هو اخ ولامش؟؟

that is the question.

اولا : احب اعيد على كل المدونين والمدونات الاخوان منهم والمش

ثانيا : اعتذر طبعا عن غيابى فى الفترة السابقة ده لان مفيش مواضيع جادة بتدور فى دماغى علشان اكتبها ولانى فى حالة توهان مؤقت لغاية ان شاء الله اما استلم الامتياز بتاعى فى مستشفى الميرة

ثالثا : انا الحمد لله جبت جيد جدا كتقدير عام للسة مايعرفش

بس

اخش فى الموضوع

هى1: انا مش عارفة ياختشى الرجالة دول اتعموا ولا اية؟؟ ازاي يسيبوا بنت زى القمر زيك ماتتجوزش لغاية دلوقتى( تتحدث باسلوب ام احمد بتاعة الفجل)؟؟

هى2: مش عارفة والله يا أوختشى ,يالا ماتخلينيش ادعي عليهم (منكسرة وحزينة يا عينى

جد بقى

هى1: انتى عرفتى انى جالى عريس من كام يوم؟؟

هى2: يااااااااااااااه بجد؟؟

هو اخ ولا مش؟؟

هى1: مش ازاى يعنى ؟؟ اخت مثلا؟؟

هى2:ههههههههههههههه

لأ طبعا مش قصدى

يعنى اخوان ولا مش اخوان؟؟

هى1: اه , لا ياستى مش اخوان

هى2: طب وبعدين هاتعملى ايه؟؟

هى1 :هاعمل ايه فى ايه؟؟

لو كان كويس وملتزم ومحترم واخلاق ويناسبنى يبقى يشيل

هى2: وموضوع انه مش ده مش هايعملك مشاكل كأخت؟؟

ومش هايعملك مشاكل فى شغلك ودعوتك وخروجك ودخولك؟؟

واهتماماتكو اللى ممكن ماتبقاش واحدة ؟؟

وكلامكو مع بعض اللى احيانا ممكن مايبقاش مفهوم بينكو؟؟

هى1: ايه يا حجة اللى بتقوليه ده انتى محسسانى انه جالى واحد مش مسلم

انا شايفة ان الامور دى ممكن تتظبط بسهولة جدا لو فى تفاهم بين الزوجين

انتى ماسمعتيش عن الاخ الكبير اللى كان الدي اف بتاع مراته

ده كان بيقول كده وهو فرحان ومش مكسوف

ومسمعتيش كمان عن اخت تزوجت من اخ وقعدها فى البيت وقالها مانتيش رايحة فى حتة

هى 2: لأ طبعا سمعت

بس دول حالات فردية

والاغلب ان اللى مش ده بيبقى خايف على مراته لاتروح كده ولا كده وطبعا هايبخل على الدعوة بوقته ومجهود مراته اللى فى رأيه ان بيتها اولى بيه

والاغلب طبعا ان الاخوة بيكونوا شغالين فى الدعوة وطبعا بيبقوا عايزين زوجاتهم يشاركوهم فى ثواب اصلاح مصر والامة بدون طبعا ماتاثر على بيتها.

وانتى كمان ماتعرفيش ان الاخت اللى مش متزوجة اخ بيبقى فى مسؤليات ماينفعش تاخدها حتى لو كانت اهله ليها وممكن واحدة تانية فيها الصفة دى ولو حتة اقل كفائة هى اللى تمسك العمل ده

هى1: بجد انا كل مابفكر فى الموضوع ده ببقى هاتجنن

ازاى يضحوا بالكفائة علشان سبب تافهة البنت ملهاش اى ذنب فيه

هى2: انتى عارفى انى مرة سالت طنط مسؤلة عن الموضوع ده قالتلى ان ده صحيح وانه بيحصل بس ليه سبب مقنع ووجيه

اللى هو ان الزوجة بيبقى ولائها لزوجها وماينفعش تخبى حاجة عليه

علشان كده المسؤلات بيخافوا انهم يضعوا الزوجة فى الموقف ده منعا للاحراجها قدام زوجها وعلشان ما تخطاش خطا شرعى

هى1 : والله الكلام ده مش مقفنع الحقيقة

مهو ممكن اخ يحط مراته فى موقف زى ده

هى2: طب هاقولك سبب تانى

خالتو قالتلى مرة واحدة مسؤلة بردو اتخانقت مع جوزها اللى هو مش

الراجل كان متغاظ منها وكان شايط

راح واخد نوتة تليفوناتها ومبلغ عن كل اخواتها فى اللى فى الحى

هى 1: يانهار اسوح

طب وبعدين؟؟

اعمل ايه ياربى؟؟

يعنى ازود فى دعائى ان ربنى يرزقنى باخ؟؟

هى2: بيبنى وبينك انا كمان محتارة خايفة ارفض واحد ارتضي دينه وخلقه لمجرد انه مش اخ

الى هنا انتهت قصة الاختين الحلوين المحتارين

عندى ليكوسؤالين

1- فى رأى كل واحد فيكو ايه هو حل الاختين دول وكل الاخوات المحتارات

2-هل ياترى الاسأله اللى البينتين دول طرحوهم بيدوروا فى مخيله الاخوة اللى بيتزوجوا بنات مش على امل انهم هايخدوهم دي اف

وشكرا