عندما تتحطم احلامانا على صخرة الواقع

اجلس امام البحر ,اتأمله

ادقق فى تدرج الوانه التى اعشقها, اتأمل اشعة الشمس وهى تخترق سطحه لتنيرة وتجعله اية فى الجمال والروعة

التفت يمينا فارى والدى وقد انهكه التعب ففضل ان ينام قليلا

والتفت يسرة فارى والدتى تحفظ القران كما هى عادتها امام البحر

وبجانبى اختى الصغيرة التى تفضل هى وانا نستمع الى الاناشيد امام البحر

خططت ان اقابل فتاة حدثتنى على المسينجر وهى مروة صاحبة مدونة حلم الحرية وقد وعدتها بذلك فى اول زيارة لى للاسكندرية بعد اشهر من الامتحانات

وفجأة استيقظت على صوت خالتى وهى تنادى على ابى ( حاسب يا عصام) لافتح عينى وارى العربة وهى متوجهه لاقصى اليمين وكادت ان تقع من على جانب الطريق فوجهها ابى الى اقصى الشمال حتى كاد ان يخترق الجزيرة التى بين الاتجاهين

فوجهها ابى ثانية الى اقصى اليمين حتى انقلبت السيارة مرتين واستقرت على عجلاتها ثانيا وهى متوجهه جهه الاتجاة المعاكس

لم اشعر بالنقلاب ولكن بعد ان فقت وجدت طرحتى تغطى وجهى والحمد لله على ذلك لانى كنت قاعدة جنب بابا ومفيش زجاج جه عليا

ومن المضحك ان ابحث عن حذائي والناس عمالة تخرجنا من العربية

مش قادرة اوصف لكم مدى طيبة الناس

مش قادرة اقول كام عربية وقفت علشان يساعدونا

حتى بعد مضى ساعة واحنا كلنا الحمد لله كويسين نلاقى عربيات بتهدى واصحابها يقوللنا احنا خدامينكو

اى حاجة تأمروا بيها

مية ,ممكن ننقل اى حد للمستشفى لو تعبان

الحمد لله على كل حال

الحمد لله جه ونش ورفع العربية اللى نظرتلها وكنت متخيلها من ثوانى وهى كويسة وزى الفل

كنت عمالة اعدل فى حاجة صغيرة مكسورة فى الباب ومستغربة اوى واقول ياترى اية اللى كسرة وبعد ثوانى مبقاش فيها حاجة سليمة

سبحان الله

هى الدنيا كده متقلبة وفى لحظات

علشان كدة انا متأكدة ان رسول الله وصانا وشدد علينا اننا مانرطبتش بيها لانها فى لحظات ممكن تتقلب علينا ساعتها هانحزن عليها وهى ماتستاهلش

ساعتها بس حسيت ان مفيش سعادة مطلقة فى الدنيا

وان السعادة الحقيقية فى الجنة

بابا يا حبيبى انا متأكدة انك مش زعلان على العربية اد ما انا متأكدة انك كنت هاتموت لو واحدة فينا حصلها حاجة

ربنا يعوض عليك ياحبيب قلبى

ويرزقك احسن منها

ويخليك ليا ولاخواتى

ويجعل يومى قبل يومك لانى من بعدك مش هاقدر اعيش

ملحوظة ياريت اللى ييجى يزورنى فى المدونة يجيبلى معاه شوكلاتة

بس من النوع النظيف بعد اذنكوا