الخميس، نوفمبر ٠١، ٢٠٠٧

ليلة اول يوم امتياز

يااااااااااااه نفس القلق
نفس الاحساس بتاع اول يوم دراسة
وانا اللى كنت فاكرة ان الاحساس ده علشان مابحبش المذاكرة
لقيت الاحساس ده بيتكرر معايا فى المواقف اللى بكون منتظرة فيها حاجة او فى ايام انا مش عارفة اروح فين واجى منين
نفس الارق الغبى اللى بكرهه
انى افضل كده فى السرير بين النوم واليقظة
الحالة دى بتجننى
وعينيا بتحرقنى :(
وانا اللى كنت فاكرة ان كل لما الانسان بيكبر
بيزيد معاه ثقته فى نفسه وعدم خوفه من امجهول
اكتشفت العكس
من وانا فى تقريبا اعدادى ابتدا الموضوع ده معايا
انى اروح اول يوم للمدرسة وعينيا نص مفتح ونص مغمض لانى تقريبا مانمتش
طول الليل بفكر هاعمل ايه فى المدرسة
واكون قبلها محضرة الجزمة الجديدة والقميص الجديد والشنطة الجديدة والتوكة الجديدة
اكتشفت ان الانسان بيخاف ويقلق من المجهول
اى مجهول
بيخاف حتى من بكرة
اللى يمكن فيه الخير ليه
المهم
انا والله فرحانة وكل حاجة ومستبشرة خيرا ان شاء الله
وناوية باذن الله اتعلم كويس قوى
بس هى دى الطبيعة البشرية
يالا مش مهم

15 مصابين قصدى معلقين:

الفاتح الجعفري يقول...

اهلا بحضرتك استاذه شذي وجزاكم الله خير والله فعلا عند حضرتك حق المجهول اكتر حاجه بتخوف الواحد وفعلا كل لما الواحد بيكبر وتزيد مسؤلياته والدنيا تتكربس علي دماغه بيقل نومه ولحظات السعاده بتقل وعلي فكره هي دي مشكله الموت ان انت مش عارف ايه مصيرك بالضبط مش عارف قبرك هيبقي ايه هيقي جنه ولا..... والحساب وغيره لذلك اللهم انا نجعلك ونلجأ اليك في مثل هذا اليوم وكذلك نستعين بالله في الدنيا ونوكل امرنا اليه ونسأل الله ان يوفق حضرتك وييسر لكي كل امرك في الدنيا والاخره وجزاكم الله خير

مصطفي النجار يقول...

سنة الامتياز
من أجمل السنين في حياة
الطبيب لأنه يتعلم وينتقل من
مرحلة الطلبة الي مرحلة الطبيب المؤهل
وتؤثر هذه الفترة في اداء الطبيب طوال عمره
سلبا او ايجابا

الحمد له ومبارك ما انتي فيه الان
ويبقي لك الجد والسؤال عن كل شيء
ومضاعفة الجهد وايضا للأسف صرف المال
لتتعلمي كما ينبغي واهلا بكي طبيبة
في كتيبة اطباء الاسنان

وربنا معاكي

عصفور اسكندرية ( المواطن المطحون ) يقول...

السلام عليكم
فكرتيني باول يوم تربيه عملي عندي لما كنت في سنه تانيه كنت رايح المدرسه مش عارف انام من التفكير حروح اقول لهم ايه ووححضر ايه وحسيطر علي العيال ازاي وحشرح ازاي
لغايه لما دماغي ورمت
الخوف من المجهول بيعمل حاله انا اسميها تهييس من الواقع
لكن الان انا في سنه رابعه وبقالي 3 سنين بنزل تربيه عملي بقي الموضوع سهل وممتع وبحب شغلي والطلبه بتوعي
وباذن الله مع التعود ربنا حيكرمك وتكوني طبيبه اسنان متميزه
بس لاتنسي تلمعي الجذمه الجديده وتكوي الخمار الجديد وتحضري العده الجديده بتاعت الاسنان

مش عارف ليه بخاف من اطباء الاسنان؟؟؟؟؟؟؟؟؟؟؟؟؟

علي فكره باقي تعليق اخ ولا مش كتبته

طيف الاخاء يقول...

السلام عليكم
يااااااااااه ياشوشو والله نفس اللى حسيت بيه ومانمتش خالص وكنت خايفة جدا و كنت حاسة انى مش فاكرة اى حاجة عن الشغل
بس رئيس القسم هناك فعلا ربنا يكرمه وعلى فكرة اسمه حسن البنا
بس الحمدلله بعد اول نص ساعة راح القلق وكمان اشتغلت يجى اربع حالات منهم حاجة عمرى ماسمعت عنها تخيلى بس الدكتور شرحها لى وتوكلت على الله
وعملتها
وكمان اتصلت بكل اخواتى عشان نتقابل لانى فعلا كنت حاسة بوحشة جدا فى المكان الجديد وكان نفسى اشوفك بس ماعرفش انتى اختفيتى فين

jeje يقول...

الف مبروك وعقبال متفتحى العياده

فكرتينى برده باول يوم فى الكليه واول يوم فى التربيه العملى
طيبعى اول يوم فى اى مكان جديد لسه الواحد منعرفش عليه وخايف من الفشل او ان المكان يبقى رابط سىء باشايء مش كويس

ان شاء الله يكون خير وتتعلمى اكتر وتنفعى الناس

اتمنالك التوفيق

عمر افندى و ابوه يقول...

ربنا يكرمك و تعدى منها على خير بقى و ترتاحى

عمر افندى و ابوه يقول...

بيـــــــروت
بلد المقرارات على رأى سعيد صالح و رأى كل اللى كان بيعرف انى مسافر بيروت فى رحلة عمل لمدة اربع ايام عقب عيد الفطر مباشرة ضمن اجازة مصر الماضية...كل الناس اول ما يخطر ببالها عن بيروت هية المقررات...المقرر من دول تقوله تعال يا مقرر يجى علطول ...انتا حتى موش محتاج تقوله تعالى ...انتا تعمل ايديك كده هتلاقى المقرر شبك علطول ...

إقرأ تفاصيل الرحلة على
www.omarafandy.com

الفاتح اليعقوبي يقول...

السلام عليكم
المجهول
عشان كده الواحد بيخاف من الضلمة لانها مجهول
وعشان كده بيخاف من المستقبل لانه مجهول
وبيخاف من نتيجة الامتحانات لانها مجهول

وبيخاف من الزواج وتكوين اسرة لانها مجهول يعني الجوازة ممكن مش ولابد فتبقي نكد مش سعادة

وبيخاف من اول يوم دراسة لانه مجهول يعني صحابي هيتغيروا ولا هاخد ايه السنة دي صعبة ولا سهلة

وبيخاف من الموت لان الانسان بيعتبره اجهل شئ بالنسبة له وده مش جوازة ولا سنة دراسية
ده نتيجة العمر كله

بس نعمل ايه
ربنا يكرم حضرتك في الامتياز ويعينك عليه وان شاء الله تكوني شرف لهذه الدعوة في مجالك

لاتخافي المجهول يااستاذة فانه قدر لامفر منه فقط اسالي الله ان يوفق ويلطف فيه
والسلام

AbdElRaHmaN Ayyash يقول...

ما شاء الله ما شاء الله
الامتياز جميل اوي
انا بعرف ناس كتير في الامتياز
بس ربنا يجيبلك التكليف عندك بقى
وللا انتو معندكوش تكليف في اسنان ؟
محاضرة النهارده كانت بتتكلم عن الماسيت ماسلز .. العضلات الماضغة في الفك و ازاي بنقيس قدرتها قبل و بعد طقم الاسنان
مفهمتش حاجه و محاولتش اركز كتير ..
بس عشان تعرفوا ان المهندسين بيعانوا عشان تشتغلوا
ربنا يوفقكممم

أميرة محمد محمد محمد يقول...

اختي شذي دي اول مره اعلق عندك مع اني متابعه مدونتك من زماااااااااااااااااان
ربنا يكرمك في الامتياز بالنسبه ليا انا هخاف لما ييجي امتيازي في طب لاني مش بستحمل انات و اوجاع المرضي ربنا يخفف عنهم ربنا يوفقك و تقدري تخدمي الاسلام

عصفور اسكندرية ( المواطن المطحون ) يقول...

ايه الغيبه دي كل دا من اثار اول يوم امتياز ولا ايه مش للدرجه دي يعني
دي حبه اسنان علي انياب علي ضروس
ربنا يسهل ونشوف عملتي ايه في اول ايوم


اخر بوست عندي
المواطن المطحون: نسمات

الحشرى يقول...

متهيألى الخوف فى الأول بس لو أنتى واثقة من نفسك يبقى مفيش خوف يا دكتورة

ولا بقى هنقول الدكتورة اللى متعودين منها على العزيمة والإرادة بتخاف

وضـّاح يقول...

أنا أعيش حاليا تقريبا نفس الحالة ولكن مع اختلاف المهنة

التعلم والتعليم أمر رائع أحبه جدا .. ولكن مصر موجود بها منغصات كثيرة جدا

أعانك الله وعلمك

أُكتب بالرصاص يقول...

مبروووك على الامتياز

وياريت تكتبي لنا عنوان العيادة علشان نبعط لك ضحايا..قصدي عيانيين


إلا انت طب اسنان؟ ؟؟ تخصص إيه ؟ خلع ؟

شذى مولوتوف يقول...

يا جماعة والله جزاكم الله خيرا على دعاوتكم وعلى تشجعكم

انا كما قلت سابقا اعمل بمستشفى المنيرة بالسيدة

وعلى فكرة احنا لغاية دلوقتى نعتبر ممارس عام
بس فعلا اكتر حاجة بنعملها فى المستشفى هى الخلع لان الناس بتيجى مش بتسوس لا بانهيار فى هيكل السنة من اساسه
فابنضطر نخلعه

وبالنسبة للناس المخضوضة من الاستشارة اللى كنت هاعملها فور فرى

والله كنت هاسال الدكتور الكبير اللى عندنا لو حاجة معرفهاش مكنتش هالف يعنى

ايه يا جماعة مفيش ثقة من اولها ولا ايه؟؟؟؟؟؟