الاثنين، أغسطس ٠٦، ٢٠٠٧

الزواج







يالها من كلمة تفرح ناس وتخوف ناس تانية

موضوع الزواج ده تقريبا بيلح على دماغ البنات من اعدادى ,انه يجيلها الفارس اللى معرفش ايه على حصان معرفش اية بردو ,وانه ييجى الانسان اللى يفهمها وتفهمه ويخرجها ويعشيها ويفسحها ويخرجها من بيت ابوها اللى كاتم على انفاس انفاسها


يمكن هو ده الزواج بالنسبة للبناتيت الصغيرين


اما بالنسبة للشباب ,لقلة تعاملى معاها وانحصار كلامى مع ولاد خالاتى وعمامى ,فطبعا لا اعلم متى تأتيهم هذه الافكار الشيطانية اللى الزواج يعنى

بس انا اظن انها بتجيلهم على كبر,بما ان الولد اللى شايف نفسه (لسه ورور) بيحب الاول انه يجول ويصول فى انحاء المعمورة قبل الارتباط بواحدة وكمان شوية عيال




وغير كده بردو فى شباب ياعينى غلبان بيكون نفسه ساعات بيوصل لسن التلاتين وهو لسه مش مؤهل للزواج


المهم

انا اية اللى جاب الموضوع ده فى بالى (قال يعنى ما بفكرش فى اصلا




المهم بردو انا مش عايزة حد يركز معايا قوى





كل يوم ما شاء الله بنسمع عن زواج فلانة وعقد فلان وبناء علانة



وماشاء الله ربنا يكتر افراح المسلمين





سألت نفسى ياترى العالم دول كلهم عارفين هما ليه بيتجوزوا




انا نفسى اسمع اجابات مسمعتهاش قبل كده



طبعا الملتزمات هاتقولى هافتح بيت مسلم واعف نفسى والكلام بتاع الملتزمين ده



بس ياترى هما فعلا حسينه


اعتقد انها لو عايزة تاخد حسنات ممكن انها تصلى


ممكن انها تصوم


ممكن انها تتصدق


اشمعنا عايزة تكسب ثواب بالزواج



اتمنى ان محدش يقهمنى غلط ويقول هى مولوتوف بقت بتخرف ولا اية؟؟



اعتقد واحدة اسمها مولوتوف مكنش مستبعد انها تخرف ودماغها تضرب



ياترى بجد كل واحد بيتجوز وكل واحدة بتتجوز عارفة بجد بينها وبين نفسها هى بتتجوز لية؟؟



انا اريحكو واقولوكوا لية الافكار الهدامة دى جات على دماغى


لانى ببساطها حاسة انى كل شوية بعيد عن السامعين كده بعقل


خلاص بدات تتلاشى فكرة الفارس اللى على حصان ابيض, هو الحق يقال هو مكانش حصان وكانش ابيض هو كان بيتش باجى وساعات باراشوت



وبدات افكر فعلا لو فكرت مجدر فكرة فى الجواز انا هاتجوز لية؟؟



قعدت افكر فى الجواز شوية بجد لقيته كله مسؤليات ووجع قلب




لقيته تربية اطفال وغسل مواعين وتحضير غدا

وياولى ويا سواد ليلى لو كانت القمصان مش مكوية الصبح

مع العلم انى فى بيت ابويا متستتة
وهو اللى بيكوى القمصان لوحده

وبعدين بدات ارفع شعار
لا للجواز

كل ما امى تجيب السيرة دة
واقولها استريحى انا قاعدة جانبك ومش هاتحرك
وكل ما تحصل مشكلة مع ابويا يقولى مهو انتى اما تكبر وتخلفى هاتقولى ابويا قال وسوا
قلتله مهو انا بقى مش هاتجوز واخلف علشان الكلمتين دول

لا واكتر حاجة كانت بتجننى انه ازاى واحد يقولى ارجعى الساعة كذا وما تروحيش لفلانة علشام ما بستريحلهاش



وما تتكشفيش على رجالة وصوتك ما يطلعش



وغير كده مطالبة انى استحمل عقده النفسية و استحمل نرفزته عليا




ونظرتة القاسية فى لحظة غضب ,ساعات النظرات بتجرحنى اكتر من الكلمات



فخلاصة البوست







انا هارفع شعار

لا للجواز..... لا للتحكم


لغاية اما ييجى عريس الغفلة يغير نظرتى للرجالة

39 مصابين قصدى معلقين:

غير معرف يقول...

We marry because we need someone to love
Someone to cry with
Someone to happy with
Someone to share good and bad events with
we marry because "marriage is fatarat ALLAH 2laty ftar elNas 3leha"

And there is no girl that can live without marriage , not only because of the emotional side of the marriage, but also to be a mom, don't you want to be a mom !!

غير معرف يقول...

اسماء اشرف
طلى يا شذى الافكار الغريبه دى وادعى ربنا يرزقك باللى هيلبيلك كا طلباتك
وخليكى عارفه ان مافيش حد كامل يعنى زى ماهو هيستحمل عيوبك اكيد انتى لازم تستحملى عيوبه

شذى مولوتوف يقول...

يا اللى غير معرف
انا موافقة معاك على اول خمس نقط

ولكن فطرة الله التى فطر الناس عليها؟؟
معنى كدة اننا ميكونش لينا اهداف واولويات لو الزواج هايحققها هانتجوز لو مش هايحققها اشق طريقى فى حاجة تانية

وموضوع بقى انى نفسى ابقى ام
اه نفسى بس فكرت فى ابتكار
اننا نربى ولاد الشوارع
لو الموضوع لية علاقة بالامومة بس


بالنسبة لعزيزتى سمسمة
مش عارفة افكار اية الوحشة اللى بتتكلمى عنها
بكرة تكبرى وتعرفى انا باتكلم عن اية
وبعدين انتى عارفانى مفيش عيوب :P

AbdElRaHmaN Ayyash يقول...

هههههههههههههههههههههه
:D:D
في ايه
انا عاوز اتجوز
عشان اعمل بيت محترم
و طبعا هاخد بيه ثواب ان شاء الله
بس هو بالنسبة لي مش وقته التفكير
بس غصب عن الواحد بيفكر
يا مس شذا أنا أتمنى و متأكد انك هتغيري رأيك بسرعة
بس فكرة الفارص اللي على حصان ابيض طبعا مش صح
لازم نكون واقعيين
بجد موضوع جميل
لك تحية
سلام

غير معرف يقول...

اسماء اشرف
انا قصدى يا حبى ان مافيش حاجه اسمها مش عايزه اتجوز لان حاسه ان الجواز ده جزء من مسيرتنا فى الحياه واحنا شخصيا (الاخوان)
علشان نبنى جيل بجد بيعرف ربنا ويكمل مسيرتنا فى الحياه
بغض النظر بقه عن الجانب العاطفى والروحانى وما شابه ذلك

غير معرف يقول...

"معنى كدة اننا ميكونش لينا اهداف واولويات لو الزواج هايحققها هانتجوز لو مش هايحققها اشق طريقى فى حاجة تانية"

ايه هى أهدافك وأولوياتك اللى لو الوزاج هايحققها هتتجوزى ولو مش هايحققها مش هتتجوزى؟؟

"اه نفسى بس فكرت فى ابتكار اننا نربى ولاد الشوارع لو الموضوع لية علاقة بالامومة بس"

مش فاهم ايه العلاقة , بس عموما أنا ما قلتش أنا الزواج أمومة بس وفى نفس الوقت الأمومة مش حاجة صغيرة ولا بسيطة ولا هى شىء يمكن الأستغناء عنه ولا هى مجرد "برو عتب" عشان الأم تبتكر بتربية أطفال الشوراع

شذى مولوتوف يقول...

السلام عليكم
انا مش عارة الجو متوتر لية

انا طرحت افكار
والبوست ده مش هو بس نظرتى للزواج
فى حاجات انا مقولتهاش
يعنى ياريت محدش يتحمق قوى وياخد الموضوع على صدره

انا فى تعليقى للشخص اللى هو غير معرف اقصد انه الهدف من الزواج لازم يكون واضح ومايتحققش بحاجة تانية غير الزواج على سنة الله ورسوله

وموضوع الخلفة ما اعتقدش انة هدف بحد ذاتة محدش يعنى غاوى وجع الولادة
اعتقد الخلفة هى وسيلة لحاجة اسمى
ممكن تسميها تعمير الارض
ممكن تسميها ان الزوجة نفسها تخلف من الانسان اللى بتحبة علشان جزء منه يفضل معها على طول

ممكن علشان تربى بطل من ابطال الاسلام اللى يكون له شأن عظيم

لكن الامومة الامومة ممكن تتوفر اما نتروح جمعية رسالة وتتبنى طفل من هناك

شذى مولوتوف يقول...

اه معلش نسيت اعلق
على نقطة ان مفيش بنت تقدر تعيش منغير زواج

اعتقد لا
اعتقد ان فى بنات عايشين زى الفل فى بيوت اهاليهم

وموضوع انها عانس وياحرام ميش عايشة حياتها وغلبانة وكدة

هى لو فاهمة الدنيا صح هاتعيش حياتها صح

وعارفة ان لو نصيبها مش فى الدنيا ان شاء الله هايكون ليها فى الاخرة

من الاخر محدش بيموت من غير الجواز

شذى مولوتوف يقول...

الاخ عبد الرحمن

ليا طلب
وشكر لحضرتك

الطلب انك ياريت يااااااااااريت
تكتب اسمى بالف لينة
شذى

والشكر علشان انت دايما ناصفنى
ربنا يكرمك ويعزك ويرزقة بزوجة زى اللى بتتمناها واحسن شوية
وتعملوا بيت حلو وجميل ومحتر يكون زى دار الارقم كده

belal يقول...

ههههههههه

هذه أيضا لوحتي المفضلة

يالها من لوحة ..

غير معرف يقول...

اسماء اشرف
انا معاكى يا شذى فى اخر رد ليكى

غير معرف يقول...

اولا ازيك يا شذا

ثانيا
ازيك بردو

ثالثا
اقولك رايى يعنى
الزواج بمعناه الراقى اللى بجد معدش كتير
لكن اسهل حاجات ممكن نغيرها هيه اللى بنكون فيها طرف

وهكذا الزواج
طرفيه قادرين بفضل الله طبعا انهم يخلوه زى ما يتمنوا او يخلوه صورة سيئة


شايفة العقل
:)

انتى بأه يا شوزى
ربنا يوفقك
ويقدرلك الخير
ايا كان ايه هوه يا ستى

:)

يلا مش مهم يقول...

احب اضيف سببين للزواج
الاول
علشان التخلص من السؤال المتكرر هو انت ليه متجوزتش
والسؤال ده ممكن اللي متجوز وخصوصا في وسك الاخوان من الممكن ان يقابله في اليوم اكثر مما ينادي باسمه
والثاني
انا الفرد يظل مشكوك في اخلاقه حتي يقطع الشك باليقين ويتزوج فالزواج اصبح علامة منعلامات الصلاح
ويللا شم مهم

طيف الاخاء يقول...

السلام عليكم
وحشتينى كتير اوى ياشوشو كان نفسى اكون اول المعلقين على البوست الجديد ده بما انى اول واحدة اخدتى رايها فيه
بس انتى ليه حاسه ان الزواج ده تحكمات وحد يؤمر وحد ينفذ انما سكينة ومودة ورحمة
بينهم كما قال الله سبحانه وتعالى
وزى ما بتقولى ان الملتزمين يتزوجو من اجل العفة وبناء بيت مسلم
فالناس العادية تفكر بمنطلق الفطرة فى بيت تملكه واسرة واطفال
وبعدين حكايه اطفال الشوراع ديه يعتبر مسكن وعمرك ما هتحسى اتجاهم باحساس الامومه الحقيقى وانا عرفت منين احساس الامومه الحقيقى ده لاننا لو فعلا بنحس انهم ولادنا حقيقى ماكناش سبناهم كده ولو فى يوم تعبتى معاه وانتى بتربيه هتقولى له
ايه؟؟ لكن ابنك عمرك ما هتقولى له
اخرج للشارع
انا اسفة على التطويل

مشروع انسان يقول...

نقول بسم الله
اولا اكيد طبعا حضرتك عارفة اهمية الزواج ودوره والنوايا تختلف من واحد للتانى واذا كان الناس بتقول نوايا وبس ومتبقاش فى قلبها صحيح يبقى ممكن حضرتك تعملى كده وتبقى نوايا حقيقية من غير ما اعرف حضرتك انا متاكد انك هتغيرى رايك بعد فترة يا ما كتير قالوا كده وغيروا رايهم نظرا لتغير الزمن والحاجات والفكر كمان كل ما الواحد يكبر بينظر للحياة بشكل اوسع ومتعمق وخصوصا احنا كاخوة الحمد لله فهمنا صحيح وعارفين بنتجوز ليه يعنى مثلا حضرتك قلتى تخليتى عن فكرة الفارس اللى على حصان وده بيكون فى مرحلة المراهقة للبنات بس لما يكبروا شوية وينزلوا للواقع بيغيروا تفكيرهم ده حتى ان فيه كتير من البنات بيتخلوا عن الرومانسية فى حياتهم نظرا لضغوط الحياة ومشاغلها قصدى من كلامى انه ممكن اوى تغيرى رايك تبعا للظروف اللى لسه هتيجى وان شاء الله هنزل موضوع قريب عن الزواج وارجو ان حضرتك تبقى تشوفيه اصلى ليا نظرة فى الزواج بنيتها عن مشاكل شفتها وكتب وحاجات كتير ربنا يرزقك باللى يرضيكى

Saad El-Shater يقول...

عارفه

هما كده كسبو

----

اكيد انتي بتسألي ميين

دول اعداء الحياه هما الي عايزينا نوصل للوضع ده

يعني مثلا النظام بيعمل اللي بيعملوا بيعتقل اباءنا وبيسرق فلوسنا
علشان الناس تقول

يخريبتها مصر ويخربيت اللي بيحبها

اما الرسول لما المشركين في مكه عملوا اللي عملوه فيه

خرج من مكه وهوا بيقول انت احب البلاد الي قلبي

علشان كده عليه الصلاة والسلام رجع ليها فاتحا

يعني احنا لازم لا نتأثر بمضايقاتهم

فده مثال علي اللي اعداء الاصلاح بيعملوه علشان يكرهونا في مصر

وهما برضوا بيكرهونا في الجواز وبيقولوا انه مسئوليه و و و و..الخ

علشان هما مش عاوزين الخير

والرسول ص قال في معني الحديث تكاثروا حتي اباهي بكم الامم يوم القيامه

احنا لازم نثبت لهم ان رغم انهم بيحاولوا ينشروا الفساد و"الصياعه" والبنات اللي ماشيه مع الولاد في كل الدنيا

احنا برضه هننشر السنه والالتزام

وهنشجع الجواز

لازم تعرفي ان البيت المسلم ده محاربه للفساد
ونحارب به اعداء الاصلاح

وبعدين فيه ناس كتييير اتجوزا وعاشوا في سعاده بالغه

الحياه كلها مش من جانب واحد

ده ليها وجوه حلوه كتيير
--------
معلش علي الرغي الكتييير

شذى مولوتوف يقول...

عارفين

انا مبسوطة جدا علىشان استفزيكوا

بجد جزاكم الله خيرا على الردود الرائعة

واكتر سببين صادقين بجد هما بتوع استاذنا مجدى
الراجل يعينى عايز يريح دماغه
يعمل اية يعمل اللى هما عايزينة
ههههههههههههه

غير معرف يقول...

مممممممممممممممم

عارفة ياشذى
انا من يوم اتخطبت وانا عمالة افكر في الزواج بصورة تانية خالص غير اللى كنت بفكر فيها قبله
بقول لنفسي معقولة يبقى كل دوري في الحياة انى اصحى الصبح اعمل الفطار وانا بفكر هاعمل ايه على الغدا وابدأ تنظيف وكنس ومسح ومواعين والذي منه طول النهار لغاية ما الاستاذ يشرف ومطلوب مني انى اكون على سنجة عشرة علشان يعجب :)

الحقيقة بحس انى مخنوقة جدا وكله بيطلع على المسكين خطيبي لانى بحس انه حياتي لما تتحصر بس في كده حتى لو كانت نيتها البيت المسلم والمجتمع المسلم والكلام المعروف ده بحس برضه انه حياتي الجاية هتكون محصورة في المطبخ

بس للأسف اتدبست في خطوبة مش هاينفع اخلع منها ولا ارفع معاكِ الشعار :)

الفاتح اليعقوبي يقول...
أزال المؤلف هذا التعليق.
شذى مولوتوف يقول...

صديقتى الغير معرفة

انا عايزة اقولك حاجة بعد قراة اراء الناس على المدونة وبعد سماع بعض اراء اصحابى

عايزة اقولك حاجة

زمان ايام الرسول يعنى كان الموضوع واجب فى دينا ان الزوج بيجيب للزوجة جارية او اتنين او تلاتة

واحدة تطبخ ووحدة تهتم بالدواب ووحدة تخيط وهكذا

والزوجة تبقى قاعدة زى الملكة فى بيت زوجها ترعاه وتربى اولاده واعتقد انه فى ايامنا ما هو بالشئ الهين

انتى طبعا عارفة ظروف الشباب اليومين دول يادوبك بيتجوزوا بالعافية

فعلشان هما صعبوا علينا وقطعوا قلبنا قبلنا اننا نطبخ ونمسح ونكنس ونقف فى المطبخ بدل ما نربى اولادنا

فالرجالة خدوا مقلب فى نفسهم واعتبروه حق ليهم وان الزوجة لازم عليها وواجب انها تعمل شغل البيت مع ان دة مكانش زمان كده

وطبعا انتى بتعملى كده علشان بتحبى زوجك وعايزة راحته يعنى عمرك ما هاتحسى انك زى الشغالة اللى فى البيت
دة لو جوزك كان فاهم انك بتعملى كدة علشانه مش علشان ده واجب

ارجو ان النقطة تكون وصلت لانى مش هاحتمل حد يفهمنى غلط زى الاخ اللى مش هارد عليه هنا فى مدونتى

الفاتح اليعقوبي يقول...
أزال المؤلف هذا التعليق.
إخوانية مصرية يقول...

كنت دخله ارد ووفجاءة باين فقدت الذاكرة
ههههههههههه
بت ياشذي كفاية ردي علي الماسنجر
وامشي روح اجري العبي بعيد
انتي عوزة تعنسينا ولا ايه
هههههههه
اوعي تزعلي اني بضحك معاكي
اشوفك بقي علي الميل
ويارب تردي علي التاج بتاعي قريب
عشان مش موت حد في القعدة دي
هههههههههههه

Unknown يقول...

هو أنا مش هاقول الزواج فى حد ذاته فطرة .. وسنة من سنن الله فى أرضه والكلام الكبير المجعلص ده

لكن هاقول ان الواحد محتاج يتجوز
عارفين لما كنا بنتكلم فى مادة الاقتصاد فى الثانوية عن :
" كيفية اشباع الحاجات ؟ وما هى هذه الحاجات ؟؟ "

أهو الزواج حاجة برضو .. ولابد من تلبيتها .. حاجة من النوع العاطفى والنفسى بالدرجة الأولى قبل أن تكون حاجة جسدية

ولو لم يتم إشباعها .. هاتأدى فى الآخر إلى حالات نفسية غير سوية بالمرة
وماتحاوليش تقنعينى ان الحالات دى موجودة ومتعايشة وزى الفل ..

مش ممكن .. لابد يكون فيه خلل ما .. ربما يكون غير ظاهر بالضرورة .. لكن ده فى حد ذاته مصيبه أكبر ( إنه يكون غير ظاهر ) .. لأن ما خفى كان أعظم

وربنا يستر على ولايانا .. ويجوزنا أجمعين قولوا آميييييييين
:)

asmaa ibnatalislam يقول...

ازيك يا شذي.. وحشتيني جدا..انا كنت وعدتك بزياره ولسه منفذتهاش بس ان شاء الله هتبقي قريب لاني بروح الجيزه اليومين دول كتير..
بالنسبه للموضوع اللي انتي طارحاه انا كنت هعلق علي جانبين بس لاقيتهم مجموعين في تعليق الاستاذ سعد الشاطر ود\ نبيل لانهم قالو بالظبط اللي كنت عايزه اقوله
انا بعتالك تاج علي المدونه عندي
wwwbahlam.blogspot.com

غير معرف يقول...

السلام عليكم ورحمه الله وبركاته
انا بس عايز افكرك بحاجه لو خيرتك بين الزواجمن ناحيه ومن ناحيه اخرى ان يكون عندك اجمل فيلا فى مصر وعربيه اخر موديل وعندك فلوس ملهاش حد فى البنك(بنك اسلامى يعنى)وعندك وعندك
اكيد طبعا بمنطقق ده هتقولى ياه زواج ايه بقه
بس بعدها هفكرك بحديث النبى صلى الله عليه وسلم خير متاع الدنيا زوجه صالحه واعتقد الزوج الى يكون زوجته بالنسباله خير متاع الدنيا اكيد هيشلها فى عنيه
بصى يا اخت شذى انا بما انى والحمد لله من الاخوان وكمان خاطب وكمان بحب خطبتى جدا جدا هقلك ان فعلا عمر مكان الزواج مجرد مسؤليات بس وكنيس وطبيخ
يبنتى بصى لمعنا كلمه زواج
انا بحس انها اقوى من كلمه اخوه واعتقد انتى فهمه كلمه اخوه
غيرى رايك وعلى مسواليتى
تحياتى ليكى
واسف على التطويل

شهاب الأزهر يقول...

طيب ما تيجو نعمم المنطق دا ونبص له من الناحية التانية كمان..

يعني ليه الشاب المسكين يدبس نفسه ويفضل يركب الباص اللي بربع وبلاش الميكروباص علشان يوفر كل يوم خمسة وسبعين قرش من صحته وكرامته اللي بتهدر كل يوم في المواصلات، زائد انه كل يوم بيروح الشغل من صباحية ربنا بعد الجواز ويرجع آخر النهار يلاقيها بسلامتها ضاربة "بوز" شبرين علشان اتأخر ربع ساعة، ولو فضل يحلف لها بالله العظين ثلاثة انه بسبب المواصلات مش هتصدقه، ويا سلام لما تحب تقلبها حريقة علشان أخته أو حتى بنت أخت مراة أبوه بصت لها بصة مش كويسة، ولو أخدها من قاصرها ودخل نام علشان تعبان وفاصل من الشغل وخناقاته والمواصلات وخناقاتها ومش مستحمل يكون في البيت خناقات كمان يبقى بيتجاهل كلامها ومش محترمها..

لو بسلامته راجع في يوم ونفسه سولت له انها ممكن تكون مستنياه أو حتى هتفتح الباب بابتسامة أو حتى هيتعشى معاها عشاء رومانسي يبقى ذنبه على جنبه..

تفتكروا ليه أي شاب عايش 24 قيراط ويقدر يهني نفسه بمرتبه بلا مسئوليات ولا واحدة متعلقة في رقبته ولا مواعيد حضور وانصراف يفكر يدبس نفسه؟؟


مش معنى كده اني مؤيد لوجهة النظر دي.. بس لازم نبص للقضية من كافة جوانبها، ما لنا وما علينا، وليس هناك إنسان كامل، وعلى كل طرف أن يسعى لتحسين نفسه وتقبل الطرف الآخر.. سنة الحياة

الفاتح اليعقوبي يقول...
أزال المؤلف هذا التعليق.
غير معرف يقول...

سلام عليكم
---------
بكتب تعليق فى موضوع مهم جدا جدا وكل الافكار اللى فيه فاتت على دماغى وقلبتها فيه ...واعترف من الاول انى خايفة من مسؤلياته ..ربنا يسهل
-----------
المهم
الزواج ده نعمة من ربنا علينا ....لان فيه تكملة للانسان ...ان شاء الله يا شذى هتحسى بكلامى لما يجيلك نصيبك وتلاقى نفسك موافقة ومبسوطة ..لما تحسى انك كنت نص محتاج لنص تانى يكملو مع بعض حياتهم
اكيد ربنا خلقنا اننا نقبل على الزواج ..يعنى احنا فعلا بالفطرة محتاجين الزواج
وصحيح الزواج ده فيه مسؤليات كتيييييير بس ده دور الطرف التانى انه يحسسك انه معاكى فى كل خطوة وانكم بتتشاركو فى المسؤلية ..حتى فى الطبيخ
هو يشيل مسؤلية فيه ..حتى وان كانت بسيطة بس المشاركة حلوة ..يعنى ممكن يوقلك بلاش طبيخ النهاردة خالص
هتحسى انك بتحبيه قوى

العيال احباب الله يا شذى ...عارفة ومتاكدة انه تعب ووجع دماغ وعيل عمال يصرخ فى ودنك طول النهار ...بس الامومة مش زى ما تبقولى ممكن ترضيها بكفالة طفل بس
احساس مختلف ان يكون الطفل اللى انتى امه ده كبر وخرج من جواكى ؟؟؟بجد اسالى مامتك كده هتقولك نفس كلامى
وياسلام لو الطفل ده يكون من زوج بتحبيه ..حاجة جميلة خالص :)صدقينى

الزواج بجد نعمة كبيرة على الانسان ..بس المهم الواحد يفهم دوره صح ...
فيه ثواب كبير بس تكون نية الانسان فيه صح انه يعف نفسه ويفتح بيت مسلم يزكر فيه اسم الله ويخلف عيال مسلمة بتقول لا اله الا الله محمد رسول الله بجد ويكونو فاهمين الدين صح
ده مش سهل انا عارفة بس ربنا بيعين
بس خلاص
سلام عليكم

شذى مولوتوف يقول...

السلام عليكم

انا كنت كاتبة البوست دة خصيصا علشان اعرف الناس بتتجوز لية

وماشاء الله الناس ردودها جميلة وتشرح النفس على الجواز
هههههههههه

بس انا زى ماقلت مش محتاجة حد يقنعنى بالزواج لانى متاكدة اما يجيلى نصيبى واقتنع بية واحبة واكون مقتنعة تماما ان هو دة اللى هايفهمنى ويعتبرنى كيان زى زية ساعتها انا متاكدة انى هاغير رايى بس الى ذلك الحين انا بردو مقتنعة ان فى نماذج سيئة من الرجال بيتجوزا علشان واحدة تخدمهم فتقريبا علشان يوفروا على نفسهم بيشتروا شغالة وبيضمنوا انها مقيمة عندهم وعمرها ما تفكر انها تسيبهم زى واحد كاتب اما اللى فى البيت دى لازمتها اية؟؟

فعلا

ومقتنعة تمام الاقتناع ان فى نماذج سيئة ايضا من النساء نكدية وقرشانة وغيوره ورغاية ممكن تقرف جوزها كل دقيقة


بجد ياجماعه انا مبسوطة جدا من التعليقات على الاقل وسعنا مداركنا
وحسينا ممكن الطرف الاخر بيفكر فى الزواج ازاى
واعتقد نظرة المراة بتختلف عن نظرة الرجل

فكويس اننا اتطلعنا على اراى بعض

بالنسبة للاخ اليعقوبى انا كنت كاتبة عند حضرتك تعليق اشرح لحضرتك فية مدى مضايقتى من كلامك
ورجعت مسحتة لانى ماحبتش اجرح حضرتك
وانت مصمم تعكنن عليا

انا مش عارفة ازاى حضرتك متخيل اما كلام انا كاتباة على نفسى باسلوب ساخر ممكن يتاخد عليا ويتقالى بطريقة غبية وتقولى انتى الكاتبة الكلام ده على نفسك وروحى اقرى البوست

انا هاقولك كلمة واحدة
عيييييييييب

AbdElRaHmaN Ayyash يقول...

:D:D
أعتذرررر
لكن انا متعود اكتبها كده شذى
لكن الفكرة اني كنت مستعجل
حتى فارس طالعه فارص :)
عموما ربنا يخلليكي على الدعاء ده و يارب يتحقق لينا كلنا
سلام

شذى مولوتوف يقول...

ولا يهمك ياعبد الرحمن

انت خفت ولا اية؟؟
هههههههههههه

بجد عادى جدا

** white rose ** يقول...

hi shza

azon kol wa7ed bytgwez 3shan 7aga
w 3shan hdaf
laken ana msh 3arfa leh ?
msh bt3amel m3 el mtzwgoon
bs el so3'yaren


bs lma a3raf h2olk isa



salam

الفاتح اليعقوبي يقول...
أزال المؤلف هذا التعليق.
شذى مولوتوف يقول...

هستنى رايك فى موضوع الزواج يا ايتها الوردة البيضاء

عصفور اسكندرية يقول...

ربنا يرزقك بابن الحلال
اللي يخلي دماغك تتنحي عن هذه الافكار

واللي حيستحمل لسانك استحمليه

علي فكره ليكي سمكه عندي في مدونتي
حتي تأكل السمكه افتح هذا الرابط
صاحي وبيلعب


والسمكه دي لكل الناس اللي علقت هنا

ســـارة يقول...

والله يا شذى لو تعرفي أنا فكرت في إجابة هذا السؤال قد إيه !

هو أنا 99% من الوقت بنظر للموضوع من زاويته الإيجابية : فطرة الله التي فطر الناس عليها ، أحس بالسكينة والمودة والرحمة والكلام الكبير ده ، ألاقي معين على الطاعة والدعوة
ويعني الحمد لله أقدر أقول إنه مش مجرد كلام وإنه نية قوية

وفي لحظات مظلمة أحياناً بقول طيب هو أنا هتزوج ليه أصلاً وأستحمل طباع زوجي وطلباته وبعدين العيال وتعبهم
غير شغل البيت وياسلام لو هشتغل و.......
مش هكذب عليكي

بلاقي في نفسي حب لهذا الإزعاج!

تفسيري لهذا هو قول الأعرابية لابنتها وإن كنت مش فاكرة النص : لو كانت النساء تتزوج طلباً للمال لكنتِ أغنى النساء عن الزواج ، ولكن النساء للرجال خلقن ولهن خلق الرجال

shorouk said شروق سعيد يقول...

وأنا معاكي مش عايزة أتجوز
لسة إمبارح كنت عند تيتة و سألتها قلت لها : بزمتك يا تيتة إنتي متجوزة بقالك 40 سنة عمرك شفتي إتنين متجوزين و عايشين صافي يالبن
قالت لي بصراحة لأ
أنا بصراحة مش عايزة وجع قلب
أنا والله لما بشوف ماما و تعبها في شغل البيت و تربيتي أنا و إخواتي بجد بحس إني مش عايزة أتجوز
الجواز في عصرنا الحالي يعني تربية العيال و شغل البيت
يمكن لم أكبر أغير رأيي لاكن حالياً
أنا مش عايزة أتجوز

shorouk said شروق سعيد يقول...

الحمد لله إن الجواز مش فرض

jejemam55@gmail.co يقول...

السلام عليكم ورحمة الله وبركاته
تحياتى لك شذى
فعلا موضوعك بيشغل بال معظم الشباب وبيدور فى هذا النطاق عند الملتزمين

اما عن راى فى الموضوع ده
انا كنت فى بيت اهلى زى ما بتقولى متستته
بس لان بيتنا مش بيت اخوانى فكنت محتاجه اطلع اكون بيت اعرف انطلق منه لدعوتى
ومحتاجه حد يشاركنى
متتصوريش اد ايه كانت سعادتى لما كنت ارجع من اللقاء افتح موضوع نتناقش فيه او احكى عن اللقاء نفسه دى حاجه يستحيل انها تحصل وانا فى بيت باب

كمان كنت لما اكسل او اطنش موعيدى مكنتش متخيله انى هلاقى حد يشدنى من ودانى ويقولى اوعى تكسلى عن دعوتك


اما عن موضوع المسؤليه اكيد اللى يسمع عنها من بعيد هيقول وانا ايه اللى يجبرنى ماانا كنت متستته
بس بصراحه قمة السعاده وانتى بتعطى وانت واقفه من الصبح على رجلك عشان البيت يبقى نظيف والاكل يكون جاهز وانتى على سنجه عشره
وكل ده لارضاء زوجك وصدقينى كل ده مش حاجه
وكل التعب هيزول فى ثانيه اول متلاقى ابتسامه رضى منه وممكن معاها بوسه على ايدك

والا بقى لو ربنا رزقك بطفل جميل

ربنا يرزقك وبنات المسلمين