الأحد، أبريل 13، 2008

رجل من الرجال


المكان : قسم التركيبات المتحركة


الزمان: يوم 10 /4


الاحداث :





انا : اية الراجل ده شكله كده تبعهم


اية: طب ما تيالا تيجى نكلمه


انا : هانقوله اية يعنى؟؟ انت معانا ولا علينا؟؟








اية: هو فى حد بيشتغل لحضرتك؟؟


د.عصام : اييوة الدكتور احمد هايخدلى مقاس


انا : هو حضرتك من الناس بتوع المحاكمات العسكرية؟؟؟


بص لنفسه وقال : هو انا باين عليا قوى كده وضحك





انا : وحضرتك مين ؟؟


د.عصام: انا عصام عبد المحسن


ورخمت طبعا علشان ما افوتش الفرصة دى علشان حديث صحفى مع حد من الناس الجامدة دى



د.عصام : اسمى عصام عبد المحسن استاذ دكتور فى الكيمياء الحيوية , خريج طب القصر العينى لسنة 1980

عضو منتخب فى نقابة الاطباء القاهرة

مسؤول اللجنة العلمية والرحلات من سنة 92 لحد دلوقتى من ساعة اما وقفوا الانتخابات



بس كده



انا : ممكن اسأل اسئلة



اتفضلى



اية اكتر حاجة حضرتك نفسك توصلها للناس اللى بره ونفسك توصلهم



د.عصام: نفسى اقعد معاهم



اية : دكتور لاية الاخوان ما شاركوش فى اضراب 6 ابريل؟؟



د.عصام: بصوا بقى هو اى قرار بيتاخد فى الاخوان هو مش قرار فردى وبيكون ناتج عن مشورة واخد اراء الناس ودراسة للحدث , لكن الاحداث اللى بتبقى مش متنظمة كويس احنا ما بنشاركش فيها

يعنى ما حدش سالنا نعمل ولا ما نعملش , لازم الاحداث اللى زى دى تكون متنظمة اكتر من كده



ويرن موبايل الدكتور



اية: انا مش مقتنعة قوى

انا : انا فرحت اما الاخوان ما شاركوش , الدنيا كانت هاتولع ونحتاس بعد كده وهايتقال ان الاخوان هما اللى غرقونا

طيب فكرى معايا كده وتخيلى ان لو الاضراب ده كان نجخ وسقطت الحكومة وسقط اللى اكبر من الحكومة , تفتكرى مين ممكن يمسك البلد



اية: 70 مليون واحد مافيهومش كادر

انا : اه مفيهومش لانه ما اتعملش كوادر يا اية , بس ممكن باباكى

اية: قالتلى وليه لأ , او ممكن الدكتور او اى حد من الاخوان

انا: ياسلام ومين قالك ان بقية المعارضة هاتسيب الاخوان يمسكوا

اية: خلاص نعمل انتخابات



عدنا



انا: بص بقى يا دكتور احنا مش عايزين اجابات سياسية بتاعة الاخوان وعايزين اجابات صريحة وواضحة



د.عصام: بصى بقى المحليات او الاضرات المشاركة او عدم المشاركة كل القرارت دى بيبقى ليها مسؤولين ( او هكذا فهمت) بيدرسوا الحدث وبينزلوا للقواعد يشوفوا اراء الناس , ما يمكن الدعوة لماركة الاخوان المقصود انهم يشاركوا وبعد كده يستخدموه كحجة لاى قرار تعسفى ضد الاخوان



انا : متى كان التزام حضرتك وانضمامك لجماعة الاخوان

د.عصام: من زمان من ايام الكلية تقريبا من سنة اولى , ايام ما كنا كلنا جماعة اسلامية واحدة بدون اسماء معينة

وبعد كده اتقسمنا



اية: كل جماعة ليها قيادتها ومسؤلينها , وكل جماعة فيها الحلو والوحش والقيادات دول بشر وعندهم اهواء , ازاى بقى انتوا واثقين فى قيادتكوا قوى كده؟؟



د.عصام : الحاجة المميزة فى جماعة الاخوان انها جماة تربوية , والتربية واخده شق كبير جدا فى شغلنا

الشبل من وهو صغير يرتاد المساجد ويحفظ القران وياخد معاه الاخلاق وياخد معاه الاخلاص والعمل لله والثقة فى قيادته , المعانى دى بتتربى معاه من وهو صغير



لهذا الصفة المميزة عندنا هى الثقة العمياء

والحمد لله القرارات اللى الاخوان بتاخدها مش قرار رجل واحد , بياخدوا ارارء الناس وبيرجعوا للقواعد وبيسالو الاخوان اللى فى المحافظات



انا: مش قوى كده يعنى يا دكتور , يعنى انا من القازعد وما بيوصليش حاجة



د.عصام : (يضحك) لأ لأ , انا عارف المدونات بتاعتكوا انتوا المخربين , لكن الوضع غير كده

يعنى انا مثلا مش حاجة جامدة فى الاخوان وكانوا بيرجعولنا فى كل القرارات وكانوا بيشاوروا الحى بتاعنا وبيشاوروا الجامعة عندنا



يعنى احنا مثلا واحنا جايين المستشفى او رايحين فى اى حتة بنلاقىالناس بتوع الجماعات الاخرى كل واحد قاعد منغلق على نفسه وخايف من اللى جنبه , خايف يقول كلمة غلط , خايف يطلع تبع الامن ولا حاجة , بيبقزا شاكين فى بعضهم وماحدش بيثق فى التانى



احنا بقى فى ثقة عمياء بينا وفى روح اخوة جامدة جدا بيننا



انا : معنى الالتزام فى الدين عامة ومعنى الانضمام لجماعة الاخوان المسلمين خاصة عند حضرتك؟؟



د.عصام : الحمد لله الواحد من عيلة ملتزمة بالعبادات , بنصلى ونصوم , اما النقلة الجديدة اللى لمسناها فى جماعة الاخوان هى ان مفيش دولة اسلامية ممكن تقوم بدون خلافة , يعنى ما ينفعش نكون من غير راس , يعنى الواحد لو هايعمل حفلة هايرتبلها , اللى عايز يعمل عزومة بيحضرلها وبيوزع المهام على الناس انت هاتجيب كذا وانت هاتعمل كذا , فما بالك بدولة

وما بالك بان اعداءها متربصين بيها



انا : توقعات حضرتك فى الجلسة القادمة ( للاسف مالحقتش انزل البوست قبل الجلسة , وحسبنا الله ونعم الوكيل)



د.عصام: طبعا الناس دى كلها ناس محترمة والمفروض ان كهم يطلعوا براءة ويحاكم اللى بيحاكمهم لكن دى حسابات الدولة اللى عايزة تقصى الاخوان

هو الارجح انهم هايصدروا الاحكام النهائية , لان كل اسباب التاجيل خلصت خلاص

زى الانتخابات المحلية وزى مجلس الشورى



انا: طيب توقعات حضرتك فى الاحكام

د.عصام : هم دايما بيبقى فى نسب 70% هياخدوا براءة و15% هياخدوا 5 سنسن و 15% هياخدوا 3 سننين

(للاسف محدش كان متوقع ان الظلم هايوصل للدرجة دى)



واحنا الحمد لله راضيين بقضاء ربنا



انا: هو حضرتك اتسجنت كام مرة قبل كده؟؟

د.عصام: دى او مرة ومعانا مجموعة كبيرة دى اول مرة بالنسبلهم , ولم نكن نتوقع الاعتقالات دى

بعد ما وصلنا لمنصب مهم فى الجامعة

يعنى انا مدير مكتب تطوير التعليم فى مجلس الكلية , يعنى مسؤول عن تطوير العملية التعليمة والامتحانات, يعنى هما مستأمنينى على 1500 طلب فى كل دفعة وبعد كده يقولولى انت عايز تخرب البلد وبتخالف الدستور



اية: طيب اية اكتر حاجة حضرتك استفدتها فى الحبسة دى

د.عصام: مهى دى المرة الوحيدة

انا: يعنى دكتور عصام قبل وبعد الحبسة

د.عصام: قبل الحبسة كنت مرح جدا



بصوا بقى " ليست النائحة كالمستنكرة"

اصبحنا احنا النائحة

يعنى احنا قبل كده كنا نسمع عن السجون والمعتقلين والتعذيب اللى فى السجون

وكنت انا اكتر واحد له علاقة بالمعتقلين

لانى كنت مسؤول عن زيارة الاطباء المعتقلين (او هكذا فهمت) ياما رحت لاخوان لينا فى ليمان طرة اللى احنا فيه ده وكنا دايما بنروح نشوفهم وهما محبوسين وبيتحاكموا وكنا بنشفق عليهم ونشوف بعض الالاماللى بيحسوا بيها ونروحلهم قدام النيابة او فى المحكمة

لكن المرة دى مختلفة

المرة دى تبادلنا المقاعد وبقينا احنا اللى جوة

الحمد لله عنيت معاناة شديدة



انا: فى الاول بس ولا لغاية دلوقتى يا دكتور المعاناة



د.عصام:والله المعاناة لسه قائمة , دلوقتى لما تتخطب بنتى ومبقاش موجود ودى اول بنت لينا واو فرحة لينا

لما ولادى ينجحوا وما يلاقونيش جنبهم

لما زوجتى تمرض وانا مبقاش معاها

لما احرم من السفر ومن الخروج ومن المؤتمرات واحنا كنا شامة فى جبين مصر , كنا بنروح ندرس فى اى بلد وكنا بنشرف البلد كلها

لما نسافر عمرة , يعنى كنا نشاط وحركة وبنتميز فى كل حاجة بنعملها



اية: هو حضرتك محبوس من امتى؟؟

د.عصام: من سنة و4 شهور

يوم 14-12-2006

يعنى بعد عيد ميلادى على طول كان 7 -12

وانا كنت بحضر للسفر يوم 15 واعتقلت يوم 14

وحتى كل الاحراز اللى واخدينها كتب فى المكتبات ومش بتاعتى كمان

واحد اسمه من اعلام النساء وكلها كتيبات خاصة بزوجتى , فقالى متقولش كده بقى عشان مانجيبش زوجتك نسالها , قلتله تجيبها فين؟؟؟؟

لا ياسيدى الحاجات دى بتاعتى



يعنى الموضوع كله ملفق



اية: قربت الانفراجة ؟؟؟ حاسس ان مصر قربت للانفراجة؟؟؟



د.عصام: والله احنا طباع البلد عندنا غير طباع البلاد اللى حوالينا, يعنى واضح ان النيل ووادى الدلتا بانساطه اثر على الناس وخلاهم منبسطين زيه

عشان تقوميهم هتلاقى صعوبة شديدة جدا

بس دلوقتى اما نسمع عن اضراب وعصيان مدنى فده حاجة خطيرة جدا

يعنى احنا كنا فين وبقينا فين



بس



اسفة جدا لانى اخرت كتابة الموضوع

ارجو ان الدكتور ابن الدكتور عصام يوصله بالغ اسفى

ويتكرم ويطبعهوله وانا هانتظر رد الدكتور لو الدكتور عصام فاضى


حسبنا الله ونعم الوكيل

9 مصابين قصدى معلقين:

عبدالرحمن ياسين يقول...

السلام عليكم ...
أول تعليق ....هيه هيه ...ههه
أقرأ وهرجع تاني

عبدالرحمن ياسين يقول...

ماشاء الله ...كل ده وقفتم معاه ....
ماشاء الله .....

أنا ماأعرفشي الدكتور عصام ....
دي أول مرة أعرفه ....
ماشاء الله عليه ...
تحياتي لكي
أخوكم الصغير .."مش الصغير قوي "
عبدالرحمن ياسين

Dr cool بادّن في مالطا يقول...

بسم الله ما شاء الله

حوار رائع جداً

جزاكي الله خيراً

بجد مزيج من المشاعر تجاه الحوار

شوية استمتاع على حزن على فرحة على غم على وجع قلب

بس حوار رائع جداً

ربنا يهون عليهم جميعاً ، و يأجرهم خير الأجر و الجزاء

مدونة النسر المصرى يقول...

ادعوكم لزيارة مدونتى وقرأءة هذه الرسالة

جمعاوي يقول...

السلام عليكم ورحمة الله

الأول جزاكم الله خيرا يا دكتوره على الحوار الطيب ده

وأحب أقولكم يا جماعة إن الحوار ده اتعمل قدامي من بعيد كده..بس كنت مشغول شويه علشان كنت بجيب طلبات العملية للدكتور عصام-هو عمل عملية زرع سنة أماميةنسألكم الدعاء وعملها له د.إيهاب أبو الروس-

وجيت أنا بقى على الأخر وكانت أية رجعت لمصطفى عصام تقوله على اسم المدونة

أية-اسمها مدونة لساني مولوتوف

مصطفي-ماشي شكرا

ومن ساعتها عاوز أسال مصطفى إيه الموضوع..بس ما جاتش فرصة بقى ..والحمد لله أديني عرفت

على فكرة دكتور محمد بشر جاي برده التلات القادم 29\4 عند قسم الprothesis برده علشان عملية زرع ..لو حضرتك عاوزه حوار تاني يعني..حوار بعد الأحكام بقى!

ويلا سلام عليكم

ahmed saker يقول...

السلام عليكم و رحمة الله و بركاته
بصراحة الحوار جميل و يستحق القراءة رغم طوله و هذه الصفات الجميلة تجديها في كل من يحاكموا محاكمات عسكرية اذا قرأتي سيرهم الذاتيه(بس تقولي ايه بقي في البلد بنت ال.... اللي احنا عايشين فيها)و .....ويكفي هذا

Hosam Yahia حسام يحى يقول...

ماشاء الله


ربنا يوفقكم يافندم

يسلم الكيبورد اللى كتب الكلمات دى



تحياتى

إخوانى مخربش يقول...

تواضع جم

سبحان الله

Uouo Uo يقول...


thx

كشف تسربات المياة
غسيل خزانات
شركة نظافة عامة