الأحد، مارس 30، 2008

مؤتمر وعيد ميلاد

فعاليتين اتنتين حضرتهم من يوم الجمعة لغاية النهاردة

كل واحدة فيهم كان ليها اثر فى حياتى اللى بقت اشبه بروتين الحكومة

اولا المؤتمر اللى كنت على موعد مع صديقتى اننا نروحه بعد الصلاة
وقد كان

يالهوااااااااااااااااااى اية الزحمة دى
والندوات غريبة
اول ما حضرت حضرت ندوة الاخوات هما اللى منظمنها
ندوة عن التاثير الغربى على الشباب العربى
والصراحة كان فى من الضيف من قال كلام موزون ويستاهل نسمعله
وفى منهم من قال اسمحولى فى اللفظ تهجيص
بس كان بيتكلم بردو ومحدش يقدر يمنعه

كنت قاعدة جنب اخت والظاهر انها من المسؤلين عن هذه الندوة
بقولها ليه كده؟؟
ليه اية؟؟
ليه الاخوات مش هما اللى بيتكلموا ويعبروا عن رأيهم للناس
قالتلى علشان دى ندوة والمفروض اننا بنجيب ضيوف لهم نفس اراءنا لتبرزها

واكتشفت ان فى فعالية اخرى اسمها المنتدى اللى فيها ممكن الطالبات او الطلاب انفسهم هما اللى يتكلموا
والصراحة انى كنت حبة كده قوى
احنا جايين نسمع الناس اراءنا بنفسنا
الناس عايزة تسمعنا احنا وتعرف الاخوات دول بيفكروا ازاى

والحقيقة بجد ان الدكتورة نهى سلامة قامت بمشاركة فى الاخر وقالت كلام موزون جدا عمرلى الطاسة حقيقى
الست دى انا بحبها بجد

المهم
خرجنا
وروحنا لقاعة يقام فيها ندوة عن البلطجة فى الجامعات المصرية
والله الطلاب بيحكوا حاجات عجب العجاب
ودبسونى فى واحدة قعدت قال اية اترجملها
بعد ما خلصت كنت حاسة اننا حمارة كبيرة
فين ايام زمان
والله ده انا كنت ببدع
يالا
هابقى اخد دورات تحدث
مع انى جامدة والله
بس الظاهر انى كنت مرتبكة ومحتاجة احفظ كام مصطلح كده

بس

وبعد كده
صحبتى كانت عزمانى على حفلة عيد ميلاد بداية للى يعرفها
واللى ما يعرفهاش
هى فريق تنمية بشرية
معظم انشطته وندواته تتركز فى المعادى
المهم
رحت انا ومحمد
وانبسطنا جدا جدا جدا
ولو ربنا قدر ممكن ابقى انزلكوا فيدوهات لبعض الفقرات
يالا سلام

8 مصابين قصدى معلقين:

mohamed يقول...

بجد يعني عندك فديو الفقرات ..

أنا عايز أول اغنية اللي غناها علي الجيتار

والأسكتش الأخير بتاع العفريت السوداني دا ..سألت اللي كانوا منظمين الحفلة اظاهر محدش منهم سجل حاجة
..
هكون شاكر جداً لو نزلتيهم او رفعتيهم على الفور شير

عمر المصرى يقول...

السلام عليكم
أختى الكريمة مش مهم مين اللى اتكلم المهم استفادتوا حاجة وبعدين ما هو ده عيب الأخوات دايما مش بيحبوا يتكلموا غير فى الفاضية معذرة يعنى بس طبع ستات عموما
تقبلى تحياتى

غير معرف يقول...

التهجيص
برجاء الرجوع إلى التعليق على تدوينة د/الجعلي...."إيفون"

غير معرف يقول...

معلهش
التعليق المشار إليه هو تعليق الدكتورة شذى نفسها على موضوع د/جعلي
https://www.blogger.com/comment.g?blogID=6560810959277530290&postID=7518414879798437034

شذى مولوتوف يقول...

الاخ محمد
معلش متاسفة جدا انى اخيب املك
انا عندى بس بعض الفقرات مش كلها
هاحاول ارفعها على يوتيوب واضعها فى البانر

الاخ عمر المصرى
مش كل الاخوات ومش كل الستات بيتكلموا فى الفاضية
ارجو ان حضرتك تسحب الكلمة دى


الغير معرف
الصراحة انا مش فاهمة حضرتك تقصد اية؟؟
ارجو ان حضرتك يكون عندك الشجاعة انك تظهر باسمك وتبين انت عايز تقول اية؟؟

عبدالرحمن فارس يقول...

مستنيني الفيديو

تحياتي
و
محبتي

وضـّاح يقول...

أعانك الله وتقبل منك صالح الأعمال

رئـــــيسـة حزب الأحلام يقول...

السلام عليكم
ادعوكى لزيارة جزيرة الاحلام