جائنى التاج التالى

جائنى هذا التاج من صحبتى و اونتيمى سناء بيه البنا

بسم الله

لو ما كنتش مصري بس عربي كانت هتبقي ايه نظرتك للمصريين و اللى بيحصل في مصر دلوقتي ؟ أو لو كنت أوروبي أو غير مسلم برد ايه نظرتك للعرب و المسلمين ؟

كنت هاقول على المصريين انهم بتوع فهلوة وشايفين نفسهم وانهم متعنتظين على الفاضى بالذات بالذات الناس بتوع الفن والافلام والكلام ده

بس بردوا كنت هافتكر الحديث القائل انهم افضل جند الارض

يعنى مجدع وشهامة وبجد اما بيبدعوا بيتميزوا بالذات فى العلم والتدين وكده

وكنت استغربت من سلبية كتير منهم وصبرهم على العيشة اللى هما فيها , كل حاجة عندهم بتغلى الا قيمة الانسان

اما بقى لو كنت اوروبيه ومش مسلمة ومعرفش حاجة عن الاسلام غير بسلوك المسلمين لقلت ان الاسلام دين بيدعوا الى التخلف والسلبية وعدم احترام الانسان

اما لو كنت اعرف الاسلام جيدا من مصادرة ورأيت سلوك العرب والمسلمين لقلت انهم اساءوا لدين عظيم بجهلهم وتخلفهم

وبعدين انا اعرف ان دولة مثلا فى حكم مستبد وان شعبها مش مصحصح لكن 22 دولة ساكتين على الاستبداد والبهدلة

عجيبة

تقريبا دى الحاجة الوحيدة اللى اتفقوا عليها

لو قالولك انت بقيت رئيس جمهورية هتعمل ايه ؟

ياااااااااااااه بس هو يسيبهولى بس

بصوا بقى

اول حاجة هاخرج كل سجناء الراى من السجون اللى هى مكان قاتالين القتلة مش اصحاب الفكر

تانى حاجة

هاحاسب كل صاحب منصب فى الدولة وهاعمل تقارير ذمة مالية من اكبر راس لاصغر راس واللى هاكتشف انه كان بيلعب بذيله هاقصهوله واسجنه :)

فاهمنى يالى فى بالى

ثالث حاجة

بعد ما اكون طلعت فلوس البلد من الكروش هاوزعها على الغلابة اللى مش لاقين ياكلوا

وهاعمل تكافل اجتماعى ما يخرش المية

وهافرض الزكاة على كل مسلم لغاية اما نبقى فى عصر عمر بن عبد العزيز

رابع حاجة

هاصلح التعليم

والمواصلات

والطرق

والصحة

والصناعة

والتصدير

والبترول والغاز

والزراعة

وكل المجالات اللى هاحس انه ممكن توقف البلد دى على رجلها

اه نسيت

وهاسحب السفير المصرى من اسرائيل وهاطرد السفير الامريكى :)

تقريبا كده خلصت

لسه حاجة

هاشرع قانون انى اقعد فى الكرسى لحد اخر نفس فى صدرى

وتوريث الكرسى لسابع ابن

هههههههههههههههههههه

لو كان ينفع ترجع طفل تانى و تخليك طفل علطول هترجع ؟ و ليه ؟

اه ارجع

علشان الاطفال ما بيتحاسبوش وبيدخلوا الجنة على طوووووووووووول

لو انت طبيب و عندك مريض ميؤوس من حالته .. ايهما تفضل .. انك تصارحه بالوضع و تقوله كل شىء بأمر الله فى الآخر و لا تغرس فيه الأمل لغاية لما يموت ؟

الصراحة ده سؤال صعب جدا

بس على حسب العيان لو لقيته مؤمن وبتاع ربنا وحاسه انه هايصبر ويحتسب هاقله براحة

بس لو حسيت ان لو قلتله انه ممكن انه مايصبرش و مايرضاش بقدر الله انا هاخبى عليه بس هاقول لاهله

لو سمح لك برؤية الرسول صلى الله عليه و سلم و انك تقوله كلمة واحدة بس أو جملة واحدة بس هتكون ايه ؟

مش عارفة ايه نظام الاسئلة الصعبة دى

هاقوله

اتمنى انى اكون جارتك فى الجنة

لو خطبت واحدة أو اتخطبتى لواحد و أثناء الخطبة اكتشفت أو اكتشفتى ان الطرف الآخر غير قادر على الانجاب هيكون تصرفك ايه ؟

لو تأكدت انه الانسان ده هو نصى التانى وهاعيش طول عمرى معاه سعيدة متفقين و فى تفاهم دائم بينا

هاوافق

انا غاوية يعنى عيال ودوشتهم

وبعدين ما انا ممكن انا وهو اننا نكفل طفل او طفلة فى بيتنا ويبقى ابننا ونكون ضربنا عصفورين بحجر واحد

اننا اشبعنا العاطفة اللى جوانا و اننا نفوز بمرافقة النبى فى الجنة

لو طلعت القمر حتكتب عليه ايه ؟

ربنا ما خلقت هذا باطلا سبحانك فقنا عذاب النار

انا صغيرة وضعيفة قوى يارب

لو كنا فى عصر ازدهار الاندلس كنت تتخيل نفسك ازاى ؟

سيدة مجتمع جامدة جدا زى السيدة خديجة فى عصرها

لو مررت التاج ده لحد و ما جاوبش عليه أعمل فيه ايه ؟

لا بجد عادى

لو حتسافر فى أى مكان فى الدنيا تعيش فيه هتروح فين ؟

اى حتة الانسان بيحترم فيها والتعليم فيها محترم والعلماء فوق الرؤوس وفيها حرية رأى وتعبير وحرية معتقد

لو مررت التاج تمرره لمين ؟؟

سارة البندارى

ومروة حلم الحرية