الأحد، أكتوبر 28، 2007

دماغى مهنج

عارف اما تستغبى شوية على الكومبو بتاعك " الكومبيوتر يعنى" وتفضل تفتح فى فايلات كتييييييييير , يقوم هو رادد على غبائك بتهنيج لطيف ظريف لا ينفع معاه ( الت واف فور) ولا يحوق معاه ( الت وكونترول وديليت
انا بقى دماغى عاملة زى الكومبو المهنج ده
احكيلكو الحكاية؟؟
بس قولها من البداية
........هى حكاية حرب وتار
قصدى الحكاية بدات باتصال من صديقتى العزيزة اسماء العريان
ايوة ياستى
انتى فاضية ؟؟
خير؟؟
المهم الموضوع اللى وصلنى ان الدكتور محمد مرسى عايز يقابل المدونين الاخوان
وبعدها جالى ميل من عبد الرحمن عياش بيقولى نفس الكلام
وكان عنوانه دعوة من الدكتور محمود مرسى للقاء المدونين
المهم الميل ده مكتوب عليه خاص
وفى اخره ان الناس اللى وصلهم الميل ده هما اللى مدعوين ليه
ماشى
المهم قابلنا ايمان عبد المنعم فى مترو البحوث
وذهبنا كده زمرة
يااااااااااااااااااااه
المشوار طويل بشكل
فوق ما تتخيلوا
خلى دماغنا تلف ولا عزاء للصائمين
ماشاء الله
ماشاء الله
ايه الجمال والحلاوة دى
حتة عمارة
رائعة
ماشاء الله لاقوة الا بالله
انا مابحسدش
انا ببحلق بس
:)
والله الناس اللى هناك استقبلونا احلى استقبال
وحسيتهم كده فرحانين بينا قوى وعايزين يشيلونا من على الارض شيل
المهم
بعد الصلاة وكده
جلسنا مع الدكتور محمد احنا والمدونين الشباب
وبدا
الدكتور محمد بقدمة قال هو عنها بأنها طويلة شوية
وانا اراها طويلة جدا جدا
بس والله الراجل مشكور
ماشاء الله عليه
المهم طبعا اعطانا فرصة الحديث والمناقشة والاسئلة
والناس بدأت تسال
هو احنا جايين هنا ليه؟؟
وايه سبب الدعوة دى؟؟
وليه هو فى الوقت ده بالتحديد؟؟
وايه هيا اهمية المقدمة الطويلة اللى بتتكلم عن مشاكل المجتمع والصرف الصحى؟؟
واشمعنى الوقت ده بالتحديد مع ان فى دعوات كتير سابقة كانت بتطالب بعقد لقاءات مع المدونين ؟؟
والمدونين دول بعتبروا ايه عند قيادات الاخوان؟؟ يعنى بيقولوا عليهم ايه؟؟ يعنى فى رأيهم بيبيعوا ايه؟؟
طب انتوا سمعتوا حاجة وحشة عننا؟؟
طب انتو حاسين ان فى مشاكل من ناحيتنا؟؟
طب ايه اللى اتكتب عن اللقاء ده النهاردة فى الدستور بأن الدكتور محمد هايقعد مع المدونين المتمردين؟؟
وطبعا كلها اسأله بتنم عن ان المدعويين مش عارفين هما جايين ليه؟؟
وطبعا هما مش عارفين رأى القيادات اللى فوق عنهم ايه؟؟
وطبعا حاسين انهم عاملين لهم قلق
وجاءت الردود
بان الدكتور محمد مرسى تقريبا مش هو اللى منظم اللقاء ده
وان هو كمان مدعو للتكلم معنا على اساس ان احنا اللى عايزين نتكلم معاه
يعنى تخيلوا معايا
احنا متوقعين انه هايتقالنا كلام
والدكتور متوقع اننا اللى طالبين المقابلة
طب فين اللى نسق للقاء ده
خلع؟؟
ولا هو لقاء كان ليه هدف بارسال رسالة معينة للمدونين "المتمردين"؟؟
وطبعا اللقاء بحضور الدكتور محمد مرسى كافى بايضاح هذة الرسالة
بس للاسف كل المدونين الغلابة
اللى تقريبا مالهمش فى النقد او على خفيف هما اللى لبسوا لقاء زى ده
يعنى محدش من اعلام النقد الذاتى جه
طبعا وهما اغنياء عن التعريف
طبعا ايجابات الدكتور كانت مبينة انه ماسمعش ان فى مشاكل فى مجتمع المدونين الاخوان
بل على العكس هو فرحان جدا بالتجربة دى
وانه كان بيحاول يوجهنا بدلا من الكلام والاحلام نتجهه سريعا للافعال
بس انا حسيت انه تقريبا مش متابع للمدونات ولا يعرف هما بيتكلموا عن ايه ولا ايه المشاكل اللى كانت بينهم سواء فى اختلافهم فى وجهات النظر على النقد المعلن
بس طبعا لا انكر انى استفدت من هذا اللقاء
بس الساعات اللى استغرقها المشوار من اوله لاخره لم يزيدنى الا حيرة
وفايلات كتييييييييييييييييييييرة اتفتحت فى نافوخى
بس انا عندى امل ان اللقاء القادم ان شاء الله هايكون احسن
بس خير
تحديث
اسماء ايسر صاحبة مدونة الفجرية كتبت خواطرها عن هذا اللقاء
لمن اراد الاطلاع

21 مصابين قصدى معلقين:

حلم الحرية يقول...

احم

هو ده نفس اللقاء اللي اخويا كان فيه

اصله راجع يقول كلام تاني خااااالص

وانه عجبه اللقاء اوي

مممممممممم

طب اكلمك ماسنجر او تليفون وافهم منك
اصلك كاتبة كلام غريب اوي انا مش فاهماه


عموما ليا عودة للتعليق بعد ما افهم

طيف الاخاء يقول...

السلام عليكم ورحمة الله
ماشى يا شذى كل ده حصل من غير ماتقولى لى بس كل ده وانتو مش عارفين مين اللى نظم اللقاء ولا ايه الهدف منه
طيب الاخ اللى بعتلك الايميل او اسماء !!!!!!!!!!!!!
وليه ماحولتوش انكم تستغلو الوقت ده وتسئلو عمو محمد على كل اللى بيدور فى راسكم من نحاية التدوين
وعلى العموم اكيد بس عشان اول مرة حاجة زى كده تنظم بس ان شاء الله يكون اللقااءت القادمة تكون مثمرة
بس ماتروحيش فى حتة تانى من غير ماتقولى لى

وضـّاح يقول...

المفروض الإعداد يكون منكم أنتم
فأنتم من تطلبون الإجابات

الدكتور محمد مرسي من أفضل الشخصيات التي قابلتها , ومن أفضل العقول في الجماعة وحواره مفيد جدا وممتع جدا

عموما حضرتك والحضور عليكم عبء إيصال ما سمعتموه إلى البقيه

حتى تعم الفائدة على الجميع

AbdElRaHmaN Ayyash يقول...

:D
جميييييييييييييييييييل اوي تعليق حلم الحرية
و ده اللي كنت عاوز اقوله
ان اللقاء كان راااااااااااااااائع
:D و النقاش زي ما تقولوا كده يعني ان الاخوة كانو مكسوفين
فأول لما البنات مشوا الاخوة انطلقوا
احنا مشينا 10.30
يعني كان في حوالي ساعتين بعد اما مشيتو
بالنسبة لترتيب اللقاء
:) انا اتصل بيا الاستاذ فلان اللي كان مع الدكتور مرسي على شماله
و قال ان الدكتور مرسي عاوز يقابل المدونين او مجحموعة منهم ولاد و بنات
كان في البداية الطلب على انهم اخوان بس
بعدين بقى الطلب انهم ممكن ييجو اي حد من بره
و بعدين العدد كانو عاوزينه يزيد شوية
بالتالي انا بعت الرسالة
على اساس فعلا ان اللي وصلت لهم الرسالة مخصوصين بالدعوة
و من لم تصله الرسالة و عرف مفيش اي مانع انه ييجي
لكن الاولوية من وجهة نظري كانت للي وصلت لهم الدعوة
طبعا انا نسيت مجموعة كان لازم تحضر لكن خير
على كل حال اتمنى ان لقاء البنات معاه يكون مفيد جدا زي لقاءنا معاه
و ربنا يوفقكم
سلاام

AbdElRaHmaN Ayyash يقول...

المقدمة مش طويلة . المقدمة طويلة للغاية اوي بشدة

alaa shehata يقول...

ياستي كويس ان الجماعة بدات تهتم بالمدونين وتتفهم ارائهم وتوجهاتهم ولازم نصبر شويه وواجب علينا النصيحة وتوجيه نظر الجماعة الينا واخواننا جزاهم الله خيرا وكان الله في عونهم على كل ما يلاقونه ومع ذلك يفرغون الوقت والجهد لنا وكفايه التربية اللي بنتلقاها على ايديهم واللي حولت مسار حياتنا وكونت عقولنا وهي برده اللي خلتنا ندون ويكون لنا فكر وراي

ابو مفراح يقول...

يبدوا ان اللقاء لم يعجب عبد المنعم فراح عمل باللوا فى الدستور عن هذا اللقاء

و المشكل الاكبر انه ليس هناك تقييم للمدونين الاخوان ولا يمكن حصرهم ايضا ول ينفع معاهم فى هذا الموضوع اخذ شريحه بعينها و اعتقد بان دة حال التدوين و العمل من خلال الساحه الالكترونيه

اما بالنسبه للنقد الذاتى فاحيلك لموضوع بهذا الخصوص
تحياتى اليكم
ابو مفراح

أحمد عبد الفتاح يقول...

انا مقدرش اتكلم كتير عن اللقاء بعد الي اتقال
بس احب اوضح نقط مش واضحه للبعض
اولا كل رموز النقد الذاتي بين قوسين ادعوا بالفعل وطبعا رفضوا وواحد منهم قال لو عايزين تعملوا اللقاء ده تيجوا تقولوا ليا وانا انظمه ليكم
افهموها بقه
وللاسف انامتاكد من الجمله ده بالنص كده
ثانيا انا شايف ان اهم فايده للقاء ان الجماعه عرفت ان مدوني الاخوان هما كده
عيال شغاله من دماغها محدش يقدر يسكتهم او يوجهم في نفس الوقت اتاكدوا ان جماعتنا ودعوتنا اغلي شئ عندنا
ملاحظة اخير
المقدمة كانت طويلة اوي جدا خالص بشده جدااااااااااااااااااا

محمود سعيد يقول...

والله اللقاء بالنسبة لأنه كان بلا جدول أعمال وبلا موضوع

أصبح لقاء مفتوح جداً


كلام فى كل حاجة وأى حاجة

فبالتالى الواحد ميحس قوى إنه مثمر ... وديه سلبية كانت فيه


لكن لو حسبها وبص ما بين السطور هيلاقى أنه فى إيجابيات تخليه تستحق المديح
زى محمد السيد وعبد الرحمن ما قالوا وأنا معاهم

الفاتح الجعفري يقول...

اولا انا معرفش حضرتك ليه مشرحتيش المقدمه او الكلمه او حتي الاستفاده اللي حضرتك بتقولي عليها علشان نقدر نعلق علي الموضوع بوضوح كل اللي عرفناه ان العماره كانت فخمه جدا ولم يتم التنسيق للقاء بس اما اوجه الاستفاده حضرتك ام تتناوليها فأرجوا من حضرتك مزيد من الايضاح وجزاكم الله خير

عبدالمنعم محمود يقول...

الاخت الكريمة سعدت بمشاركتك اليوم
واحب أن اوضح شئ مهم اولا انا لم يدعوني أحد لهذا اللقاء
ووصلني من زميل صحفي من جريدة المصري اليوم أن لقاء سيعقد قريبا بين الدكتور مرسي وعدد من المدونين الإخوان
وبعد التقصي عبر مصادري الصحفيةتوصلت للصديق الذي لن اذكر اسمه حساسية عليه والذي نسق اللقاء للدكتور مرسي
وقال لي والله انا كنت ناوي ادعوك بنفسي بينما لم يحدث بالفعل
فاجبته انا اتصل به مصدر وهذا لاني اقوم بعمل خبر عن هذا اللقاء بالجريدة التي اعمل بها
وسالته هل من مانع من النشر
فقال لي شوف الصالح ايه واعمله
وسالته مكررا هل هذا اللقاء سري أو مرهون بالاخوان فقط فقالي لا
فستأذنته في حضور زميلتنا ايمان عبدالمنعم لتغطية اللقاء
وقمت بكتابة الخبر واضافته بتحليل لاكثر من باحث غربي ومصري ان هذه المدونات اصبحت مصدر لقلق الجماعة
ورفضت الحضور لحرص علي مهنيتي وحتي لا اقوم بخلط العام بالخاص
موفقين وارجو ان تكونوا قد استفدتم بالفعل

شذى مولوتوف يقول...

مروة اما اكلمك على المسينجر هابقى اقولك الموضوع ايه؟؟

مش كل حاجة يعنى لازم تعرفيها يا ست منى
:)

اخ وضاح
انا مش عارفة ازاى احنا اللى نعد
مهو مش احنا اللى طالبين اللقاء

واسفة جدا ان مش قادرى اقدم ملخص عن اللقاء لانى مابكتبش وراء المحاضر
وغير كده المقدمات الطويلة بتوهنى
يعنى معرفتش اجمع منها خالص


!!عبد الرحمن عياش
بقى الاخوة هما اللى كانوا ماكسوفين؟؟؟
:O

امال لو ماكونوش ماكسوفين كانوا عملوا ايه؟؟
ده احنا اللى اتكلمنا كلمتين بالعافية والناس بتسال اسئلة نازلة ترف على الدكتور

استاذ عبد المنعم
احنا بجد كنا متغاظين جدا من عنوان الخبر اللى اتنشر فى الدستور

طب هو حضرتك عرفت ازاى انه "للمتمردين

المهم ما علينا
كنت اتمنى ان حضرتك تحضر لقاء زى ده علنا نستفيد منكم
ومن الدكتور محمد اكثر بطرح الاسئلة اللى فى الصميم

وبالنسبة لمشوار امبارح
انا بجد مكسوفة جدا جداعلى التاخير
وكمان انى تقريبا معرفتش اتكلم لانى كنت تعبانة جدا

ارجو تقبل اعتذارى

محمد السيد..مش حاسكت يقول...

لا تعليق علي تعليق عبد المنعم ...

ولكن .......

لم يكن هناك أي داعي لما نشره ولا يوجد أي مبرر لمحتوياته ...

فلم يكن هناك حديث عن تمرد شباب الإخوان ومدونيهم .. ولا اي حديث عن انتشار توجهات سلفية "أو وهابية "بين افراج الجماعة والصراحة مش عارف منعم جاب منين الكلام ده ...

وللاسف الخبر اللي نشره منعم كان بيقول كده ..إنما في الوااااااااااااقع محدش جاب سيرة كده تماما .......


تاني حاجة منسق الموضوع ...

كان هو اللي حيتصل بمدوني الإخوان الكبار فعلا ... وكان علي رأسهم منعم ..لكن اللي حصل إن الخبر وصل لمنعم من صحفي في المصري اليوم ... اللي كان اتصل بالدكتور مرسي قبلها يسأله علي اللقاء ... ومنعرفش وصله ازاي الموضوع ؟ لكن ده اللي حصل ...

ومنعم اتصل بالمنسق يعاتبه وانه عرف الموضوع من بره مش من جوه وكده ....

وفعلا سأله يتنشر ولا لأ ..فالراجل قال اعمل الصالح .. .بس الواضح لأي حد .. إنه مش الصالح اللي اتنشر ده ...
حتي لو قلنا الحياد والحاجات دي .....

كمان تيجي الصياغة بالشكل ده ؟؟؟؟


.................................

اللقاء كان أكثر من راااااااااائع .... وخصوصا خصوصا ... بعد الثامنةو وعشر دقائق .....

حنعمل ايه؟؟حد قال لكم تمشوا (:

alaa shehata يقول...

ادعوكي لزيارتي
http://3alaa-shehata.blogspot.com/

امام الجيل يقول...

امممممممم
مش عارف اقول ايه
بس اللى استنتجته من التعليقات انه لقاء مهم وجميل
بس طبعا مهم اوى انه مكنش عشان زى ما بتقول الصحف عشان يهدى النقد والكلام ده بس مهم ان الجماعة تهتم بهذا الفصيل المهم فيها اللى خرج بافكار وبشكل جميل يبرز ان الاخوان مش جامدين
فكريا وفيه بينهم اراء وافرادها لكل منهم رايه وفكره مهما كان متمسكا بالجماعة ده مش معناه انه بقى فى قالب واحد ويلغى فكره

حاتم يقول...

شذي كنت عايز اعرف
هل حضر الدكتور
بتاع امواج في بحر التغيير
أم رفض هو الاخر الحضور
مع ما يكتبه عن الاصالة والانتماء
للدعوة واحترام الرموز
ياريت تخبريني عشان لو ما حضرش
يبقي هو كمان زي صاحبه منعم

غير معرف يقول...

هو ليه محدش فيكم عايز تحكي تفاصيل
اللقاء دا بصراحة ومين اللي جاء ومين اللي ما جاش
ومين اللي وجهت له دعوة ولم يحضر
من المدونين الكبار
ولماذا لم يحضروا
هو اللقاء كان فيه حاجة سر ولا حاجة
ولا نبهوا عليكم بكدا؟

محمود سعيد يقول...

أجد نفسى مدفوعاً لسؤال الغير معرف الأخير


هو حضرتك شايف إن كل التفاصيل هنا وفى باقى المدونات وفى الجرايد كمان مع التحفظ شوية صغيرين

شىء كافى

ولا حضرتك عاوز تقرير أمنى بأسماء الحاضرين وغير الحاضرين

عبد الجواد يقول...

للاسف الشديد لم اتمكن من حضور هذا اللقاء
ليس لانني لست مدوننا
ولكننى من المهتمين جدا بالمدونات

ولكن منعنى ظرف طارئ من الحضور

واكثر ما ادهشنى صراحه ولا اخجل
من اقول ان منعم اعطاني صورة سلبية تماما عن اللقاء
وانه كان عبارة عن محاضرة
وتعامل الدكتور مع المدونين بمنطق الشيخ والتلميذ

المهم
بعدما تابعت اكثر من تعليق علي اللقاء من الواضح انه كان مثمرا ولو بنسبة
اختلفت عليها الاراء

الشاهد انه يحسب للدكتور مرسي اهتمامه بالموضوع

واعطائه اولوية من اولوياته الكثيرة

العجيب جدا جدا

ان منعم ما زال يدافع عن نشره للخبر
تحت منطق ان الاخ المنسق قال له اعمل الصالح

طيب وهو يا اخ منعم الصالح انك تنشر الخبر
حتى قبل ما يتم
والصالح اسلوب وصياغه الخبر

واضح ان صالح تايه
وربنا يسترها

غير معرف يقول...

الاخ اللي بيسأل عن الدكتور بتاع امواج التغيير وبيلمز في شخصه اتق الله
وادخل علي الموقع الرسمي للجماعة
وهتشوف الاخ كاتب ايه بالعند فيك
دا لينك المقال

http://www.ikhwanonline.com/Article.asp?ArtID=31906&SecID=391

شقاوة شعب يقول...

معلش معلش حصل خير

كنتوا من نفسكم تحاولوا تستفادوا من اللقاء وكل واحد يطلع اللى عنده ويسأل الاسئلة اللى عايزها

ربنا يوفقكم جميعا ان شاء الله

تحياتى
شيماء