الأربعاء، مارس ١٤، ٢٠٠٧

نفسى اللى هى انا


نفسى بفتح النون وتسكين الفاء وكسر الياء طبعا مش زى نفسى بتاعه الاستاذ مجدى.

المهم ايه اللى عايزة اقوله عن نفسى ,حاجات كتير والله بس فى نفس الوقت مش عارفة اقول ايه؟؟

نفسى انا بحبك والله بحبك وانتى كمان بتحبينى ؟؟؟

انا عايزة اقولك انى نفسى (زى بتاعه الاستاذ مجدى) انى اصاحبك يا نفسى (بتاعتى)

اللى عايزة اقوله انى لسه معرفكيش قوى ,عايزة اقولك انى نفسى افهمك,بتعملى حاجات ساعات بحبها فيكى قوى واقول والله انت بت جدعة قوى

وساعات بتعملى حركات قرعه قوى قوى قوى مفيش بنت ملتزمة بتعملها

اية رايك نتصاحب ؟؟

ايه رايك نخرج مع بعض ؟؟

نتمشى على النيل ؟؟

احكيلك وتحكيلى ؟؟

معرفش الجديد هاييجى منين بس اهو تفتحيلى قلبك


ليه ساعات اما اقولك تعالى نعمل الحاجه الفلانيه ,دى فيها خير كتير ماترضيش ؟؟

وافضل اتخانق معاكى ونزعل من بعض

ليه كل طاعه بعملها بتكونى عملها غصب عنك مع انها الفلاح والخير


مش احنا اتفقنا اننا نبقى اصحاب وانا مرضاش ان صحبتى تخش النار او تعمل حاجه تأذيها



عارفة يا نفسى انا بحب فيكى ايه؟؟


انك انت

انك على طبيعتك مابتتكلفيش فى تعاملاتك ولا مع اصحابك ولا مع اى حد


عايزة تتعاملى مع حد بتحبيه بجد و لو مش عايزة مابتتعامليش معاه اصلا

عمرك ما بتتكلفى فى تعاملاتك ولا عمرك ضحكتى ضحكه مش من قلبك ولا عمرك قلتى كل حب لو واحدة مش حاسه بيها

واما بتكونى مضايقة من حد بتقوليله على طول


عارفة ايه كمان بحبه فيكى

انك بتحبى الحق قوى وبتحاول بقدر الامكان تنصرى المظلوم

وانك بتتخنقى من الظالم او حتى اللى معندهوش ذمه


وبحب جرئتك فى الحق وبحب اتقانك فى العمل الا المذاكرة انتى مخستعه فيها قوى


كفاية عليكى كده يمكن يقولوا علينا مغرورين


وبلاش بقى اقولك الحاجات اللى مش عجابانى فيكى علشان مفضحكيش

خليكى كده مستورة

وعملا بالحديث اللى بيقول قال رسول الله صلى الله عليه وسلم "كل امتى معافاة الاالمجاهرين"وبقيه الحديث

انا مش هاقول البلاوى اللى بتعمليها علشان ربنا يغفرلى ويغفرلك

بس هاقول على كام حاجه كدة مش مطمنانى


محسسانى انك بتتغيرى بس للاسف للاسوأ


اتعلمتى يا صديقتى استعمال الصابونة

لأ طبعا مش لغسل الوجه بل لزحلقه الناس اللى بيضايقوكى


انا مش عاجبنى كده ,اتعودت منك انك تسامحى وتغفر او حتى تواجهى مش تزحقلى وتنفضى

انت ممكن تعملى كده مع الناس اللى ماتعرفهمش او مايعرفوكيش بس ماتعودت منك كده مع حد كان ليه الفضل عليكى فى يوم من الاوقات


او حتى حد ربنا بيحبه

انا عارفة ان موضوع الصابونة دى اريحلك بس انت كده هاتخسرى الناس من حواليكى واحدة تلو الاخرى بسبب مواضيع احسبها تافهه

وماتستاهلش


حبيبتى انا عايزاكى ترجعى تانى تحبى الناس اللى اتديهم الصابونة علشان ربنا يحبك


هاقولك على حاجه اخيرة وفعلا انا صادقة فيها


انا كل مابعرفك اكتر بحبك اكتر


سلام بقى قبل ما نتخانق وساعتها هاديكى الصابونة.



الرسمة اللى فوق دى انا اللى رسماها وبحبها قوى

انا عارفة انها مش واضحه قوى

بس هى بتفكرنى بالجنة

22 مصابين قصدى معلقين:

غير معرف يقول...

انا كمان نفسي(بتاعة الاستاذ مجدي)احاسب نفسي (اللي هيا بتاعتك) بجد نفسي اقف وقفة كنت بحاول علي قد مقدر مسيبش حد ف محيطي الا واصاحبة واحاول معاه بس انا مش زي الاول لازم اقف الوقة دي انا كمان......قبل مااندم

shozy85 يقول...

عارف يا اخ مصراوى
اول مرة اخد بالى ان اللى كتيته دة يعتبر وقفه مع النفس

بيقعدوا يقولولى فى التربوى وقفه مع النفس وقفه مع النفس

وقفه فين يعنى ؟؟
على المحطة؟؟
مانا طول النهار انا وهى نائر ونئير مابنرحمش بعض

اكتشفت انى المفروض مقفش معاها كتير علشان انا تقريبا قربت اروح السرايا الصفرة

صوت عصفورة يقول...

حبيبتي الجميلة ...الحمد لله انك عرفتي ان هي دي الوقفة مع النفس اللي بيقولولك عنها ... و بالنسبة لموضوع السرايا الصفرا اطمني خالص احنا موجودين ... و هنظبط الموضوع دي...
حبيبتي عايزة اقولك انك مش بتتكلمي عنك بس..عن نفسك بس ...انتي بتتكلمي عن معظمنا اللي عايش الخناقة دي على طول..عايزين نطلع فوق .. و بنلاقينا بننزل تحت في استسلام غير عادي للجاذبية الأرضية ...احنا الأصل فينا الخير...اتخانقي مع نفسك و موتيها لو فكرت في حاجة غير الصح ... و لو فكرت في طريق غير الجنة ..ادخلي معاها في تحدي...وانتي قدها و قدود ...
مش عايزة اطول عليكي بس افتكرت مشكلة كنا بنناقشها مع الدكاترة في القسم عن الفروق بين الأنا و الذات و الكينونة و القصة دي...ده يعني بمناسبة أنا و نفسي.. و اشعرفك ان نفسك هي اللي وحشة مش انتي مش يمكنم نفسك حلوة و انتي اللي وحشة...كفاية كده لحسن لما بكلم في علم النفس اللي هو تخصصي ..بخرف..و تقريبا هنروح السرايا الصفرا سوا...
على فكرة وحشتيني جدا ...و ادعيلي معاكي جدا

محمد العنانى يقول...

بعد التحيه
توضيح هام السرايا الصفره قفلوها وبنا مكنها ومش المجانين يعنى سرحوهم فمفيش مكان فى السرايا ومفيش سرايا اصلا
وطبعن احنا مش هنسيب مصر ولا بنخاف ولا بنتهدد ولا اى حاجه من الى هما فكرين انهم بيعملوها علشان هما اغبيا جدا وعمر ما واحد فيهم بص لنفسو او حاسب نفسو
علشان كدى احنا ربنا انا شاء الله هيدينا وهيديهم
مع الاختلاف بين كل واحد وطبعن الكل فاهم
يا ريت يكون فى بوست ليكى كل يوم
وجزاك الله خير

shozy85 يقول...

عصفورتى الجميله
انا بحب الكلام بتاع علم النفس قوى علشان بيعرفنى على نفسى فبفهمها وبفهم احتياجاتها ورغابتها صح
على فكرة دى من اهتمامات الاساسيه موضوع علم النفس ده
ايه رأيك فى مشروع

البحث عن الانا
والله مانا عارفة انا بخرف بقول ايه؟؟

-----------------------------------
الاخ محمد العنانى
ليه نظرية المؤامرة كدة داخلة فى كل حاجه فى حياتنا
انا بهزر
بس انا كاتبة بوست عن الأنا تقولى هما عايزين يخرجونا
انا عارفة انهم ليهم علاقة فى الموضوع وهو انهم كرهونا فى الانا والانت والهو وكل الضمائر
بس بردو عايزين نستحقرهم شوية ومانديهمش حيز كبير من تفكيرنا وكلامنا
لانى اعتقد انهم ما يستهلوش حتى اهتزازات الاحبال الصوتية بتاعة اى انسان محترم


وبالنسبة لكل يوم بوست ؟؟
حضرتك ولا مؤاخذة طماع قوى
انا بتعب نفسيا لغاية اما اركز على النت علشان اكتب حاجة
معظم الوقت مقضياة فسح على المدونات الصديقة

همسة قلم يقول...

وأنا كمان نفسي أوي:)
لدرجة اني نزلت جبت لنفسي بوكيه ورد أحمر ملفوف في ورق أحمر مربوط بشريط أحمر ووقفت أدام مراية الاسانسير وقلت لها خدي يانفسي ياحبيبتي وتعالى نتصالح ونبقى اصحاب ومن يومها وانا سمن على عسل:)
مقالة ووقفة جميلة مع النفس أخية وان كنا جميعا نحتاج تلك الوقفة بين الفينة والاخرى لنرعف أين نضع أقدامنا وأي طريق نسلك
حياكِ المولى

أختك أسماء

AbdElRaHmaN يقول...

انا مش نفسي خالص
بحاول ابعد عنها
مش عارف بجد اتواصل معاها كويس
نفسي بتتغالس عليا
ربنا يسترها معايا من نفسي

shozy85 يقول...

اسماء والله عسل
انا ان شاء الله هابقى اعملها بس فى حاجه تستاهل شوية
يعنى تكون زعلة كبيرة


عبد الرحمن
مع انى حسه انك نفسك قوى
انا بعرف الناس اللى نفسها من كونهم متفوقين وواثقين فى نفسهم
وانا حسه انك الاتنين يا عبد الرحمن
المهم ربنا يكرمك وخليك نفسك اكتر واكتر

عبدو بن خلدون يقول...

نفسي نفسي تعرف إن نفسي نفسي تكون زي ما نفسي

!نفسي تفهموني

shozy85 يقول...

على فكرة يا عبدو اهم حاجة تكون نفسك فاهمه نفسك ومايهمش نفسك ان محدش فاهمها

AbdElRaHmaN يقول...

يا مس شوزي انتي مش فاهماني
بس انا فعلا مش انا
و الله بتكلم بجد
انا ممكن اكون مقتنع بحاجه
لكن مش هطبقها
لأن نفسي مش عاوزه كده
وده بيعمل صراع بيني وبين نفسي
وفي اغلب الوقت للاسف
نفسي بتنتصر
وربنا يخلليكي على ثقتك دي
اهه الكلمتين دول يخللو الواحد يبقى نفسه بجد :D
salam

أبو نضال يقول...

عقبال ما كل الناس تقف مع نفسها...خاطرة جميلة

اصرار أمل يقول...

زى ماقالت آية .. كأنك تتكلمين عنا ؛ لا عن نفسك فقط ...
كنت أتحدث قريبا عن أنى أفتقد نفسى التى كانت ؛ تلك التى غيرتها الأيام ؛؛
أحس أنى تغيرت كثيرااا الآن ؛ ولكنى الآن فى طريقى لاعادة ماكنت عليه ..... أعاننى الله ...
بما ان محدش علق على الصورة الجميلة اللى انت راسماها ... فهى جميلة .. اللى واضح منها غير الشجر _ الأرائك _
جمعنا الله فى الجنة ؛ وأظلنا بظله يوم لاظل الا ظله .....

shozy85 يقول...

عبد الرحمن بجد انت نفسك بجد وانا مش ببالغ او ثقة زيادة ولا حاجة
ماشء الله عليك ربنا يحميك لشبابك
على فكرة موضوع الصراعات مع النفس دة كان فى ذروته عندى وانا فى ثانوية عامه وفى اواخر مراحل الكلية
والحمد لله بيقل كل ما ببكر ساعات بحس انى بننضج
وان شاء الله يقل عندك كمان بس حاول ماتخليش الحوار مع نفسك على اساس الندية خليكو اصدقاء وهى اللى تقولك على الحاجة الحلوة
ربنا يكرمك

جزاكم الله خيرا ابا نضال
مش انت بردو اخو عمرو طموح؟؟:)


امل بجد عجبتك الرسمة
انا عارفة انها مش باينه بس فى الحقيقه حلوة قوى
ربنا يكرمك ويعزك
ويارب ترجعى زى الاول فى الحاجات الحلوة بس

AbdElRaHmaN يقول...

http://al-ghareeb.blogspot.com/2007/03/blog-post_1866.html

-------------
لنضع من هنا التصاميم التي نعبر بها عن رفضنا للتعديلات الدستورية
شاركونا

Sanaa El-Banna يقول...

يا بنتى كام مرة قلتلك براحة شوية
انتى مصرة تخلينى أعلق مع إنى مش بحب الكلام اللى ماينفعش يتكتب .
عموما
:-)))
هاقولك على موضوع صغير
قبل ماانساه وارجع للتنمية
أختك يا بنتى من كتر ما اتكلمت مع نفسها
وصلت لمرحلة من الصمت المطبق
استمرت كام سنة
وكنت تقريبا مش بوقف مناقشة ومناهدة
عشان بس أعرف أنا عاوزة إيه
.
يا رب تكونى فاهمة حاجة
موضوع جميل
وليا تحفظ
هقولهولك لما نشوف بعض

عبدالمنعم محمود يقول...

الاخت الكريمة صاحبة اللسان المولوتوف تهتهم احدي الجرائد الامريكية حاليا برصد ظاهرة مدونات الاخوان واتصلت بي زميلة تعمل بهذه الجريدة وهي مصرية مقيمة مؤقتا بامريكا تتطلب التواصل معكم حيث ستتصل بكي لتتعرف علي سبب انشئك المدونة وهي اهتمت بمدونتك لكونك تكتبين اشياء شخصية
ارجو ان ترسلي لي بيانتك
اسمك وبريدك الالكتروني ورقم تليفونك لارساله لها
اخوكم
عبدالمنعم محمود
abdoumonem@gmail.com
انتظر ردك سريعا

shozy85 يقول...

ياسناء بجد انى احبك فى الله ونفسى اقعد اتكلم معاكى لحد اما نزهق من بعض
ان شاء الله اشوفك قريب على خير ان
وابقى اقوليلى اللى انتى عايزاه


جزاكم الله خيرا يا اخ عبد المنعم على اهتمامكم

حسن محمود يقول...

بسم الله الرحمن الرحيم
{
وَنَفْسٍ وَمَا سَوَّاهَا. فَأَلْهَمَهَا فُجُورَهَا وَتَقْوَاهَا. قَدْ أَفْلَحَ مَن زَكَّاهَا. وَقَدْ خَابَ مَن دَسَّاهَا
}
سورة الشمس الايات 7 - 8 - 9 -10

ملقيتش كلام أقدر أرد بيه عليكى غير القران الكريم


ودمتى بألف خير
سلام

shozy85 يقول...

استاذ حسن محمود كفاية الرد دة عليا قوى

جزاكم الله خيرا

يلا مش مهم يقول...

ليه كدة
يا ست شوزي
ومنقتيش غير التدوينة اللي قلبت عليا المجتمع الاخواني الداخلي وتكتبي مثلها لتناول موضوع يرضي عنه المجتمع لااخواني الداخلي يعني بتكشفيني وبتعلمي عليا بس بطريقة محترف
ماشي
علي العموم انا مبسوط جدا لو كنتي عملتي اللي انا ظنيته
واذا كان ظني غلط وانت مش بتردي علي ما كتبته فانا برضه مبسوط من ان تدوينتي اصبحت ملهمة للمدونين
ويللا مش مهم

shozy85 يقول...

انا مش عارفة يا استاذ مجدى حضرتك هاتشوف التعليق ده ولا لا؟؟

بس ان بعض الظن اثم

انا مش هاقول ان التدوينة ليا عليها تحفظ
بس بجد بتعبر عن شباب كتير نفسه يحب ويتحب

بس فعلا فعلا مدونة حضرتك ملهمة لناس كتير سواء بالسلب او بالايجاب
ولغاية دلوقتى هى ملهمة ليا بالايجاب