كلاكيت تانى مرة : قابلنا دكتور مرسى

قبل ان ابدأ

1- الحمد لله الحمد لله بجد الامتياز ده شغل حلو جدا جدا

وانا دلوقتى الحمد لله واثقة من نفسى وبدأنا نشتغل بادوات كنا بنتفرج عليها بس فى ايدين المعيدين

بس لسه لغاية دلوقتى الشغل معظمه خلع خلع بس ان شاء الله ربنا ييسرلنا ويرزقنا بحالات حشو وعلاج جذور

ومستشفى المنيرة طلعت مستشفى محترمة الحقيقة

وinfection control حلو جدا الحقيقة

والممرضات كويسين ومتعاونين

الحمد لله

انا كمان مبسوطة جدا انى فى السيدة لانى بحب المنطقة دى جدا جنب الرحمانى بتاع السوبيا

والحمد لله كمان فى دكتور جامد جدا هناك

ماشاء الله شاطر جدا ومعلومات جامدة جدا

الحاجة الوحيدة اللى منغزه عليا الفرحة دى هى الست بتاعة الامضاء والنزول بدرى

2-باعتذر للناس اللى كان نفسها تعرف اللقاء اللى فات مع الدكتور مرسى اتقال فيه وانا عملت لينك لمدونة الفجرية واعتقد انها غطت اللقاء تقريبا

بس عايزة اعرف الناس حاجة انى ماانفش للشغل الاعلامى ده خالص

انا الكلام بيدخل دماغى ويستوى فيها وبعد كده بيترجم لافعال

لكنى تقريبا اكتشفت انى معرفش اقول الكلام ده تانى بنفس الطريقة لكن بقوله بطريقتى مع اسقاطات طبعا بسبب الزهايمر المبكر اللى عندى

------------------------------------------------------------

نخش فى الموضوع

بما ان البنت البريئة اسماء العريان كتبت تقريبا نفس العنوان للبوست فانا حبيت اكمل ما بدأته

الزمان تقريبا 3 ونصف

المكان مالكوش دعوة بس هو مكان لايقل شياكة ولا فخامة من العمارة بتاعة نواب المجلس فى جسر السويس

على العموم الدكتور عزم عليا اما اشرت له على فخامة المكان اننا نبقى نروح على طول ونعمر المكان

ويارب ماتبقاش عزومة مراكبية لان المكان فعلا عجبنى

اسماء طبعا والتوهان طلعت نفس العمارة الغلط اللى انا وصحبتى طلعنا فيها وخبطنا كمان على شقة وسألنا على الدكتور

وانا طبعا استغليت تأخير البنات وسالت الدكتور عن انطباع حضرته وصدى اللقاء الفائت

وكانت الاجابة انها كانت جيدة واشتكيتله بان الاخوة بقولولنا انهم استمتعوا جدا بعد ما احنا مشينا

فالدكتور قالى دول بس بيغيظيكوا

داحنا مشينا بعدكو على طول

انا كنت 9 فى الشارع

طبعا انا هاصدق الدكتور ومش هاصدق حد تانى

وكنت لسه بساله عن النقد والمدونات وكده بس الانسة اسماء كانت بتستغيث عبر الاثير

المهم جت اسماء وبدأنا فى كلام عام

الدكتور بدأ الاول بمقدمة لا يقل وقتها عن اللقاء الاول

بس الحمد لله المرة دى كنت مركزة

تكلم على دور المسلمين الملتزمين فى توعية المجتمع و بالتالى دور الاخوان

وان الحياة فيها الهاء شديد وان المحاربة للدين شديدة سواء مقصودة او مش مقصودة

وان الفتنة اللى بتتعرض اليها المرأة اشد واشد

بس

بعد كده بدأنا فى طرح الاسئلة والمواضيع العامة اللى بتخص الاخوات

سواء من ناحية العمل العام والتربوى والعمل السياسى

ومن ناحية العمل بين الاخوة والاخوات

وقد طرحت اخت من الحاضرات مسألة ان ليه العمل الجامعى بيبقى منفصل مادام الهدف واحد

ولماذا فى بعض الاحيانالاخوة بيستخدموا الاخوات كأداة للحشد فقط

سواء فى المسيرات او فى المؤتمرات

وان وجود الاخوات ليس وجودا فعليا فى عملهم العام

وكعادتها اسماء العريان القت سؤال كالمولتوف "استلفته منى" وسألت الدكتور انا عايزة اعرف هم الاخوات بيمثلوا ايه عند الاخوان؟؟

وباختصار الدكتور الحقيقة اكد على اهمية دور الاخوات فى جماعو الاخوان المسلمين من ايام الامام حسن البنا

وانه فى ذلك الوقت اهمت بهن اهتماما شديدا

وانه مع الوقت الاخوة بيحاولوا يزودوا اهتمامهم بالاخوات

وفى اخر اللقاء الدكتور رأى ان اللقاء لم يكفينا فقالنا انا مستعد انى اقعد معاكو مرة واتنين وتلاتة وانا حقا اظنه صادقا

لان فى امور وضحت عنده وفى اشكاليات عندنا لقينالها اجابات شافية والحمد لله

بس انا عايزة اقول فى الاخر

انا مكنتش متوقعة من قبل اللقاء ان بعده الدنيا هاتتظبط والناس هاتبقى حلو وكده

بس انا قلت للدكتور لنعتبر هذا اللقاء كالضوء الاحمر

اللى بيحسسكوا وبينهكوا بأن فى حاجة مش مظبطة وعايزة تتظبط

وهو وعدنا باهتمام اكبر للاستماع

وانا عن نفسى مش هاسيب نفسى كده

وعرفت ان الوصول للقيادات لامر ضرورى

انا مش هاقول انه سهل جدا

ولكنى هاقول انه ضرورى

اللى عايز لقاء مع مسؤل من مسؤلينا سواء للشكوى او للتعلم من خبراته

انا شايفة انه يقاتل لحد ما يقابل هذا المسؤل لانه مهم جدا

ان يكون فى تواصل داخلى بينا