الاثنين، نوفمبر ٢٦، ٢٠٠٧

وجهة نظر ..... رائعة محمد صبحى


استمتعت بمشاهدت الرائعة وجهة نظر للرائع محمد صبحى

كل مرة باتفرج على المسرحية دى بفهم بيوصلنى معنى جديد

مع انى ببقى بسمع الحوار مع الممثلين وباضحك عليه فى نفس الوقت

( شوفتوا حد بيغلس على نفسه كده)

هههههههههههههههه

انا



المهم عايزاكوا تحسوا وتستشعروا كل كلمة من

كلمات عرفة الشواف حينما عذبة السبعاوى بيه علشان ينطق ويقر ويعترف انه اعمى ولا بيستهبل؟؟



وعندما سألته ابلة نظيرة لتتاكد بنفسها سر بصيرة عرفة الشواف

انا عارفة انكوا كلكوا اتفرجتوا عليها بس كلماته دى استوقفتنى كثيرا حتى انى بكيت فى وسط الضحك

بعد الحقنة

دماغى حريقة فى دماغى

طفونااااااااااااااااى

طب قولى واوعدك انه هايكون سر بينى وبينك

انت بتشوف فعلا؟؟

ساعات

مش فاهمة؟؟

ساعات اشوف كل شئ بوضوح

العطش والجوع

الحر والسقعة

العدل والظلم

القسوة والرحمة

واشوف الشمس لما يلسعنى شعاعها

واعرف انها غابت لما غروبها يرمى الكأبة فى صدرى

وساعات عقلى يلهمنى اعرف اللى قدامى واللى ورايا واللى جانبى

اشوف صاحبى من عدو

الايكو تقولوا ده مفتح وشايف

احس بالزهو يملانى

لكن جوايا عارف حقيقتى

مطبش بايدايا واعد الخطاوى برجليا

واتجنن

باتجنن

لمااحس بيكو ا بتتحركوا حواليا منغير ما حاجة تحوشكوا واسمع سكاتكوا اعرف انكوا بتتكلموا بعنيكوا

باتجنن من ياقينكوا

واوقول ايشعرفنى انكوا ما بتكذبوش عليا

او تكون الحقيقة فاتتكوا

واقول يمكن لو فاتحت عنيا اشوف غير اللى انتوا شايفينه او متأكدين منه



اقول على سر وما تضحكيش منى



قول



انا باخاف من الظلمة



مع انى عايشها



ساعات بحس ان الظلمة دى حد عملها بالعند فيا

ببان حديد مصدية وتربسنها فى وشى

بير ملقوش قرار ورمونى فى قعره

بحس ان انتوا مقفلين الشبابيك ومنزلين الستاير ومطفيين النور عليا

ببقى عايز اصرخ افتحوا الشبابيك زيحوا الستاير ولعوا النور

ايدوا شمعة



كنت وانا صغير

يتهيألى انهم جابوا شمع سايح وطفوه فى عينيا

ايوة ختموا عليا بالشمع الاحمر

كنت بمنى نفسى انه اجراء مؤقت لحد ما تثبت برأتى

ويفكوا الشمع عنى وتتزال الغشاوة من عينيهم ومن عينيا



لكن كل مابكبر بحس بتقل الشمع اكتر



دماغى

مش طايقها





انت اللى خليتهم يشكوا فيك

لو تبطل تشغل دماغك



لأ

لأ

انا فقدت عنيا لكن مش هافقد دماغى



دماغى هى اللى بشوف بيها

دماغى هى اللى فضلالى





لتحميل المسرحية

وجهه نظر


33 مصابين قصدى معلقين:

محمد عبدالجليل يقول...

انا اول واحد اعلق يس نتكلم جد شوية بقي مش كل حاجة هزار استاذه شذي انا سعيد ومشفق علي حضرتك في نفس الوقت طبعا البوست جميل جدا من وجهه نظري لاني بحب التمثيل وبحب محمد صبحي علشان كدا سعيد بالبوست ده وسعيد كمان لان في واحدة من الاخوان دماغها متفتحه لدرجة انها تحلل المنولوج بالطريقه الي حضرتك حللتيها دي وان في واحدة مهتمه بالمسرحيات لكن الحقيقه انا مشفق علي حضرتك لان الطبيعي من معظم الاخوان مش كلهم انهم حيقولوا ان احنا ورانا من هو اكبر من ذلك الحقيقه في حاجات صغيرة اوي زي المسرحيات وكدا الناس محتاجة تفهم وجهه النظر الاخوانية من ناحيتها والحمد لله لسة في امل

وضـّاح يقول...

جميل جدا نور بصيرتك

الحوار رائع جدا فعلا

بالنسبة للأخ محمد عبد الجليل الذي يستغرب وجود شخص مثلك في الإخوان

المفروض إن القاعدة العريضة في الإخوان لهم عقول متفتحة وقلة ربما نادرة هي التي لا تفهم المقصود

أظن أن أي شخص يقتنع بفكر الإخوان فهو ذو عقلية متفتحة لأن الإخوان يدعون إلى تطبيق الإسلام الشامل فهو إن اقتنع .. فهو صاحب عقل واع عقل شامل

أعتذر للإطالة

السكندرى يقول...

الأستاذة شذى على فكرة أنا اتفرجت على المسرحية مرتين قبل كده
وفعلا ما كنتش بقف عند الكلمات دى رغم إنها معبرة فعلا عن واقع أليم بنعيشه
يمكن أول مرة ألتفت بجد لمعنى الكلمات دى النهارده لما قريتها عندك

بس يمكن السبب الرئيسى فى كده
هو الحالة النفسية والمزاجية للمشاهد اللى بيتفرج على المسرحية

واللى هيه بالطبع عند كل الناس اليومين دول فى اسوأ حالتها واللى بتخليهم حتى وهما بتفرجوا على كوميديا يبكوا زى ما أنتى بكيتى

فمنهم لله اللى كانوا السبب فى تعكير صفو حياتنا واللى بيسرقوا الضحكة من على شفتينا واللى كبلوا بالظلم إيدينا لكن الأمل الوحيد أنهم عمرهم ما حيعرفوا يمنعونا نفكر ولا نشغل عقولنا لأن ده هو اللى لسه فاضلنا
فلو إتكتف هو كمان يبقى قولى علينا السلام

تحياتى لكى وأدعوكى لزيارة مدونتى لأعرف رايك فى لقاء الأباليس فى أنابوليس
ابو حنين السكندرى
جيل الصحوة

AbdElRaHmaN Ayyash يقول...

هي اتعرضت امتى ؟
ده انا كل اما اكلم حد الاقيه بيكلمني عنها
العيال امبارح في الكلية كانو بيتكلموا بيها !
بس فعلا المقطع رائع و معبر اوي
---
أرد على محمد عبدالجليل !
مش لازم

عبدالرحمن ياسين يقول...

السلام عليكم
ماشاء الله البوست أكثر من رائع

أنا لما كنت بتفرج عليها
كنت بتفرج عليها مع عيلتي
لما جه المقطع ده..والدي وقفه وجابه من تاني اه والله..عادو ثلاثة مرات
بس بعدها مكلمشي ...كان عاوزنا نفهم الكلام لوحدنا..
كلام جميل قوي له معاني حلوة
..........
جزاكم الله خيرا
أنا شوفت المسرحية..بس قرأت برده الكلام
حسيت إن له معنى تاني غير إلي أنا فهمه بس أنا والله ..والله إتأثرت جامد

جزاكم الله خيرا
بجد بوست رائع

شذى مولوتوف يقول...

السلام عليكم

والله جزاكم الله خيرا على تعليقاتكم
كنت حاسةانى باتكلم عن حاجة عبيطة وان الناس طبعا اتفرجت على المسرحية وطبعا استوقفها المشهد ده
وكان نفسى ان اضيف المقطع فيديو لانى مهما اتكلمت عنه وكتبت حواره
مش هايوصل بالمشاعر والاحساس العالى اللى الاستاذ محمد صبحى وصلهولنا

على فكرة المشهد ده
فى الجزء الرابع من اللينك اللى هاطاه فى البوست
فى دقيقة تقريبا20 من الفيديو
اللى يعرف يقطعلى المطلع ده و يرفعهولى على موقع علشان اذيعه مع البوست اكون شاكرة ليه جدا

بالنسبة لكلام الاخ محمد عبد الجليل
الحمد لله انى ما شوفتش الناس اللى حضرتك بتتكلم عليهم دول
الناس اللى حواليا كلهم ناس عقلاء الصراحة
الحمد لله
بس انا بجد معرفش حد مابيحترمش الاستاذ محمد صبحى وفنه

اخ عياش
هى اتعرضت يوم الخميش اللى فات على روتانا زمان
لو حابب تحملها من اللينك وتتفرج عليها
متشكرة على ردك يا عبد الرحمن
وشكرا على مرورك ومجاملتك
عايزاك تطمنى على السباق اللى بينك وبين اختك
مين اللى جاب درجات اعلى؟؟ :s

عبدالرحمن ياسين يقول...

أنا ممكن أعملهالك النهاردة
وأحطها على مدونتي
أنا هعملها بإذن الله

يلا مش مهم يقول...

ازيك يا شذي
انا علي فكرة مقريتش البوست
ولا بصيت علي التعليقات
لاني محدد هدفي من زيارة مدونتك وهو
اني اسلم عليكي
فالسلام عليك ورحمة الله وبركاته
واني اشكرك علي تهنئتك ليا بخطوبتي علي يلا مش مهم
وعقبالك
واظن ان امه هاتكون دعياله
واعتقد انه هايكون كوماندوز
علشان يستاهل الملوتوف
ويلا مش مهم

الفاتح اليعقوبي يقول...

السلام عليكم
استاذة شذي
مقطع جميل هو في كام شخصية من الوسط الفني هي بس اللي بتقدم فن موجه او ذو هدف او قصة معبرة منهم محمد صبحي وهو في الغالب شخصية محترمة بما نراه امامنا


بس انا حضرتك اتكلمت عن جمعة الشواف بفتكر
شيخنا الشيخ عبد الحميد كشك
هذا الراجل لايمكن شخصية اكثر من رائعة لا جمعة الشواف ولا جمعة الشوال
الناس اللي يعرفوه زمان وكانوا بيروحوا دروسه بيقولوا انه شخصية بصيرتها عاليه اوي وكان له مواقف مشابهة بالشواف وكان من الحاجات اللي تضحك جدا فيه كان بعض الاوقات يقعد يدعي علي الصف الاول في المسجد فكان الناس بتستغرب فيقولهم انا عارف انهم قاعدين في الصف الاول وبيسمعوا عشان يوصلوا

في اية جميلة جدا تنهي هذا الكلام كله
يقول تعالي:(انها لا تعمي الابصار ولكن تعمي القلوب التي في الصدور)0
والسلام

شذى مولوتوف يقول...

استاذ مجدى
وعليك السلام ورحمة الله وبركاته
جزاكم الله خيرا على الزيارة دى
والف مبروك وبجد بجد انا فرحت جدا
بس ان شاء الله العروسة تعزمنا فى العقد
والا هانزعل
وبجد بجد خطوة عزيزة
ولو حضرتك لقيت الكوماندوز دة ابقى قولى عليه
علشان انا مش لاقياه
اهو تكسب ثواب فيا


اخ يعقوبى
جزاكم الله خيرا على التعليق
للاسف مكنش ليا شرف التعرف على الشيخ كشك من قريب
بس ياريت لو فى شرايط او لقاءات ليه مميزة حضرتك تبقى تبعتلى اللينك

امام الجيل يقول...

كلمات جميلة
اول مرة الواحد يفكر فيها
ويبصلها كلمة كلمة
حاجة عارضة بس كده
المشكلة ان الناس بتتفرج ساعتها وياخدوا الكلام بضحك
قليل اللى بيفكر فى الكلام زيى كده :)
هارجع اقراها تانى

محمد عبدالجليل يقول...

الاستاذ وضاح

الاساتذه الكرام

انا مقولتش ان انا مستغرب ان مثل الاستاذه شذي في الاخوان انا نفسي من الاخوان وبمثل مع حنان ترك وصديق شخصي لمحمد صبحي ولكن انا اقصد ان الاخوان من ناحية التمثيل فالناس لا تعرف افكارهم وانا نفسي اتعرضت لكذا موقف لما بقابل اخواننا يقولولي ايه ده انت لسة بتمثل ربنا يهديك , وواحد تاني كان معايا في فريق المسرح ولقيته مش بيجي وسئلته مش بتيجي ليه قالي ما هو المفروض يا هنا يا هناك قصده انه يا يكون من الاخوان يا يكون مع المسرح وقالي ان مينفعش قلبين في جوف واحد , انا الحقيقه معلقتش علي كلامه لكن كنت حزين طب ليه انا ممثلش اسلامي مع المجتمع ده , لان مجتمع الفن بعيد كل البعد عن افكارنا كمسلمين , طب ليه انا انسحب وماحولش اصلح امال انا في الدعوة ليه والحقيقه انا قبل ما ادخل المجال ده قريت كتير عن افكار حسن البنا والفن والمسرح والتمثيل ولقيت انه غير الفكر السائد حاليا عند بعض اخواننا


بالنسبة للاستاذ عبد الرحمن عياش

فا انا اسف اني مش حرد علي حضرتك

شروق الشواف يقول...

شكرا ليك ياشذى ...

اعتقد ان مفيش اثنين اختلفوا على الفن اللي بيقدموا محمد صبحي ...

...........

لكن اسمحيلي ياشذى اعلق على بعض الردود ...

الاستاذ محمد عبد الجليل طرح نقطة مهمه في الفن [ واناالى الآن لم اصل فيها إلى رأي ثابت]طرح مشاركتنا ووجودنا كإخوان في الوسط الفني ومشاركتنا لهم والتفاعل معهم وقد يبدء التفاعل بالتشجيع وينتهي بالتمثيل معهم ...
واعتقد ان هناك من بدء بالفعل في ذلك متمثلا في المؤالف محمد مرسي [ ممكن اكون مخطئه في الاسم ]

في حين جاءت الردود التي ترد على كلام الاستاذ محمد في نقطة اخرى تماما مايربطها بطرح الاستاذ محمد كونها تتعلق بالفن...طرحت باقي الردود نظرة الإخوان للفن ومدى متابعتنا للفن الهادف ...لذا فإن الرد لم يكن متناسقا مع طرح الاستاذ محمد ومن هنا جاء الاختلاف ...والذي ينظر اليه يرى اننا لم نختلف من الاساس ...

ارجو ان اكون اوضحت ...

وبعتذر عن الاطالة

النجمة الصامدة يقول...

اااه يا شذى

احنا تقريبا حافظين المسرحية دي في البيت

وفعلا
باجي عند الجزء ده
واحس اني مخنوقة واعيط


لمحة جميلة منك فعلا يا شذى

ربنا يكرمك

ويزيح عنا الغمة

وضـّاح يقول...

أخي الكريم محمد

كلامك ليس سيئا كما يظهر

ربما يكون صحيحا ولكن ليس بالتعميم
الإخوان بشر وستجد فيهم أصحاب رؤى مختلفة .. ولكن هم دائما يجمعهم فكر أساسي واحد

لذلك ربما يكون رأيك صحيح ولكنه رأي من فرد لؤيتك فرد واحد يطبق ما قلته .. لذلك فهذا أمر فردي , وحضرتك لما تكلمت قلت معظم الإخوان وهذا ليس بصحيح

أمر آخر لك ولكل القارئين لكلماتي .. أننا يجب أن ننظر لمن أمامنا ونقيمه فربما هو لم يزد عن كونه محب

طبعا الإخوان يشجعون الفن الإسلامي بكل ما تحمله الكلمة من معنى

ولا أقول لك هذا الكلام من كتاب نظري ولكن .. أنا والدي من الإخوان القدامى وأنا أيضا أنتمي للإخوان ومع ذلك عندما كنت صغيرا كنت في فرقة الإنشاد والمسرح وكان والدي وكل الإخوان في المنطقة يسعدون بهذا الأمر

وأنهم يشجعونا الآن على إخراج ما لدينا من طاقات فنية أو أدبية

رجاء أخير

لا أدري لماذا يدخل البعض في امناقشات بغلظة أو تهكم .. هذا ليس من شيمنا ولا من أخلاقنا نحن الإخوان ومن قبل نحن المسلمين

لذلك رجاء يا إخواني لا تنسوا قوله تعالى .. ادع إلى سبيل ربك بالحكمة والموعظة الحسنة

وقوله .. وجادلهم بالتي هي أحسن


وأعتذر للأخت شذى عن هذا التدخل بالرد في مدونتها

جزاكم الله خيرا

asmaa ibnatalislam يقول...

السلام عليكم
ازيك يا شذي
وحشتيني جدااااااااا
معني رائع وتحليل اروع
علي فكره انا ليه عندك عتاب جامد جدا اكيد عرفتيه ولو معرفتيهوش يبقي خليهم عتابين
هفكرك بحاجه
فاكره مؤتمر القاهزه الخامس والصحفي الاجنبي اللي كنا بنكلمه انا وانتي لما كان بيقول قلمك هو سلاحك وانا قلتله ولسانك كمان سلاح
اكيد فهمتي العتاب
في انتظار ردك

عبدالرحمن ياسين يقول...

السلام عليكم
دكتورة شذا:
أنا قصيت المقطع وظبطه
هتاخديه إزاي

..
تحياتي لكم

غير معرف يقول...

اسماء اشرف
حلو الموضوع بس الاحلى ردود الناس وانا مبسوطه جدا ان الناس اللى ردوا فهمو صح وحللو الموضوع بمنظور ارقى من
اى حد عادى هيخش يكتب تعليق بجد جزاكم الله خيرا
بس انا مدايقنى اوى ان الخط صغير ابقى كبريه شويه يا دوك

اجري على الله يقول...

اعظم من فقد البصر هو فقد البصيره واعظم من فقد البصيره فقدان الامان
واعظم من ده كله فقدان الوطن
عندما تصبح في وطنك مدان حتى تثبت برائتك
وعندما تكون انسان بتشوف حتى ولو شكل عنيك مقفل وكل اللي حوليك رغم ان عنيهم مفتحين بس مش بيشوفوا عندها ستدرك معنى الوحده و الغربه لكن برغم ده كله مازال هناك شيء واحد فقط هو الامل و العزيمه و الصبر والثقه في الله حتى تكمل الحياه......

اختنا شذى بوست جميل وانا سعيد اني اتعرفت على مدونة حضرتك

اتمنى ان تشرفيني في مدونتي
الشاعر بن هلال

محمد عبد القوى يقول...

أستاذة شذى:
أولاً انا صديق محمد عبد الجليل المتسبب فى معركة التعليقات الدائرة على مدونتك..ولكنى لن أشارك فيها..فانا لست أخوانياً ولا ناقة لى فى هذا الحوار ولا جمل..كل ما أردت قوله هو شكراً لتعليقك الجميل على مدونتى..وتسجيل أعجابى بهذا البوست الرائع
ان هذا الحوار - او المونولوج بلغة المسرح - يشكل لنا حالة خاصة وفريدة فى فريق كليتى للمسرح استطعتى انت التعبير عنها بهذا العرض الشيق
شكراً واسف للأصالة

شذى مولوتوف يقول...

السلام عليكم
امام الجيل
علشان كده حسيت انى عايزة اكتب البوست ده وبالطريقة دى

الاخ محمد عبد الجليل
سؤال بس؟؟
هو حضرتك مثلت قبل كده فى مسرحية على فيصل ندى
فيتنام تو او الكود؟؟

شروق
جزاك الله خيرا على التوضيح انا مش شايفة فعلا اى وجه اختلاف فى الموضوع


النجمة الصامدة
جزاك الله خيرا على مرورك وتعليقك الرقيق


الاخ وضاح
اعتير المدونة مدونتك
بس ارجو اننا نخفف شوية من تربصنا ببعض
نختلف اه بس برااااااااااحة


اسماء حبيبتى
انا مش عارفة انتى زعلانة ليه ارجو منك انك توضحيلى شوية

جزاك الله خيرا يا عبد الرحمن

اسماء اشرف دايما منورة مدونتى بتعليقاتك
جزاك الله خيرا على تشجيعك ليا
ونصحك الدائم ليا
سلميلى على عمو قوى وطنط

الاخ صاحب اجرى على الله
جزاكم الله خيرا على المجاملة وانا بالفعل زورت مدونة حضرتك وقرات منها مقتطفات بس ان شاء الله لها رجعة

اخ محمد عبد القوى انا الاسعد بتعليق حضرتك
وادام ان شاء الله لك مستقبل فى هذا المجال
ارجو منك ان تقدم لنا الفن الهادف الذى تهترم به نفسك قبل ان تهترم به المشاهدين
منتظرين ابداعات حضرتك الفنية

وضـّاح يقول...

أعتذر لو كنت زودتها

وإن كان فهم من كلامي مثل هذا فأنا أعتذر

لأني لا أحب الجدال ولم أحب أن يظلم أحد الإخوان إخوانه

وفي نفس الوقت لم أحب أن يظلمه أحدهم

عذرا أختي
:)

al-moslem.maktoobblog.com يقول...

أول مرة أفهم الكلمات بالروح ده

أول مرة توصلي المعاني كدة

مع اني سمعت المسرحية اكتر من مرة

بس فعلا شكرن جدن جدن





الشاب الحر الأبيّ
al-moslem.maktoobblog.com

غير معرف يقول...

تدعو رابطة مدوني الفيوم جموع مدوني مصر والصحفيين والمنظمات الحقوقية للمشاركة في الوقفة التضامنية التي ستنظمها الرابطة ولجنة يالا نفضحهم
امن الدولة العليا بالتجمع الخامس. أمام مقر نيابة
وذلك يوم الاحد 9/12/ 2007 الساعة 11 صباحا
تضامنا مع المدون أحمد محسن ولاعلان التضامن أيضا مع كافة المعتقلين الشرفاء
للإستعلام
0120134420 عبد الرحمن فارس.
0107893296 أحمد عبد القوي

الفاتح اليعقوبي يقول...

السلام عليكم
استاذة شذي اتمني ان حضرتك تكوني بخير


الليلنك بتاع دروس الشيخ عبدالحميد كشك اهو
http://www.islamway.com/?iw_s=Scholar&iw_a=lessons&scholar_id=39

وانا اسف علي التاخير في الرد بس فعلا لو اردتي ان تعرفي ماذا كان يحدث للاخوان ايام عبدالناصر وتاريخ مصر بشكل اسلامي في فترة عبدالناصر اسمعي للشيخ كشك واستشفي هذا الكلام من دروسه
فاحسبه رجل ذو بصيرة
والسلام

الفجرية يقول...

يااااه يا شذى

انا اتفرجت عليها كذا مرة

والجزء ده بحبه

لكن دى اول مرة احسه كلمة كلمة كده

كلماته معبرة لاقصى درجة

شكرا يا شذى..

ثانيا..عاملة ايه..غيرت رقم موبايلى..هبعتهولك ويارب تكونى كويسة والامتياز لسه عجبك ومتعبكيش ..

شذى مولوتوف يقول...

جزاكم الله خيرا اخ محمد مرسى
وارسل تحياتى للوالد

ربنا يكرمك يا اخ يعقوبى

اسماء انا سجلت خلاص النمرة
وكان نفسى اشوفك يوم الاربع بس خالتو قالتلى انك كان عندك لتتمانية
بس ربنا ييسرلك ويفتح عليكى

الفاتح اليعقوبي يقول...

السلام عليكم
استاذة شذي لكي عندنا تاج تعالي وخذيه
والسلام

التوأمان يقول...

انا مشفتش المسرحية ولا مرة :)

بس بعد الي قرأتو عندك ده
نويت اني اشوفها نا شاء الله.

ايمو يقول...

جميل قدا وربنا يستر وما نفقدش تفكيرنا علشان الحياة صعبه
وجزاكي الله خيرا علي الكلام الرائع
وادعوكم لزيارة مدونتي
http://ino-this.blogspot.com/

عصفور اسكندرية يقول...

السلام عليكم
كل عام وانتم بخير
عيد سعيد
رزقكم الله الحج
تقبل الله منا ومنكم


مفأجه العيد
http://mat7on.blogspot.com/

nada يقول...

ماشاء الله
البوست جامد اوى واسلوبك رااائع
ربنا يوفقك وكل عام وانتم بخير

مدونتى http://tra2e3o00o.blogspot.com/

فكرة يقول...

الله..الله.. رائعه
السلام عليكم ورحمة الله وبركاته الأول

في سؤالي عن الفن قال لي أحد الأساتذه أن الفنان يري ما يراه جميع الناس صغيرا ضئيلا ،يراه هو ضخماكبيرا
وعندما يصوره للناس وكيف يراه يدركوا جمال ما اغفلته أعينهم

واضاف ان الفن الراقي هو الذي تشعر معه أنك تتحول لإنسان أفضل
وأنك بعد مشاهدته أو سماعه أصبحت أفضل منك قبل أن تشاهده أو تسمعه

البوست أقوي من اي تعليق يكتب

جزاك الله خيرا