we were soldiers

فيلم بطولة ميل جيبسون

شوفته امبارح

دايما الافلام اللى بتحكى عن ملحمة بشرية زى الفيلم ده بتأثر فيا قوى

وبقوم من ادامها وانا عندى شحنة مشاعر غريبة باخد كذا يوم علشان اهضمها

الفيلم بيحكى عن موقعة من مواقع حرب الامريكان والفيتناميين سنة 1965

بيحكى عن القائد هال , قائد فرقة الخيالة الجوية السابعة

الفيلم فى الاول عرض حياة الحنود الشخصية قبل ما يدخلوا فى الحرب

وان ازاى كل جندى من الجنود سايب مراته وعياله ورايح يحارب علشان بلده

فى رسايل كتير وصلتنى من الفيلم

منهم

ان بنت القائد هال الصغيرة بتسال باباها يعنى اية حرب

الراجل اتلخبط ومعرفش يرد عليها وقالها هى حاجة وحشة ومابنحبش نعملها لكن مضطرين نعملها

لما شعب من الشعوب يحاول يقتل شعب تانى , لازم الشعب التانى يدافع عن نفسه بالحرب

انا الصراحة معرفش حيثيات الحرب الامريكية الفيتنامية دى

لكن اللى اعرفه ان الامريكان هما اللى راحوا فيتنام علشان يحاربوهم

اللى اعرفه انهم اعدوا عدتهم وراحولهم فى ارضهم علشان يقتلوهم يبقى مين المعتدى ومين المعتدى عليه

المهم

فى مشهد بردو فى الكنيسة والقائد هال بيصلى وبيدعى انهم ينتصروا ويرجعوا سالمين لبلادهم واهلهم

وكان بيقول ان اكيد العدو بيدعى بردو بنفس الدعوة فيارب ما تتقبلش منه دعوته الوثنية ( كانت مكتوبة كده فى الترجمة)

وبعد ما الحرب بدأت كانوا بيجيبوا لقطات متفرقة عن الامريكان واعدائهم

وان كل واحد منهم كان بيعمل اللى عليه واكتر

اكتر حاجة عجبتنى انه ماكنش بيسفههم زى ما افلام كتيرة كانت بسفه من الاخر

الصراحة انا كنت متعاطفة مع الفيتناميين اكتر اللى مات منهم اكتر من 1500 جندى

وبطبيعة الحال تعاطفت مع الجنود الامريكيين ابطال الفيلم

وطبعا كانوا جايبين لقطات مقرفة عن الموتى والجرحى تخليك تكره نفسك

وفى لقطة كانت عن ان الطيران الامريكى فى غارة من غاراته قصف موقع امريكى وان النار مسكت فى واحد امريكى وزميله قعد يهديه وجه يشيله من رجله اللحم اتشال من على العظم

وجابوا لقطات تانية عن ان الجنود دول ابطال وعندهم شجاعة وايثار وحاجات كده

معرفش الحاجات دى ممكن تحصل عند ناس ربنا قال عنهم ولتجدنهم احرص الناس على حياة

بس فى نفس الوقت بقول ان فى منهم ناس عندها اخلاق فعلا

مش بقولكوا مشاعر متضادة

حاسة انى قربت اتجنن

فى لقطة بردو عجبتنى

ان صحفى كان فى ارض المعركة كان بيقول ان الناس اللى اتكتب عليهم يشوفوا الحرب هايفضلوا يشوفوها طول عمرهم

حتى ساعة اما يطفوا النور هايفضلوا يسمعوا اصوات الصراخ فى الظلمة

انا مش عارفة دى حقيقة ولا لا؟؟

بس هما يمكن محتاجين دافع اقوى للحرب علشان ضميرهم ما يأنبهمش

وفى لقطة تانية كان فى جندى من الفيتناميين كان هايقتل القائد هال بس القائد هال قتله فى اخر لحظة

وهما بيفتشوهم بعد المعركة لقوا مع الجندى ده مذكرة شخصية وفيها صورة لخطيبته

ففى نهاية الفيلم جابوا خطيبته دى وهى بتقرأ مذكرات خطيبها

حسيت من اللقطة دى ان فى امريكين كانوا رافضين اصلا الحرب

طيب السؤال اللى ممكن يتكرر عن الحرب الفيتنامية والحرب فى العراق

ادام فى ناس ضد الحرب وملهمش هدف ولا غاية من الحرب , يبقى بيحاربوا ليييييييييييه؟؟؟