عهد الخوف

كان يامكان يا سعد يا اكرام مايحلى الكلام الا بذكر النبى عليه الصلاة والسلام

كان فى زمان عهد سلطان من السلاطين كان فيه الخوف مالى قلوب الناس الطيبة

كان عهد غريب

اللى يقول كلمة حق يستحق الضرب على القفا والسحل على الارض واللى يقول كلمة باطل

كان بيتشال فوق الاعناق

كانت غرابته بردو فى ناسه

غرابته فى سكوتهم ورضاهم باللى بيحصلهم

غرابته فى تأقلمهم على الاوضاع المزرية

مش بقولكوا غرييب

غرابته كمان ان كان حول السلطان حاشية اقل ما توصف بالفاسدة

كانوا بيعموا عينيه عن الرعية

كان كل وصفهم للاوضاع

ياسلطانا الكبير نام واستريح فان الشعب مستريح

عارفين غرابته فى ايه تانى

ان الناس الطيبة كانت بتخاف تقرب من الناس اللى بتقول كلمة حق لينضربوا هما كمان

على قفاهم زيهم

وبالتالى

كانوا الناس اصحاب كلمة الحق منبوذين

مش قادرين يرفعوا راية الحق عالية وفى نفس الوقت راية الباطل مرفوعةعالية فوق

وفى نفس العهد ده حصلت احداث غريبة (بردو , كل عندى غريب) المهم

المؤرخين مش لاقين لها تفسير

نفس السلطان هو هو

نفس الحاشية الفاسدة هى هى

الناس مابقيتش تخاف

و اصحاب الحق بقوا عارفين يرفعوا رايتهم والاغرب ان الناس الطيبة اتلمت حواليهم اول ما رفعوها

وضرب القفا قل

والسحل فل (من فلول ماعرفش ده عربى ده ولا ايه؟؟

الناس نسيت اللى كان بيحصلها قبل كده

كأنهم طول عمرهم بيقولوا الحق براحتهم

وكأنهم طول عمرهم وقفين تحت الراية ورافعينها

دعونى اطلق علية عهد الازدهار

لكن للاسف

بردو ماعرفش اية اللى حصل

انقلب الحال غير الحال

الافواة اتكممت

والايدى اتغللب

والقفا بينضرب

والجسد بيتسحل وبيتعذب و بيتكرهب (اسقة نسيت ان مفيش كهربة زمان)

الاخيار وراء القضبان

والاشرار وقفين برة بيطلعولهم لسانهم

الاخيار وقفوا امام قاضى غير القاضى

وكل اموالهم اتاخدت لبيت المال (هذا ما يقال

واطفالهم حرموا من ابائهم وهم احياء

عارفين اكتر حاجة مضايقانى ايه؟؟

ان كان فى بنت

كانت خايفة بردو فى الاول انها تقول كلمة الحق مع الاخيار

لكن اما جه عهد الازدهار فرحت وراحت مع الاخيار تحت الراية

وللاسف بعد اما رجع عهد الخوف من تانى

البنت دى مابقتش قادرة ماتقولش كلمة حق

حاسيتها حلوة قوى على لسانها

حاسيتها من حقها وان مستحيل حد يمنعها انها تقولها

اهلها والناس اللى حواليها بيحولوا يبعدوها عن الراية

بس البنت حاست انها اتولدت تحتها وانها لو بعدت عنها هاتموت

هاتدبح

هاتذبل

هاتتخنق

على فكرة البنت دى لم يذكر التاريخ عنها شيئا اخر

بس التاريخ بيذكر ان سلطان هذا العصر مات

وجاء بعده ولده

ولكن الحاشية ظلت هى هى

والفساد والخوف طبعا زى ما هو

ياترى هل يعيد التاريخ نفسه؟؟؟؟