الخميس، فبراير ٢٢، ٢٠٠٧

زماااااااااااااااااااااان وان صغير



زمان وانا صغير
كنت بحلم ابقى كبييييير ابقى كبير
تعب القلب واتحير من الدنيا ومن المشاوير
الحلم كان برئ مفروش بالورود
والقلب كان جرئ مليان بالوعود
ولما كبرت قلت ياريت ماكنت حلمت ولا تمنين
قلت ياريتنى فضلت صغير زى زمان

ألاغنيه دى كنت بغنيها وانا صغيرة علشان كنت بحلم ساعتها انى اكبر ودلوقتى بغنيها علشان ارجع صغيرة تانى(سبحان الله)محدش عنده طريقه؟؟

وانا فى الثانويه العامه كنت بغنى الاغنيه دى من قهرتى لعلى انكمش وارجع صغيرة تانى,فقد كانت ايام امتحانات الثانويه العامه بقضيها مذاكرة الصبح وعياط بالليل , ولله وحده الفضل فى ادخالى مصح الامراض اقصد طب الاسنان (سبحانه قادر على فعل المعجزات) فلم اكن من ذاك النوع من البشر الذى ينكب على الكتاب او يصم صما(لازلت)

فمن صغرى كنت من العيال اللى بتفهم من اول مرة وتنسى من اول وهله والحمد لله.


وانا صغييرة (وما ادراك ما انا)حلمت تقريبا انى اشتغل كل الشغلانات اللى فى الدنيا,

حلمت مثلا انى صحفيه او مصورة (والله لغايه دلوقتى انا لسه بحلم) واقابل عليه القوم واتاثر بهم واثر فيهم بأسألتى العبقريه طبعا.
وحلمت انى رحت فلسطين وانى بصور كل المشاهد التى تدمى لها القلوب علشان افوق الناس واصحيهم على واقعنا المر.

وحلمت انى من المجاهدين فى الشيشان وفى فلسطين وانى افجر نفسى فى وسط اكبر عدد من الاعداء علشان اكون مثل الشهداء اطير بجناحين فى الجنه واسكن تحت عرش الرحمن ولا اتحاسب ولا حاجه.

وحلمت انى اكون كمسريه علشان احاول انظم الناس فى الاتوبيسات وحلمت انى اكون سمكريه ومكنيكيه .
وحلمت انى اكون سواقة عربيه لورى (علشان بحب السفر قوى)وافضل سايقه طول الليل وانام كام ساعة كده بالنهار.

وحلمت انى اكون بياعه فى سوبر ماركت او فى محل ملابس وكنت حتى بفكرازاى هاقنع الزبونه انها تشترى منى.

ودايما فى كل احلامى دى كنت بفكر فى لحظه قبض المرتب (محدش يفهمنى غلط بالعكس الفلوس دى بالنسبه ليا وسيله توصلنى لغرضى وعمرى مانظرتلها بانها شئ له اهميه علشان كده ايدايا سايبه قوى) المهم انى كنت بحس بمتعه ألاكل من فلوس حلال وأنى ممكن بمجهودى وبعرقى انى اكسب ,انا مش عارفه ليه اللحظه دى معلقه معايا؟؟

وطبعا لم تخلو احلامى هذة من انى اكون طبيبه بس عمرى ما تخيلت نفسى طبيبه اسنان ,.

وحلمت انى بطله من ابطال الاولومبيات او من ابطال التجديف (شوفته فى فيلم قبل كده( وانى حصلت على جوائز عالميه ترفع راس مصر

وحلمت انى ممثله ,بمثل ادوار هادفه ترتقى بمستوى الاعمال الدراميه والسينمائيه

وحلمت انى مخترعه كبيرة او مكتشفه سر عظيم من اسرار الكون علشان ابرهن على عظمه الخالق

وحلمت انى جاسوسه حاجه كده زى رافت الهجان وتخيلت قد ايه هو كان تعبان اما بيشتموا فى بلده وهو موافقهم وساكت مع انه من جواه كان هايفرقع وكان نفسه يفجر فيهم مولولتوف(من بتوعى)

متهيألى كفايه عليكوا كده مع انى لسه كتبتش كل احلامى ,ربنى ما يحرمنى منها

بس فاضل حلم واحد , والحلم ده انا مؤمنه بيه قوى ومشتاقه ليه قوى قوى قوى
ولو انا مقدرتش احققه اكيد هاييجى بعدى حد هايحلم بيه وهايؤمن بيه وهايقدر يحققه


وصفه ببساطه انى

بحلم لو عاد الاسلام


بحلم لو عاد الاسلام يحكم من تاني


ويخلي صحاري الاوطان خضرا واماني


بحلم لو نسمة ايمان هزت اركاني


يجي الفجر ويضوي الليل حسنه الرباني


بحلم ان العدل يسود عدل عمر وجنوده أسود



تحمي العدل وعنه تزود ما تخاف الجاني


حلمنا وإتجمعنا صفوف كفي في كفك نبقى ألوف


نموت جوانا الخوف ونعود من تاني


بحلم إن جيوشنا كتير وسيف الدين عاد للتحرير


والأقصى ينادي يا امير طهر أركاني




الحلم اللى القلب ناداه شعب بيهتف باسم الله


ويخلي إمامه وهداه نهج القرآن


بحلم لو عاد الاسلام يحكم من تاني


ويخلي صحاري الاوطان خضرا واماني

25 مصابين قصدى معلقين:

fnan_geology يقول...
أزال المؤلف هذا التعليق.
حسن محمود يقول...

شوفى ياستى
طالما أنتى حاطيتى لنفسك هدف
يبقى لازم تعملى المستحيل عالشان توصلى ليه
بس اللى انتى حاطاه ده حلم كبير قوى مايجيش فى يوم وليله -على رأى الست أم كلثوم - انما ده عايز اجيال.
فانتى بقى تحطى هدف صغير كويس على مرمى البصر مش فى اخر العمر
تتفوقى مثلا فى الدراسه
تبقى معيده
تبقى دكتوره كويسه ومشهورة

يالا خير
ربنا ينولك كل اللى نفسك فيه
يارب

shozy85 يقول...

عندك حق يا فنان جيلوجى

shozy85 يقول...

استاذ حسن والله انا كل ما احط حلم على مرمى البصر اتشجع واحس انى اده وأدوود
بس اما اقرب من النهايه بخاف ووبفقد الثقه فى نفسى وفى الاخر بفشل
يعنى كان نفسى انى اكون معيدة فى الكليه بس على مين انا دلوقتى فى بالعب فى الوقت الضايع

بس ان شاء الله حاطه بجد انى اكون شاطرة جدا فى مجالى مش لازم فى المذاكرة يعنى لانى بكرهها عمى , اعتقد انها كمان بتبادلنى نفس الشعور

AbdElRaHmaN يقول...

طول ما احنا عايشين .. هنفضل نحقق في احلامنا لو كنا ادها
لو مكناش ادها
يبقى الاحلام هتفضل طول عمرنا أحلام
لكن بالنسبة لبحلم لو عاد الاسلام
فده يستحيل يفضل حلم
لأن كتير من المخلصين ده حلمهم
وبس
سلام

صوت عصفورة يقول...

ايه الجمال ده يا بنتي... كأنك بتتكلمي عني بالضبط ... بس انا مسكت معظم الوزارات ... انتي وصلتي للوزارة و لا ايه؟؟؟
للاسف رغم يقيني بتفاهة احلمي و عدم واقعيتها بالمرة الا اني لا استطيع ان اتخلى عنها مهما حاولت ... اشعر كانها جزء لا يتجزء مني...
اما الاهداف اللي بجد .. ده موضوع تاني ... و الاصل انها تكون هي دي اللي عايشة جوانا و بتحركنا...
حلمك الكبير...انا متأكده انه هيتحقق لما يزيد اللي مؤمنين بيه و يشتغلوا له بجد

shozy85 يقول...

يارب ان الاسلام يعود ما يفضلش حلم اكتر من كده شكرا يا عبد الرحمن على زيارتى خطوة عزيزة

shozy85 يقول...

ايه ده يا عصفورة بقى انا اللى حلمت اكون سمكريه افكر انى ابقى وزيرة



حبيبه قلبى انا حلمت على طول بالملكيه احم اقصد الجمهوريه

حلمت انى رئيسه الجمهوريه وانى عينت افاضل الشعب وزراء
احسن واحد فى مجاله هاعينه وزير كده يعنى

قال وزيرة قال؟؟؟

سناالإسلام يقول...

حلم رائع وسيتحقق بإذن الله ولكن يارب أن نكون سبب فى قرب تحقيقه لا فى بعده...تقبل الله منكم وأشعر ياأختى كأنى أعرفك

خطــاب يقول...

بحلم لو عاد الاسلام يحكم

مللنا الاحلام

أمل غنيم يقول...

ياسلااااااااااااام
أنا حلمت بكل الشغلانات الممكنة وأنا فى اعدادى كنت مصممة انى أكون رئيسة جمهورية وبعدين عرفت انه شرعااا لايجوز قلت أبقى وزيرة اقتصاد بسبب حالنا المايل .....
وتوالت الأحلام ......
لكن كان هناك عدة مشاريع أكثرها صدقا أن أكون أديبة أو صحفية ...
__________
والآن ... مشروعى الأجدى أن أستطيع ايصال الاسلام بصورته الراائعة لأكبر قدر ممكن من الناس ( ولعل دراستى الأكاديمية تفيدنى فى ذلك )
أحلم أن أستطيع ايصال العلم الشرعى _ لطلبتى المستقبلين _ كما يستحق أن يدرس هذا العلم
______________
ذكرتينى بأشيااااء كثيرة ...
شكرااا لك على اعطائى هذه المساحة للحلم ...
وحلم أن يعود الاسلام ليحكم الأرض هو يقين عندى ..... فقط ننتظر الوقت......
تحيااااااااتى لك.......

غير معرف يقول...

تصدقى انك جيتى على الجرح بالضبط ..سبحان الله
الاغنية دى انا مش كنت بس باغنيها ..انا كنت مؤمنة بيها بشكل غريب .كل كلمة منها منقوشة فى خيالى .كل كلمة كتبت فى سطر لسه عايش فيا .الفكرة ان نفس فترة الطفولة دى بتفكرنى بالحياة البرزخية اللى كنت عايشاها فى علم الغيب .كنت تقريبا مش فاهمة حاجة وعلى فطرتى بكل ما تعنيه كلمة الفطرة .لما كبرت عرفت طعم المر والألم وطعنات الظلم ووخزات الندم . كانت كل ما دموعى تنساب من عيناى ,احسها بتمزق فى قلبى وتعدب روحى . يا بنتى فى الأخر خدت قرارى وربنا الحمد لله ثبتنى عليه , ان لم اكن اضافة لتلك الحياة المقفرة ,فلن اكون الاضافة عليها . لو ما عرفتش اغير من نفسى ومن الآخرين على قد ما يقدرنى ربنا ,انا باسأل الله بصدق انه ينهى حياتى ويرحمنى بالموت . ممكن يبقى الكلام غريب شوية ,بس على قد ما كان زمن الطفولة جميل على قد ما أحلامه كانت بريئة وصافية وصادقة ,على قد الحب اللى كنت باحس بيه من أهلى ومن اساتدتى , كان الالم والمرارة الفظيعة بعد ماكبرت ,عشان كده الاغنية دى من اروع ما سمعت من كلمات ,والحان .عشان كده انا رديت على البلوج ! وان شاء الله المرة الجاية -آه منها - هاقولك على حلمى ,حلم رسمته بنفسى وعايشه عشانه الصراحة :-)) .
سناء

واحدة من الاخوان بتحب البلد دي يقول...

باحلم
وباحلم
وباحلم
وباحلم



وان شاء الله احلامي حاحققها ...

shozy85 يقول...

سنا الاسلام انا مبسوطه انك زورتينى فى مدونتى المتواضعه
-----------------------------------
خطاب
بدايه التغير يبدا بحلم
يعنى مش عايزينا كمان نحلم حرااااااااااااااااام
----------------------------------

امل
الظاهر ان البنات كلها كده عندها خيال برح حبتين

على فكرة انا سمعت ان
ممكن المراة تمسك دوله ولكن ليس الخلافه
يعنى فى امل يا امل

---------------------------

سناء كلامك حلو قوى وقوى قوى
انا مستنيه حلمك اللى عايشه عشانه اوعى تقوليلى الجواز

هو انتى سناء بتاعه سياسه؟؟

fnan_geology يقول...
أزال المؤلف هذا التعليق.
mohamed يقول...

أوقات الواحد بيحس بحجات فى اللبد دى .. ونفسة يحققها .. وسعات بيفشل .. بس سعات أكتر يكون سبب الفشل هى البلد نفسها .. الحكومة ... انا عارف انى بتكلم فى حجات مش تبع الموضوع .. بس الموضوع فعلا رائع وأثر فيا ..
الواحد فعلا بيتخيل لو ان الاسلام رجع تانى .. واننا بنطبق الشريعة الاسلامية صح ... ومكناش نغير المادة الثانية ونخليها دولة علمانية ..

ينهااااار هو الكرسى الواحد هيخذة معاة وهو رايح القبر ..

سبحان الله

غير معرف يقول...

طيب انا هقول حلمى واوفى بكلمتى -احم احم -كالعادة طبعا ,اللى عارفنى مجرب ! :-))
انا يا ستى كنت قاعدة مرة مع بابا واخويا واختى -اكبر منى - وبعدين كنا فى الكلام كده جبنا سيرة احلام كل واحد .اخويا واختى قالوا احلامهم وجا الدور عليا ,لقيت نفسى بقول كلام الله اعلم جبته منين .قلت : انا نفسى يكون عندى مستشفيات كتير عشان الناس العيانة اللى مرمية فى الشارع -كنت باتعاطف اوى مع الافلام العربى خصوصا فيلم نجاة الصغيرة الى فيه اغنية معايا ريال - ونفسى يكون عندى مدارس كويسة كتيييرة اوى عشان الناس تعرف تعلم اولادها الدين والعلم ,ونفسى يكون عندى نادى العب فيه مع صحابى من غير ما حد يعاكسنا ,ونفسى افتح بنك وادى فلوس للناس عشان ما تسرقش ,ونفسى اعمل ملاجئ لولاد الشوارع عشان ما يبقوش محرومين .وحاجات من كده كتيير. ابويا وقتها ماردش عليا ..بس اخواتى بقه نزلوا تريقة ,وانتى كده عاوزة تحكمى البلد مش بس تصلحيها! وماشى يا ست الوزيرة ! ,وكلام كده مش لطيف :).على فكرة هم بما انهم اكبر منى ,فدايما فى عقدة "الابلوية" بينى وبينهم او بالادق -احساس الاستادية على هدا السلفوت الصغير المدعو سناء :) طبعا هدا لم يستمر .

المهم كبرت شوية وبقى ده فعلا حلم حياتى .مش عاوزه البلد دى تضيع .مش عاوز الناس دى تضيع .من الافلام التعيسة والمحورية اللى رسمت فى نفسى كان فيلم بتاع فريد شوقى -مش فاكرة اسمه -لما ابنه يبقى مدمن وهو يدوخ عليه وفى الاخر يلاقى ابنه بيهرب منه لحاد ما ينتحر .انا كل ما اشوف اللقطات دى باعيط .كان عندى احساس جارف وطاغى وقاهر بالشفقة على الناس الضايعة واللى مالهومش بيت ولا أهل يربوهم ..الخ .دايما وابدا كان فيلم الاميرة الصغيرة وبعض الافلام العربى القديمة بتستلزم علبة كلينكس جنبى وانا باتفرج !هئ افتكرت !

المهم ده كله اسس لحلمى : انا فعلا مانفعش لحاجة فى حياتى غير مجال العمل العام .وبعدين اكتشفت انى غاوية تجريد وتعقيد وتاصيل واستئصال وتشبيك وتجدير كل ما يمر على حياتى من مواقف وافكار واشخاص وافلام ..الخ .حنى كانوا بيقولولى يا معقدة ! ومن ثم اكتشفت ان الحاجات اللى فاتت دى كلها جزء من منظومة كاملة فكرية وثقافية سياسية واقتصادية خلتنى باصرار لا اعرف سببه - عاوزه ادخل سياسة .اللى عاوز يصلح ,لازم يحارب الظلم والتهميش والتغييب الى اتعرضت لهم حضارتنا ومنظومتنا الفكرية والثقافية .فاتجه اهتمامى الى الفكر لاسلامى ,حيث الحلم الابدى لى انى اطوره ليستوعب منجزات الغرب وتحديات اليوم .عشان اوصل سنين وقرون من التخلف والتهميش ,بالفترة الدهبية اللى سبقتهم .الكلام ده فى ناس كتير عملت شغل فيه ,بس لسه فى شغل كتيييير ولسه فى مشوار طويل على مانبنى حضارتنا تانى .انا نفسى بس اكون حلقة فى التطور ده ,حلقة بس مش طمع هو :).
لكن بينى وبينكو نفسى ربنا يقدرنى على اكتر من كده كمان .
اعمل ايه بس فى النفس البشرية اللى تسكننى !
ومن ناحية تانية فى احلام فرعية كتير ,يعنى الشقاوة دى فى دمى , نفسى اكمل مشروع الشقاوة ,والفن برضه فى دمى ,عاوزه انمى نفسى فى مجالات الرسم والموسيقى . ثم وهو الاهم ,بحب السفر والاستكشاف جدا وبموت فى المغامرات الغير متوقعة حيث لا احد مسئول عنى سوى نفسى! .يعنى لو حكيتلك على المواقف العجب اللى عملتها فى اهلى وانا صغيرة مش هتصدقى ان انا سناء !
يللا المهم ان فى حاجات عرفت فعلا احط نفسى على اول طريقها ,وفى حاجات لسه مستنية على الرف :) يللا ربنا معاكى ويا رب مااكونش طولت عليكوا
سناء

غير معرف يقول...

اه نسيت حاجة
جميل جدا اننا نحلم بعودة الاسلام وبتدريس العلم الشرعى كما ينبغى ..بس فى شروط مبداية للمرحلة دى .فى حاجات ضرورية لابد من انجازها قبل ثم مع المجالات دى .محتاجين من الأصل نبنى اسس لاحياء الحضارة الاسلامية ,محتاجين تجديد للفقه الاسلامى والعلم الشرعى باللى يناسب العصر ده ,كحتاجين مراجعات نقدية صادقة وعادلة للفكر الاسلامى فى كل مجالاته من العمارة والاجتماع لحاد السياسة والقتصاد .محتاجين من الاخر حركة احياء وتجديد مفصلية زى حركة الامام البنا كده , الراجل ده عرف يختصر ما يعادل فى رايى مسافة 500 سنة من الزمن الجميل -صدر الاسلام وازدهار الحضارة -ليومه . لكن لسه باقى كتير .عاوزين قفزات للتجديد والاحياء ومراجعات نقدية موضوعية عشان نتاكد من اللى احنا عاوزينه بالضبط .ثم بعدها تبدا مراحل تنشئة جيل العزة والحرية .
اللى عنده تعلق يتفضل ,طبعا بعد ادن البيج بوس هنا:)
سناء

fnan_geology يقول...
أزال المؤلف هذا التعليق.
Human يقول...

جميلة جدا الكلمات الأخيرة دي جنان بجد
رائعة
.................
حلوه ميكانيكي دي واضح ان انتي بتتفرجي على افلام كتير هههههه
أما عن حلم عودة الإسلام ..ليس مستحيلا ولكن صعبا ويحتاج الى جهد

محمد العنانى يقول...

بعد السلام مين مبيحلمش الحلم هو الدافع الحقيقى ورار بدايه العمل فهو الشكل المراد من اى عمل هو الحلم وله قوه دافعه جباره تتجه مباشره الى الهدف لتحقيقه
مدونتك رائعه مزيد من النجاح والتالق والاحلام

aboziad_alfateh يقول...

السلام عليكم
مش عيب الواحد يبقى كبير
انا حتى لو رجعت صغير
اتمنى ان اكون كبيرا وشابا
لاخدم دينى واعمل لنصرته
لو كل واحد تمنى ان يرجع صغيرا فمن يخدم هذا الدين ومن ينصر هذا الدين ومن يعمل لاجله
اظن انه الاخوان تربوا على تحمل المسؤليه
وليس الهروب منها
نسال الله ان يستعملنا ولا يستبدلنا
والله ان هذا لشرف كبير لنا
ان نجاهد فى سبيل رفعة ديننا ونصرة شريعتنا
اين الجهاد يا اخوان
اين العزيمه
اين القتال والثبات
العمل لاجل دين الله شرف كبير
لا يناله اى شخص
فاعملوا قدر استطاعتكم
اخوكم الفاتح ابوزياد

aboziad_alfateh يقول...

سلام عليككم
اختى الغاليه لى رجاء صغير عندك
بلاش منها الاغانى دى اللى فيها موسيقى
انا عارف كويس حكمها
بس بلاش منها
مالهاش لازمه من اساسه
شوفى اى شىء تانى بدل الاغنيه دى
وجزاك الله خيرا
اخوكم الفاتح ابوزياد

shozy85 يقول...

سناء انا عرفتك من الذال بتاعتك اللى بتكتيبها دال
والله بجد انا حبيتك اكتر واكتر
كل ما بقعد معاكى عمرى ما بشبع منك
انا حلمت انى عندى فلوس كتيرة قوى قوى قوى
ومش عارفه هاتصدقينى لو قلتلك انى كتبت فى ورقه كل المشاريع الاصلاحيه اللى نفسى احققها لو كان عندى فلوس حلمت بكل الاحلام اللى حلمتيهى وكل حاجه حلوة ممكن تساعد وتنهض بالبلد الغرقانه دى

حبيبتى سناء انا بحبك قوى

shozy85 يقول...

هيومان ومحمد العنانى وابو زياد خطوة عزيزةى فى ارض احلام بس ابقوا ادخلوا برجليكوا اليمين

لرجاء الاخ ابو زياد ان شاء الله هاغير الاغنيه مع تغير الموضوع