رسائل خاصة الى حبيباتى

اولا اشكر لكل من علق فى البوست السابق وخاصة اسماء العريان التى وضحت غموض التغطية لهذا اللقاء

وبالنسبة لسؤال امام الجيل عن هل هذا شعور فردى ام انه منتشر؟؟؟

لا اعرف هل اجابتى ستصدم كثير من الاخوان ام لا

ولكن الاجابة هى انه شعور منتشر انتشار واسع بين الاخوات صغيرات السن خاصة لما لهم من امل فى تغيير واقع الاخوات

ولا اعلم بشعور الاخوات الكبيرات وهل السكوت علامة الرضى ام انه علامة لشئ اخر

تحديث : تكلمن الاخوات بلسان اخت فقلن : رسالة الى فضيلة المرشد على مدونة امواج فى بحر التغيير

......................................................

هذا البوست خصصته لابعث منه برسائل خاصة لكل من احببتها يوما جاهدة ان اوفى كل ذى حق حقه

هابدأ بمحيط السكن

خالتو , انا مش عارفة انتى زعلانة منى ولا لأ بس من ساعة اما عزلتى ما بسمعش عنك اى اخبار وخايفة اتصل بيكى لاصدم بواقع زعلك منى

خالتو , انا عايزة اقولك انى لغاية دلوقتى مقعدتش فى تربوى من بعد الكلية وده محسسنى انى اخت مع ايقاف التنفيذ لان الموضوع متوقف على جلوسك مع المسؤلة الحالية علشان تستفسر عن مستوايا وشغل الروتين المعهود

مش عارفة انتى هاتوصلك الرسالة دى ولا لأ بس ارجو من الله ان لا يجعل فى قلبا شئ سيئا من ناحيتى

خالتو المسؤلة الحالية بتطلب منى انى اقعد فى حلقة عامة لانها ما بتحبش القفز وفى ذات الوقت تطلب منى ان اعمل دعوة فردية مع بنات المسجد

فكيف لى باخراج دون ادخال

كيف لى بعمل دون مؤن

ولقد نفدت مؤنتى

.........................................................

احباب كليتى

اية

كل مابقابلك بينعقد لسانى لوصف حبى ليكى واحترامى بشخصيتك وبنجاحك وبهمتك

ودايما باستنى اليوم اللى بقابلك فيه علشان استزيد من همتك

انا ساعات بحس اننا بنكمل بعض

وساعات بحس اننا تؤام

وان ارواحنا متألفة بشكل كبير جدا

دايما بحاول اسأل عليكى ودايما بسعى للقاء

ولكنى اعلم انك شبهى فى عيب فى شخصيتى وشخصيتك

اننا كائنات لا تليفونية على الاطلاق

واننا لا نستطيع ان نتواصل عبر الاثير

بس انا تغلبت على النقطة دى تجاهك لشده شوقى وحبى لكى

والله اعلم انك تحبيننى ايضا

فتيجى نلم المتعوس على خايب الرجى

ارجو انك تفكرى فى كلامى ده جيدا وانك تفهمى نقطة مهمة جدا ان الحب محتاج مجهود وتضحيات وعطاء بين الطرفين علشان يفضل عايش ومايمتش

وانا نفسى ان الحب اللى مابينا ما ينتهيش الى ان نلقى الله

اية اخر مرة كنا مع بعض باحت كل منا للاخرى بشعور الوحدة مع اننا احنا اللى عاملين كده فى نفسنا

.........................................

فاطمة

اعلم مدى انشغالك ومدى اعباء مسؤليتك

ووالله ادعوا لكى بان يقوى الله ظهرك ولا يخفف حملك

بحب فيكى يافطوم اصرارك وعقلك

وتفائلك الدائم اللى قلما رأيتك بدونه

حتى فى وسط الامتحانات والزنقة ابتسامتك الرقيقة لا تفارقك

ربنا يكرمك ويعزك يا فطوم ويرزقك بالزوج الصالح ويهدى عمو اللى عايز يلزقلك اول عريس يجيلك

.........................................

منى

احيانا كثيرة احس بعطفك وحنيتك كام ناضجة واحيانا كثيرة بردو بحس بطفولة مشردة

وعند غريب ببقى عايزة *&%^)&^)*^

ما علينا

اتقربنا من بعض فى اخر سنتين مع بعض

كنت دايما بتسالينى قبلهم اللى عايز يحبك ياشذى ويتقربلك يعمل ايه؟؟

وكنت مش لاقيه الجواب لان مفاتيح الحب عندى ببلاش

بس ماينفعش اى مفتاح

الحمد لله انك لقيتى المفتاح المناسب قبل ما نبعد عن بعض بعد الكلية

ارجو منك بردو انك تعملى نفس المجهود اللى كنتى بتعمليه علشان تلاقى مفتاح حبى

علشان انا بجدد الكالون كل 6 شهور

هههههههه

انا قصدى ان الواحد اما بيبعد عن صحابه ويروح فى مكان جديد عليه وناسه غرباء عنه

بيحس بوحشة وغربه

ويفتكر ايامه الحلوة بين احبابه واصحابه

اللى ماكنش الوقت بيسمح ساعتها الا بالقاء السلام بالكتير

بس بيبقى كفاية عليه يسلم على فلانة ويتكلم كلمتين مع فلانه

ويفضفض مع فلانة

ويتكلم ويتناقش ويتخانق مع فلانه وفلانه وفلانه

انما دلوقتى مابقدرش اناقش ابسط الامور اللى بتدور جوايا مع اى حد من اللى حواليا

انا بس مش عايزة اكتر من الكلام الورمانسى ده علشان ما اطمعش حد فيا

ويقول بقى مش عارفة تعيش منغيرى وكلام كده

انا عايزة اطمن اى حد انه عايشة ووبنام وبقوم وباكل

بس من غير روح

........................................

هبة

ماتفتكريش انك علشان جايا متأخر فى بوستى انك فى موقع متقهقر فى قلبى

ابدا والله

ده كان بعدى عليا اوقات مفيش حد يسمع شكوتى ولا مشاكلى مع اخواتى غيرك وكنتى غير اى حد كان يسمع شكواى

كنتى دايما تقوليلى معلش بكرة الدنيا تتظبط وده ماكنش بيمنعك انك تقوليلى لا المفروض ان ده كان يتعمل او ما يتعملش

شكرا ليكى ياهبة انك وقفتى جنبى واستحملتى مشاكلى

بجد بجد انا بعتبرك احد عقلاء وحكماء الكلية

ربنا يكرمك ويعزك

ما تتصوريش اد ايه انا كنت سعيدة قد اه اما جيتى وقلتيلى على مشكلتك

طبعا مش سعيدة فيكى بل كنت سعيدة انى كنت الوحيدة اللى افصحتيلى عما يشغلك ويؤرقك

شكرا جزيلا على الثقة اللى بتمنى انى اكون قدها

....................................

اسماء

مفتية الاخوان المسلمين زى ما كنت بقول عليكى

يارب ياسماء يرزقك من علمه وتبقى فعلا من الذين يحملون علم الفقة

ماشاء الله عليكى ولا ازكيك على الله

انا فرحانة جدا من الوقت القليل اللى قضيته معاكى انتى وطمطم فى المسجد اللى عنكو فى اواخر رمضان

انا مش قادرة اقولك الايام دى رضيتلى روحى ازاى

انا عارفة انك ملكيش فى النت

بس يارب يوصلك كلامى ده

بانى احبك فى الله

...............................

نرمين

نغتى

بلاش اكمل الباقى بقى

انتى عارفة انا بحبك قد ايه وبحب ضحكتك اد ايه

برغم اننا على طول بنهزر وتقريبا ما تكلمناش فى حاجة جد الا نادرا

بس عارفة انك عاقلة

بس نص نص

هههههههههههه

...............................

نورا

حبيبة قلبى

انا مش قادرة اوصفلك اد ايه سعادتنا انا وكل اخواتك فى فرحك

كنا طايرين بيك

والله كانت الفرحة مش سايعانا

انا مش عارفة بس ايه يانتى اللى حدفك الحدفة اللى بعيد قوى دى

مش عارفين نشوفك ولا نزورك

نفسى على طول اعرف اخبارك وكان نفسى اعرف انتى عاملة ايه فى الامتياز

بس للاسف بجد مش بقدر التزم فى السؤال على حد

لطبيعتى اللاتليفونية

ربنا يسعدك يارب ويرزقك الذرية الصالحة

..............................

مريم

جارتى فى اللوكر

انا عارفة انى طلعت عنيكى فى كركبة اللوكر

وكنت باخد ادواتك منغير ما اقولك

مانتى ساعات بردو كنتى بتعملى فيا حاجات

بلاش بقى افتح فى مواضيع

انا بجد بحبك جدا جدا

وانتى من الناس القلائل اللى بتعرف حبى ليها

منغير ما اقول

................................

امنية

ياااااااااااااااااااااااااه

لو تعرفى مدى اشتياقى ليكى

ولامنية الصغيرة

يابنتى ده انا حلمت بيكى انك جيتى مصر وكنا قعدين مع بعض زى زمان بنذاكر وبنهزر

ياريت الوقت يرجع تانى

يارب يامنية اطمن عليكى واطمن على بنتك

واطمن على البيبى الجديد

ويرزقك طمأنينة النفس والرضا بالقضاء والقدر

...............................

ديمة

فاكرة اول مرة اتعرفت عليكى فيها من اعدادى

واكتشفت انك فلسطينية

وقولتيلى على معنى اسمك بانه السحابه الممطرة

كنت طايرة بيكى من الفرح

وقعدت اغلس عليكى واقولك انتى بقى حمساوية ولا فتحاوية

وقعدتى تحكيلى على عيلتك وبيتك

والظروف اللى شوفتوها فى فلسطين

وقعدتى تشتكيلى من ان البنات اللى اتعرفتى عليهم فى مصر بيقولولك انتوا ليه قاعدين فى فلسطين ماتمشوا وتسيبوها

وقعدت اقولك اننا بنعتبركوا اهلنا وعيلتنا

واننا دايما بندعيلكو لانكوا جزء مننا

ومش هانسى عمرى اما وعدتينى بانك هاتيجى مخصوص مصر علشانى فى فرحى

ومكانتش مصدقاكى فى الاول

وقولتيلى لو ماجيتش علشانك اما هاجى علشان مين؟؟

.................................

كفاية كده النهاردة

اما يجيلى مزاج هابقى اكمل