كراكيبى .... شكرا

قعدت فى اوضتى , بحاول اوضبها

طلعت كل ادراج مكتبى اللى امى بتتحايل عليا من اسابيع علشان اروقها وارمي الكراكيب اللى فيها

اديت النهاردة اجازة لنفسى من الشغل قلت اقعد بقى فى البيت وانتخ شوية

وحشتنى الانتخة

طلعت الادراج

وطلعت الكراكيب

وطلعت معاها ذكرياتها

بكل عواطفها واحاسيسى ساعة وقوعها

كمية ورق رهيبة

استغربت من احتفاظى بكل الكراكيب دى

لكن بعد شوية عرفت ليه انا ما برميش الحاجات دى

كل حاجة من الحاجات دى بتمثل فترة من حياتى

كأن كل لحظة متسجلة عندى بحاجة

شئ

او حتى قصاصة ورق

وزى ما طول عمرى ما بعرفش انجز فى التوضيب

قعدت افتح ورقة ورقة

واقرا حتى الرسائل الصغيرة اللى الناس كانوا بيكتبهالى

وكان مع كل ورقة بتتفتح

كان ذكرى من الذكريات بتتفتح

وكانت دموع بتنزل منى

وساعات عياط بصوت

افتكرت كل حاجة

كل حاجة كان ليها علاقة بشئ فى ايدى

افتكرت

المؤتمرين اللى حضرتهم فى نقابة الاطباء وافتكرت معاهم احساس بالانتماء قوى قوى للاسلام واحساسى بعزتى لانى مسلمة

وافتكرت قد اية كنت فرحانة وفخورةبانى بنت من بنات الاخوان المسلمين وحسيت قد اية انا كان ليا لازمة فى الحياة

افتكرت

دورة التثقيف السياسى اللى خدتها فى سناتر المنيل

افتكرت قد اية كنت حاسة ان ليا فكر يحترم وانى اخيرا وجدت المجال اللى اقدر ابذل فيه

افتكرت الاعدادت اللى ادوهالنا علشان حضور المؤتمر وقد اية الناس كانت خايفة من طريقة اداء الطلاب فى المؤتمر

افتكرت

الدكتور جمال حشمت وكلامه الرائع وفكره الاروع

افتكرت

الدكتور محمد حبيب وخفة دمه

افتكرت

الدكتور عبد المنعم ابو الفتوح اللى علمنى اداب الاختلاف مع الاخر و طريقة الانفتاح على المجتمع

افتكرت

كل الاخوات اللى كانوا بيحضروا معايا الدورات دى

وافتكرت

الاوقات الحلوة اللى قضيتها معاهم

قلبت كمان فى الورق

لقيت الاوراد اللى كنت بعلم فيها

صحيح مكنتش بكملها لحد الاخر

بس حسيت انى كنت بعمل حاجة فى دنيتى

لقيت كمان جداول المذاكرة اللى كنت بعملها لنفسى

لقيت كل المذكرات اللى كنت بكتبها فى مليون نوتة

اكتب فى اول صفحتين وبعدين اجيب نوتة جديدة اكتب فيها

لقيت اهدافى واحلامى اللى كنت دايما بكتبها فى ورق

وبصيتلها باستغراب

صحيح انا دى

انا اللى كاتبة كل الكلام الجامد ده

وزى العادة

رفضت انى ارمى قشة من الكراكيب

وانى احتفظ بكل حاجة مكتوب فيها اى حاجة

علشان افضل فاكرة اى حاجة حلوة او حتى مرة حصلتلى

الانسان اية منا غير شوية ذكريات وتجارب بيتعلم منها

لو نسى ذكرياته وتجاربه يبقى ضاع

وضاعت منه فرصته انه يتعلم ويتقدم فى حياته

قررت حاجات

وصممت على حاجات

قررت انى اعمل مستقبلى بايدى وانى انا اللى اجرى وراء العمل والتكليف

وماستناش حد ييجى يقولى تعالى اعملى ادام انت فاضية

وصممت انى افضل شذى بتاعة زمان اللى طول عمرها اما كانت بتصمم على حاجة بتعملها

ودايما قلبها مليان امل فى بكرة

وتفاؤل

وقررت انى امشى نفسى بنفسى وانى انا اللى اخلق الظروف

لانى لو ظبطت نفسى على ظروف الناس مش هلاقى وقت اعمل حاجة لشذى

شكرا كراكيبى رجعتيلى احلى ذكريات عمرى