانه وتعالى( الذى هدانا لهذا) الى خالتو .

كانت خالتو بالنسبه لى قدوتى وكانت على طول بتقولى انى بمثابه ابنتها.

ووتبدل الحال غير الحال وعرفت قيمه الاسلام فى حياتى وزى ما بيقول الشاعر فى انشودة الاسلام غيرنى كتير

الاسلام غيرنى كتير وله فضل على كبير

خلانى اشوف اشوف النور

حسسنى بطعم الخير

وكل ما ابعد عن خالتو وارجعلها تانى الاقيها بتحمل لى نفس شعور الحب والمودة

كنت دايما بحس (اما واحد بيبقى عشمان فيك ومصدقك قوى ومؤمن بجد بقدراتك)انا على طول كنت بحس ده منها

ومن خلالى اتعرفت على اختى الكبيرة وبقت تحضر معانا وكمان اتعرفت على امى و كنا دايما نجيب سيرتها ادام بابا


كانت دايما بتقولى لكل واحد فيكو (انا وبقيه البنات)مفتاح اعرف ادخله منه

كانت دايما تقولى انا عارفه مفتاحك ياشذى

كنت أول مرة احس ان فى حد فاهمنى ومقدرنى.

عارفين الدكتور ياسر نصر كان بيقول مرة فى برنامج بتاعه اما يكون الطفل شديد الزكاء وجواة طاقه مبتستغلش فى انشطه مفيدة بسبب ان الاهل مش واخدين بالهم من طاقه ونشاط الطفل الزائد,الطاقه دى بتتحول لغضب جوة الطفل وبيحس انه مهمل وانه مش عارف اللى بيحصله ده طبيعى ولا لأ؟؟؟

وبيحس انه نفسه يصرخ ويقول انه مليان طاقه ومش عارف يوديها فين؟؟


انا بقى كنت كده وانا صغيرة كان جوايا دايما غضب ومش عارفه ايه سببه ومش عارفه اودى الطاقه اللى فيا دى فين ؟؟

كنت بزعق وبصوت, لغايه اما خالتو ربيتنى

ربيتنى بجد خلتنى اتصالح مع نفسى ,خالتنى اعرف شذى كويس ,خالتنى اعرف انى عندى قدرات رهيبه وانى مستألش بنفسى ابدا


وعلشان مطولش عليكو كان كل ما يمر عليا الوقت كنت بتعلم حاجه جديدة عن نفسى اكتر واكتر وكان حبى لخالتو بيزيد يوم عن يوم ,وكنت بحضر معاها حلقه خاصه كل اسبوع بناخد فيها فقه وسيره وبقيه الفروع


لحد ما جيه يوم استشهاد الشيخ احمد يس رحت لخالتو بعد الكليه كنت عايزة افهم ليه ليه يعملوا فى راجل عاجز كده؟؟؟

ده مكانش فيه غير عقل؟؟؟

عقل عقل يواجه بصواريخ طائرات اف 16؟؟؟!!!!!

عقل وتفكير واحد عاجز امال عقل وتفكير رجل صحيح يساوى ايه؟؟؟؟


مايساويش طبعا لو كان عاجز


اكتشفت ان العجز الحقيقى هو عجز العقل والفكر مش عجز الأعضاء



اكتشفت ان الانسان اللى مايقدرش يقول كلمه حق فى وجه الظالم هو اللى عاجز

اكتشفت ان الانسان اللى مش قادر يفكر فى حاجه غير اكله وشربه وبس هو اللى عاجز

اكتشفت ان اللى ارضه بتغتصب قدامه واخته بينتهك عرضها امامه هو اللى عاجز


الصهاينه اكيد فكروا ان موت احمد يس ممكن يفوق ناس كتير وممكن يقوم المجتمع الدولى ضدهم بس هما حسبوا الحسبه صح


لانهم عارفين ان عقل احمد يس هو اخطر من عقل الف مسلم غيره


ويومها قالتلى خالتو ان حماس تبقى من الاخوان يعنى تابعه للاخوان المسلمين فى مصر وان خالتو كمان من الاخوان المسلمين


ساعتها قولتلها يا خالتو لو الاخوان المسلمين نقصوا واحد فى فلسطين يبقى انا هازودهم واحد فى مصر

بس يارب ابقى زى احمد يس علشان المعادله تبقى صح


وبعد كده تعرفت على اخوات الكليه تقريبا فى اواخر السنه الثانيه من الكليه وكنت دايما بغير من اللى سبقونى وكنت دايما بتمنى انى كنت اتعرفت عليهم من سنه اولى كليه


بس هى دى كل حكايتى مع الاخوان

مش هاقول انى بقيت واحدة منهم لانى لسه ادامى مشوار طويل لاستحق هذا الشرف

بس فعلا دعوة الاخوان هى اقرب دعوة الى قلبى وفكرهم هو الاقرب الى فكرى


كفايه عليا انى اما اصلح فى كليتى ببقى مطمنه ان فى زيي بيصلح فى كليه تانيه

كفايه عليا ان شعارهم واحد

كفايه عليا اخلاصهم فى دعوتهم

كفايا عليا انى ببقى مطمنه انى فى مصر بجاهد لاصلاح بلدى وفى غيرى فى سوريا والعراق وفلسطين



اعتذر عن اسلوبى الركيك فى الكتابه بس لانى كتبت البوست ده من قبل وكان اطول من كده بكتير بس حاولت انى اضع المضمون فى هذا البوست


ادعو الله ان يرزقنى وكل معتقل صاحب كل حق فى سجون الظالمين الاخلاص والصبر


وان يوفق كبار الاخوان فى كل قراراتهم ويريهم الحق واياى ويرزقهم اتباعه ويريهم الباطل ويرزقهم اجتنابه

28 مصابين قصدى معلقين:

واحدة من الاخوان بتحب البلد دي يقول...

الجميل والرائع في الموضوع ان خالتو دي في القاهرة وفي اسكندرية وفي اسوان ...موجودة في مصر وفي فلسطين وفي سوريا ...كلهم نفس الفكرة ونفس العقيدة ونفس التربية

قصة معرفتك بالاخوان جميلة اوي ..وصادقة اوي..حسيت بحبك ليهم مع كل كلمة قلتيها
بالذات حبك لخالتو
تعرفي انا اينعم - الحمد لله -اتربيت في بيت اخواني لكن برضة بتجيلك فترة وتلاقي حد بيشدك اكتر للاخوان ..في خالتو معينة في حياة كل واحدة فينا بتخلينا نقرب اوي ..ونحب اوي ..ونخلص اوي للمبدا وللفكرة

بمناسبة كلمة خالتو..زمان واحنا صغيرين لما كنا نقول لاي اخت من الاخوات صحاب ماما طنط ..كانوا بيقولولنا لا اسمي خالتو هو انا مش اخت ماما وللا ايه؟؟

بجد علاقة ملقتهاش في اي مكان تاني ولا
وسط اي ناس تانية

لكل الاخوات ..اني احبكن في الله
باحمد ربنا دايما علي نعمة الاسلام اولا ونعمة الاخوان ثانيا وبادعي ربنا انه يحفظلي النعمة دي

fnan_geology يقول...

انا بس كنت فى الاول عايز اشكرك على ثقتك دى فيا
وعلى العموم

اى خدمه
معلش حطت اعلان لمدونتى من غير اذنك بس ياريت تسامحينى

وياريت لو فى حاجه تانى عايزها تقولى علطول

وهبقى اعلق على البوست ده بعدين
اوك

وسلااااااااااام

shozy85 يقول...

على فكرة انا عماله ابوظ من ناحيه وانت بتصلح من ناحيه تانيه

بس ربنا يكرمك قولى الاناشيد ممكن اغيرها منين

طب انا عايزة احط النشيد ده
http://www.lazeeez.com/movies.php?do=show_sound_file&ID=1583
هو فيديو ينفع يشتغل صوت بس ولا ايه؟؟
وغير كده انا دخلت على مدونتك لاقيتها حروف غريبه كده

متشكرة قوى على تعبك معايا وانا مستنيه ردك على البوست

shozy85 يقول...

حبيبه قلبى يالى من الاخوان
انا احبك فى الله
انا عايزة اقولك انى مرة وانا فى المترو كنت بساعد واحدة ومعاها عربيه بيبى علشان تطلعها على السلم البنت دى كانت لابسه الطرحه اللى الاخوات معروفين بيها وانا ماشيه جنبها بتقولى انا مش عارفه اسألك ازاى ؟؟؟
قلتلها اه انا منهم

سبحان الله احنا بنحس ببعض بطريقه غريييييييييبه بجد غريبه
يارب يديم بنا الحب والود ونستظل تحت عرش الرحمن الاخوات والاخوان كلهم وكل منهم احبهم فيك اللهم امييييييييييين

حسن محمود يقول...

لالالالا
مش ممكن
بقى اللى خلاكى تنضمى للاخوان مقتل الشيخ أحمد ياسين؟!!!
ياخبر أبيض
أنتى عارفة .. فكرتينى بالشيخ سيد قطب
لما كان فى امريكا ولما شافهم فرحانين عالشان حسن البنا مات قال ايه ده هموا فرحانين قوى كده ليه؟
وانضم للاخوان وبقى من أشهر الناس واثبت انه رجلا والرجال قليل لما عبد الناصر قاله غير كلامك وانا مش هاعدمك ولا أتهز
الله يرحم الشيخ أحمد ياسين وعايزك تشوفى ربنا عمل ايه فى شارون
بيعذبه فى الدنيا وان شاء الله هايعذبه فى الاخره
أديه حتى مش عارف يموت- يعنى لا طايل يعيش ولا طايل يموت- متعلق على الاجهزة

شوفى أنا حقيقى نفسى اعرف كل واحد من الاخوان انضم ليه وايه اللى جذبه للاخوان وانتى ابتديتى من غير ماقولك.

أنا مش اخوان لكن عيلتى كلها أخوان بس بقى العملية جت معاهم بالعكس
جدى اتسجن - خالى اتسجن فجم لحد عندى وقالوا كفايه بلاش تدخل فى مشاكل
بس أنا أكتر حاجه بتعجبنى فى الاخوان صمودهم الرهيب قدام 80 سنه من التشويه الحكومى والرسمى
المهم لما بسالهم مش ندامنين على السجن والعمر اللى ضيعنوا يقولوا ليه ابدا
وكنا مستعدين اكتر من كده كمان
حاجه غريبه والله

المهم ياستى عايزين نشوفك زى أحمد ياسين
ربنا يوفقك يارب

fnan_geology يقول...

وانا عمال قول هو الحاجات بتتغير ليه

براحتك مع علينا

المهم فيديو الصراحه معرفش الكود ببتاعه وغالبا بيبقى تقيل
انا هحاول اشوف النشيد ده ولو فى صوت بس ليه هعملهولك
اما حكايه بتحطى ازى
بسيطه

بصى

عارف فى شكل الصفح نفسها فى التمبيليت

هتلاقى على الجنب فى الحاجات اللى انتى حاطها زى الساعه والروابط والصوره وكده

اوك
هتختارى النشيد ودوسى

edit

وبعدين هتلاقى كود النشيد محطوط

عايز تحطى نشيد جديد

تسيبى الكود زى ماهو
وتمسحى اللى ما بين""

اللى هو الامبيديد بتاع النشيد وتحطى بتاع النشيد الجديد وتسيفى وخلاص

اه حكايه الامبيديد دى انا قولتلك قبل كده تقريبا بتعجيبيها ازى وبعتلك صوره فيها ازى تجيبى

اوك
حاولى كده انتى ولو معرفتيش

ان شاء الله هعملهوك انا

وسلااااااااااااام

fnan_geology يقول...

اه صح
بخصوص مدونتى

ممكن تدوسى كليك يمين
وتختارى
encoding
وتختارى عربى
وان شاء الله الكلام هيتعدل

وسلااااااااام

shozy85 يقول...

يا استاذ حسن انا مش عارفه اقولك اد ايه كلامك دة فرحنى قوى
بجد والله
انا اول مرة اسمع موضوع سيد قطب يارب ابقى زيهم او حتى ربعهم

بجد بجد انا مبسوطه جدا بزيارتك واديعيلى اكون عند ظن ربى بى واشرف الاسلام والرسول والاخوان كلهم

shozy85 يقول...

جزاك الله خيرا كثيرا على تعبك
انا مسحت ودخلت الانشودة كذا مرة يعنى عرفت اللعبه ازاى
وحاول تدورلى على النشيد ده انا بحبه قوى

omar مشروع بطل يقول...

رائع
وهكذا جت رجلك وانتى لسة صغيرة يا عينى

انا بقى جت رجلى وانا كبير شوية وانا فى ثانوى بس مش عن طريق خالتو .. لا عن طريق واحد صابى عرفنى بالاستاذ اللى هحفظ معاه قرآن

عارفة؟
كنت عارف انها مؤامرة علشان يجيبوا رجلى بس انا كنت موافق وسايبهم يتأمروا عليا

محمد فهمي يقول...

وقت إلتزامي تقريبا كان أيام استشهاد ياسين إيضا كنت في السنة الاولى في الكلية في جامعة بني سويف وكنت أعرف ناس إخوان كتير كانوا معايا في المدرسة اللي هيه بردوا كانت تابعه للإخوان قبل ما تأممها الحكومه إخةاتي البنات كانوا إخوان ووالدي كان قريبا منهم لكني كنت أكرههم بشدة مش عارف ليه قد يكون لأني بشوفهم أفضل مني في الاخلاق والتعامل وكده صديق ليا كان أحدهم كان أسمه سيف كنت أرى فيه مشروع بطل أسطوري في بلد كل الناس فيها خايفه كان نشيط جدا وثوري جدا ومحبوب جدا كنت أعرفهم نأيام املدرسة معرفه سطحية وبدأت صداقتنا تطور بشكل سريع ومليء يالأحداث كنت قد أفتقت معه أني لن أدخل الإخوان إلا بعدما أقتنع تماما بفكرهم وعملهم ,وكنت ساعتها قد خرجت من تجربة عاطفية تميل للمراهقة أكثر من الصدق وكان هو قد دخل في تجربة أنتهت بزواجه الآن ,كنا نجلس مع بعض نتكلم عن الإخوان والحب والسياسة والأفكار وغيرها ,وأنا أحيانا أكتب الشعر ,فكان يشعني هو وكل الاخوة في الكلية وكانوا سعداء بشعري جدا كنت ألقي الشعر في معظم مهراجانات الإخوان ولم أكن واحد منهم كنت حتى لازلت أدخن وعندما أستشهد الشيخ ياسين أنقلبت الجامعة عندنا وخرج الآلاف في المظاهرات ومن بعده استشهاد الرنتيسي والذي كتبت فيه شعر ألقي بعد استشهاده بساعات في اليوم الثاني وفي غمةر هذه الاحداث المتلاحقة أعتقل سيف كان قبلها يجلس معي حتى الثانية صباحا وبعدما عاد إلى بيته بنصف ساعة جاءه زوار الفجر وعلى العكس مما كنت أتوقعه من نفسي كان قرار إعتقاله هو قرار دخولي الإخوان أرسلت له رساله في محبسه في البندر قبل أن يرحل أخبره بأني قد عزمت أمري وقررت ولغاية دلوقتي مش عارف أكان قراري صادقا أم لا وبكرة الأيام تبين

صوت عصفورة يقول...

ايه يا بنتي الجمال ده .... مولوتوف ايه بس... بالمناسبة ... تعرفي ان الاخوان بالذات فعلا ممكن تلاقيهم مولوتوف في اوقات كتير...انما لما يتكلموا عن الاخوان...يحكوا عن مشاعر الاخوة ...بيبقوا مش بس عصافير...بيبقوا احلى و اجمل و ارق من العصافير...
و بمناسبة موضوع المؤامرة اللي كلنا ضحيتها...قصدي فزنا فيها...زي ما كان في خالتو خلتك تعرفي نفسك و تحبي نفسك و تحبيها.....في ناس كتير محتاجة خالتو ... خليكي خالتو ياخالتو و حببي الناس في الدعوة و ساعديهم يفهموا.... و اهم حاجة ... جددي النية يا جميل

عبدو بن خلدون يقول...

أستاذة شذى...
آسف لأنني تأخرت قليلا...
لكن علي كل حال لك كل التحية والفخر، وبمناسبة الحاجات "اللي بتبوظ" في المدونة مش مشكلة، يقولون: "يُغفر للرائد ما لا يغفر للتابع"، ويكفيك شرف السبق والشجاعة.
مبروووووك!

"ده كده اللي كنت عايز أقولهولك من يومين"
تعليقي علي هذه التدوينة:
أولا: أنا معجب "طحينة" بهذه القصة، فمن ناحية تعتبر هذه من الأشياء غير المعروفة تماما، وفي ذات الوقت مفيدة للغاية، ومن ناحية أخرى لا يشعر بحلاوتها كل الناس.
ثانيا: ما فعلته "خلتو" معك، هي أمانة يجب أن تصل إلي أحد يوما ما، قد تختلف الصورة وقد يتباين الشكل، ولكن في النهاية ستصل، وأنا أثق في ذلك؛ السبب واضح جدا من كلماتك ونبرتك.

- - - - -

عبدو بن خلدون

- - - - -

لأننا نتقن الصمت
...
حمّلونا وزر النوايا !!

غادة السمّان

- - - - -


ما أحوج الشرقيين أجمعين إلى حكماء لا يبالون
بغوغاء العلماء المرائين الأغبياء، والرؤساء القساة الجهلاء

عبد الرحمن الكواكبي

محمود سعيد يقول...

يا بختها خالتو أهو كله فى ميزان حسناتها

وأسلوبك مش وحش ولا حاجة زى ما انت فاكرة

shozy85 يقول...

عمر مشروع بطل انا بردو كنت عارفه انها ؤامرة وكنت وموافقه عليها بمزاجى
طب ليه منألش ان اى حد كان سبب فى الاحنا فيه دلوقتى كان ربنا بعتهولنى علشان يدلنا على الطريق وبلاش حكاية المؤمرات دى خالص لحسن بتحسسنى انى مضحوك عليا
------------------------------

الاستاذ محمد فهمى اهلا وسهلا بك والله كلامك جميل قوى
وان شاء الله الوعود والقرار اللى اخدته يكون صادق ولله وحده لا شريك له

shozy85 يقول...

عصفورتى اللى بتسعدنى بزقزقتنا فى وسط اصوات المولوتوف
ربنا يخليكى ليا ان شاء الله الواحد يبقى خالتو حلوة بس اما يخلص الكليه الرائعه اللى كباه على وجهه علشان يتفرغ للدعوة

shozy85 يقول...

بن خالدون اهلا ومرحبا بك
يارب تكون المدونه عجبتك بجد مش مجامله
ربنا يكرمك ويعزك انا مستعده لاصلاح اى اخطاء املائيه او نحويه اللى متاكده ان المدونه مليئه بيها
بس تقول ايه اصل ثقافتى يابانى


---------------------------


الاخ محمود ,فعلا انا بقعد افكر فى خالتو والثواب اللى ان شاء الله هايكون فى ميزان حسانتها
ماشاء الله عليها
اللهم ارزقها الاخلاص والثبات اللهم امين

ياء يقول...

شذى الروابط اللى على يمين المدونه مش شغاله

وعلى فكره مدونك حلوه

بنت من الاخوان يقول...

حبيبتي شذى
مدونتك حلوه جدا
والبوست ده رائع
ربنا يزيدالخالتوهات
ويثبتك يا حبيبتي لحد ماتبقي في يوم خالتو

shozy85 يقول...

ياء انا عدلت اللينكات شكرا على التنبيه

بنت من الاخوان شكرا على مجاملتك وربنا يسمع منك

Modern Pharaoh يقول...

Haram Aleeky kida! Leeh bas dakhla ma3 elnas el hatdaya3 masr deeh!


Rabina Yishfeehom! The Cancer of my country! Kathom Siteen Alf Nila...Muslim brotherhood wants egypt to go back another 100 years..They are backwards people who interpet islam the wrong way!

You people probably beat your women and want them to all wear Niquab, and you probably HATE ANYONE WHO IS NOT MUSLIM and you Believe in Killing Innocents in Israel and USA, you are no better than the Israeli goverment!

You are the DANGER TO EGYPT and the people who are bringing down ISLAM! ALLAH YIL3ANKO!!

You make peacful Egyptian Muslims like me live in fear for his country! Tfoooooo

بلال يقول...

بصي ماترديش على الواد اللي معلق في الآخر هما نفس الكلمتين بيلزقهم في مدونات الإخوان سيبيه يهوهو لوحده >>

shozy85 يقول...

بلال انا كل اللى كنت هاعمله كنت هاقوله اعرفهم الاول قبل ما تحكم عليهم
وادام هو بيقولهم فى كل مدونه فاكيد حد اداهمله قبل كده
شكرا على التنبيه وخطوة عزيزة

أحمد السباعـي يقول...

أختنا الفاضلة : أولا ً مبرووك على المدونة وقصة جميلة وفقك الله في طريق دعوتك ، ثانيا ً ملاحظة ياريت تفرقي بين المدونات والمواقع على الصفحة الرئيسية
وجزاك الله خيرا ً

من القلب يقول...

عزيزتى شذى
انا عارفه انى متاخره اوى عن ايام كتابت الوست
بس ده لانى لسه عارفه موضوع المدونات ده قريب وبالاخص مدونتك هي عندى المفضله وحاليا عماله افصفص فيها حته حته عشان كلامك بجد عاجبنى


اما عن موضوعك بجد انا كمان نفسى كل واحد من الاخوان يحكى عن طريقه دخوله الاسلام

بجد انا بحمد ربنا كتير على النعمه دى ومن قبلها طبعا نعمت الاسلام

انا كمان كان سبب دخواى الاخوان خالتو برده
وزى ما قالولك خالتو دى فى القاهره والاسكندريه واسوان وبنى سويف

بجد لزلت ادعو لها فى كل صلاه
لزلت ان توقفت او تعثرت فى الحياه اذهب لها فتمدنى بالطاقه وتبث فى الحياه من جديد
جزاها الله عنى كل الخير

اتعرفت عليها وانا فى ثانوى بس دخلت الخوان وانا فى اولى جامعه
لما دخلت اولى جامعه الحمد لله كنت مصاحبه بنات ملتزمات بس مكنتش اعرف انهم اخوات
فكنت بعمل معاهم بس من غير معرف مسميات
ولبرأتى كنت بحكى كل حاجه فى البيت بابا طبعا فهم ولانه مش اخوان خاف عليا
مش عارفه خاف من ايه المهم انه عنفنى جامد وطلب منى انى مشوفش الناس دى تانى
رحت لخالتو وانا محتاره جدا طب الناس دى لو كويسه بابا بيبعدنى عنهم ليه
وقبل ماحكى سألتنى عن الناس اللى معايا من الاخوات وربطت وعرفت انهم خالتو تانيه وتالته ومدام خالتو الاولنيه دلتنى على الطريق الصح بيقى اكيد كمان هما صح

والحمد لله عرفتهم وبحاول انفع الاسلام وانشر دعوة ربنا زيهم

عاشقه الاقصى يقول...

مش عارفه اقول ايه؟
بعد الكلام الرائع ده
هذه هيه دعوه الاخوان التى دخلت قلوبنا وعمرنا ماهنسيبها ولا هنتركها
لاننا نهلنا من بحرها نفسى بجد اتعرف عليكى

مع محبتى
عاشقه الاقصى

انا مسلمه يقول...

عارفة يا شذى انا واخواتى مرة كنا قاعدين وكل واحدة بتحكى هيا بقت من الاخوات ازاى وامتى حست بجد انها عايزة تعمل حاجة لبلد دى خلاصنا كلام كل واحد فينا بتذكرة للمواقف دى جواه اتغير وافتكرعهدة لربنا اللى مضايق حس انة ارتاح واللى تعبان حس ان ربنا هيهون بجد تذكرنا لعهدنا مع الله بيفرق كتير بيخلى الى ناسى يفتكر واللى كسل يرجع من تانى

غير معرف يقول...

كيف يكون لي ان اكون موضوعية حين تكون مدونتك الجميلة الموضوع ...عرفتك منتمية للحب والحياةمنحازةللشمس والعدالة والحرية00والفرح والمساواة..واريدك ان تبقي لننتمي جميعا الى دولة الانسانية ولنكن صناعا للحرية...ارجو ان تقبليني اختا لك في الله....نسيبة nosaiba bent elekwan